WEATHER NEWS AND ANALYSIS
ബംഗാൾ ഉൾക്കടലിൽ നാളെ തീവ്രന്യൂനമർദം, ജവാദ് കേരളത്തെ ബാധിക്കുമോ?
Dec. 1, 2021, 1:05 p.m.
Metbeat Weather Desk
തെക്കൻ ആൻഡമാൻ കടലിൽ കഴിഞ്ഞ ദിവസം രൂപപ്പെട്ട ന്യൂനമർദം ആൻഡമാൻ കടലിന്റെ മധ്യമേഖലയിലെത്തി. ഇത് പടിഞ്ഞാറ് വടക്കു പടിഞ്ഞാറ് ദിശയിൽ സഞ്ചരിക്കുകയാണ്. നാളെ തീവ്രന്യൂനമർദമായി ശക്തിപ്രാപിക്കും. മറ്റന്നാളോടെ വീണ്ടും ശക്തിപ്പെട്ട് ജവാദ് ചുഴലിക്കാറ്റാകാനും സാധ്യതയുണ്ട്. ബംഗാൾ ഉൾക്കടലിന്റെ മധ്യമേഖലയിൽ മറ്റന്നാൾ രാത്രിയോടെ ജവാദ് ചുഴലിക്കാറ്റ് രൂപം കൊള്ളുമെന്നാണ് ഇപ്പോഴത്തെ നിഗമനം. തുടർന്ന് ഇന്ത്യൻ തീരം ലക്ഷ്യമാക്കി നീങ്ങി ഡിസംബർ നാലോടു കൂടെ ഒഡിഷ തീരത്ത് തീരം തൊടുമെന്നാണ് പ്രതീക്ഷിക്കുന്നത്. അതേസമയം, ലക്ഷദ്വീപ് തീരത്തോട് ചേർന്ന് ചക്രവാതച്ചുഴിയും രൂപം കൊണ്ടിട്ടുണ്ട്. മഹാരാഷ്ട്രക്ക് സമാന്തരമായി ഇന്ന് രൂപപ്പെടുമെന്ന് പ്രതീക്ഷിച്ച ന്യൂനമർദം അറബിക്കടലിൽ ദുർബലമായ അവസ്ഥയിൽ ചക്രവാതച്ചുഴിയായി തുടരുകയാണ്്.
കേരളത്തിൽ ഒറ്റപ്പെട്ട മഴ സാധ്യത
മുകളിൽ പറഞ്ഞ അന്തരീക്ഷസ്ഥിതി മൂലം കേരളത്തിൽ ഒറ്റപ്പെട്ട പ്രദേശങ്ങളിൽ മഴയുണ്ടാകും. എങ്കിലും കഴിഞ്ഞ ദിവസങ്ങളെ അപേക്ഷിച്ച് ശക്തമായ മഴക്കുള്ള സാഹചര്യം ഒഴിഞ്ഞു. അറബിക്കടലിൽ രൂപം കൊള്ളുന്ന മേഘങ്ങൾ രാത്രിയും വൈകിട്ടും തീരദേശത്ത് ചാറ്റൽ മഴയോ ഇടത്തരം മഴയോ നൽകാം. കിഴക്കൻ മേഖലയിൽ വൈകിട്ടും രാത്രിയും ഇടിയോടെ മഴയും സാധാരണ തോതിൽ ്പ്രതീക്ഷിക്കാം.
ജവാദ് കേരളത്തെ ബാധിക്കില്ല
ബംഗാൾ ഉൾക്കടലിന്റെ മധ്യഭാഗത്ത് രൂപം കൊള്ളുന്ന ജവാദ് ചുഴലിക്കാറ്റ് കേരളത്തെ പ്രതികൂലമായി ബാധിക്കില്ലെന്നാണ് ഇതുവരെയുള്ള അന്തരീക്ഷസ്ഥിതി അവലോകനം ചെയ്യുമ്പോൾ മനസിലാക്കാനാകുന്നത്. ഈ സിസ്റ്റം അതിവേഗം ശക്തിപ്പെടുകയും പെട്ടെന്ന് തീരമണയുകയും ചെയ്യും. പുൾ എഫക്ടിന്റെ ഭാഗമായി സാധാരണ മഴ കേരളത്തിൽ ലഭിക്കാം എന്നൊഴിച്ചാൽ ഭീതിതമായ സാഹചര്യം സൃഷ്ടിക്കില്ല. കേരളത്തിലെ കാറ്റിന്റെ പാറ്റേൺ രാവിലെയും രാത്രിയും ശൈത്യകാലത്തിന്റെ അന്തരീക്ഷവും സൃഷ്ടിക്കും. പകൽ വെയിലും പ്രതീക്ഷിക്കാം.
Photo- Jiby Biju
ഞങ്ങളുടെ പോസ്റ്റുകള് മുടങ്ങാതെ ലഭിക്കാന് ഞങ്ങളുടെ ടെലഗ്രാം ഗ്രൂപ്പിലോ, ചാനലിലോ
അംഗങ്ങളാകുക. ഗ്രൂപ്പ് ലിങ്ക്, ചാനല് ലിങ്ക് . അപ്പപ്പോഴത്തെ അപ്ഡേഷന് ഫേസ്ബുക്ക് പേജ് ലൈക്ക് ചെയ്യുക
Comments