Dec. 6, 2021, 11:39 a.m.

Metbeat Weather Desk
ജവാദ് ചുഴലിക്കാറ്റ് ദുർബലമായി ബംഗാൾ തീരം വഴി ബംഗ്ലാദേശിലേക്ക് നീനീങ്ങുകയാണ്. ഇത് അടുത്ത ദിവസങ്ങളിലും ബംഗാൾ, ബംഗ്ലാദേശ് മേഖലകളിൽ സാധാരണ തോതിലുള്ള മഴ നൽകും. ജവാദ് ഇനി ശക്തമായ മഴയൊന്നും ആ മേഖലകളിൽ നൽകാൻ പര്യാപ്തമല്ല. 

കേരളത്തിൽ ഇന്നും ഒറ്റപ്പെട്ട ശക്തമായ മഴ

ജവാദ് ചുഴലിക്കാറ്റ്  വടക്കുകിഴക്കൻ ഇന്ത്യയിലേക്ക് നീങ്ങിയതോടെ തെക്കേ ഇന്ത്യയിലെ കാറ്റിന്റെ ഗതിയിൽ ഉണ്ടായ മാറ്റം മൂലം ഇന്ന്  തെക്കൻകേരളത്തിൽ ഇടിയോടുകൂടിയ ശക്തമായ മഴക്ക് സാഹചര്യം ഒരുങ്ങി.  ജവാദ് ചുഴലിക്കാറ്റ് ദുർബലമാകുന്നത് മൂലം തുലാവർഷം കേരളത്തിൽ സജീവമാകുമെന്ന് കഴിഞ്ഞ ദിവസത്തെ Metbeat Weather ന്റെ അവലോകനത്തിൽ സൂചന നൽകിയിരുന്നു. കിഴക്കൻ കാറ്റ് ശക്തം അല്ലെങ്കിലും കേരളത്തിന് മുകളിൽ കാറ്റിന്റെ അസ്ഥിരത (LWD) രൂപപ്പെടുന്നതും കിഴക്കൻ മലയോര മേഖലകളിൽ കാറ്റ് അഭിസരണം നടക്കുന്നതുമാണ് ഇടിയോടുകൂടിയ മഴക്ക് കാരണമാകുന്നതെന്ന് ഞങ്ങളുടെ നിരീക്ഷകർ പറയുന്നു. ഇതിന്റെ ഭാഗമായി കഴിഞ്ഞ ദിവസം കോട്ടയം, പത്തനംതിട്ട , ഇടുക്കി ജില്ലകളിൽ രാത്രിയോടെ ശക്തമായ മഴ  ലഭിച്ചിരുന്നു. ഈ മേഖലകളിൽ ഇന്നും മഴ തുടരാനുള്ള അന്തരീക്ഷസ്ഥിതി ആണുള്ളത്. വൈകീട്ടും രാത്രിയും ആണ് ഇന്നും മഴ സാധ്യതയുള്ളത്. കോട്ടയം, പത്തനംതിട്ട ജില്ലയുടെ കിഴക്കൻ മേഖലകളിൽ ഒറ്റപ്പെട്ട ശക്തമായ മഴ ഇനിയും പ്രതീക്ഷിക്കാം. ഇതോടൊപ്പം ഇടുക്കി ജില്ലയുടെ പടിഞ്ഞാറ് ഭാഗത്തും , പാലക്കാട് ജില്ലയുടെ കിഴക്കും ഒറ്റപ്പെട്ട ശക്തമായ മഴയ്ക്ക് സാധ്യതയുണ്ട്. കോഴിക്കോട് ജില്ലയിലെ കിഴക്കൻ ഭാഗത്തും മലപ്പുറം ജില്ലയുടെ മലയോര മേഖലകളിലും ഒറ്റപ്പെട്ട ശക്തമായ മഴ ഇന്ന് രാത്രി പ്രതീക്ഷിക്കാം.  എറണാകുളം ആലപ്പുഴ തീരദേശങ്ങളിലും  ചാറ്റൽ മഴക്ക് സാധ്യത. കഴിഞ്ഞ ദിവസം  മലവെള്ളപ്പാച്ചിൽ ഉണ്ടായ മേഖലകളിൽ ഇന്നും മഴ തുടരുന്നതിനാൽ ആ പ്രദേശത്തുള്ളവർ ജാഗ്രത പാലിക്കുന്നത് നല്ലതാണ്. 

കൂടുതൽ കാലാവസ്ഥ പ്രവചനങ്ങൾക്ക് Metbeat Weather App ഇൻസ്റ്റാൾ ചെയ്യാം. Facebook Page Like ചെയ്ത് പിന്തുടരുക.  തൽസമയ കാലാവസ്ഥ വിഡിയോകൾ ലഭിക്കാൻ youtube ചാനൽ Subscribe ചെയ്ത് Bell Icon ക്ലിക്ക് ചെയ്താൽ അപ്പപ്പോൾ നോട്ടിഫിക്കേഷൻ ലഭിക്കും.