Nov. 28, 2021, 7:11 p.m.

Metbeat Weather Desk
ബംഗാൾ ഉൾക്കടലിൽ ആൻഡമാൻ കടലിലായി നാളെ ന്യൂനമർദം രൂപപ്പെട്ടേക്കും. രണ്ടു ദിവസമായി ശ്രീലങ്കക്കു സമീപവും കന്യാകുമാരി കടലിലുമായി സ്ഥിതി ചെയ്യുന്ന ചക്രവാതച്ചുഴിയും നാളെയോടെ തെക്കുകിഴക്കൻ അറബിക്കടലിൽ പ്രവേശിക്കും. തുടർന്ന് ഈ സിസ്റ്റം ശക്തിപ്പെട്ട് ന്യൂനമർദമായേക്കും. വടക്കു പടിഞ്ഞാറൻ ദിശയിൽ സഞ്ചരിച്ച് മധ്യ കിഴക്കൻ അറബിക്കടലിലെത്തും. ഈ ന്യൂനമർദത്തെ തുടർന്ന് പടിഞ്ഞാറൻ തീരത്ത് മഹാരാഷ്ട്ര, ഗോവ, ഗുജറാത്ത് മേഖലകളിൽ ശക്തമായ മഴക്ക് കാരണമായേക്കും. 

തമിഴ്‌നാട്ടിലും ആന്ധ്രയിലും പേമാരി
ബംഗാൾ ഉൾക്കടലിലെ ചക്രവാതച്ചുഴിയെ തുടർന്നുള്ള കനത്ത മഴ തമിഴ്‌നാട്ടിലെയും ആന്ധ്രയിലെയും തീരപ്രദേശങ്ങളിൽ പ്രളയസമാന മഴ നൽകുന്നുണ്ട്. കഴിഞ്ഞ ഏതാനും ദിവസമായി മെറ്റ്ബീറ്റ് വെതറിന്റെ അവലോകന റിപ്പോർട്ടുകളിൽ ഈ പ്രദേശങ്ങളിൽ അതിശക്തമായ മഴക്ക് സാധ്യതയുണ്ടെന്ന് പറഞ്ഞത് വായിച്ചുകാണുമല്ലോ. അതേ അന്തരീക്ഷസ്ഥിതി തുടരുന്നതിനാലാണ് കൂടുതൽ വിവരങ്ങൾ നൽകാതിരുന്നത്.
ആന്ധ്രാപ്രദേശിലും തമിഴ്‌നാട്ടിലും അടുത്ത 2 ദിവസം കൂടി മഴ ലഭിക്കും. തമിഴ്‌നാട്ടിലെ തഞ്ചാവൂർ, കാരൈക്കുടി, കോവിൽപട്ടി, തൂത്തൂക്കുടി, കന്യാകുമാരി ജില്ലകളിൽ മഴ കനക്കും. കന്യാകുമാരിയിലും നാഗർകോവിലിലും തൂത്തുകുടിയിലും പ്രളയ സമാന രീതിയിൽ മഴ ശക്തിപ്പെട്ടേക്കും. 

കേരളത്തിൽ മഴ സജീവമാകും
ചക്രവാതച്ചുഴി ബംഗാൾ ഉൾക്കടലിൽ നിന്ന് അറബിക്കടലിൽ എത്തുന്ന സാഹചര്യം അന്തരീക്ഷ പരിവർത്തനത്തിന് കാരണമാകും. തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി, എറണാകുളം, തൃശൂർ, കോഴിക്കോട്, കണ്ണൂർ, കാസർകോട്്, വയനാട് ജില്ലകളിൽ അടുത്ത 24 മണിക്കൂറിൽ ശക്തമായ മഴ സാധ്യതയുണ്ട്. അറബിക്കടലിൽ ശക്തമായ മഴയും കാറ്റുമുണ്ടാകും. മത്സ്യബന്ധനം സുരക്ഷിതമല്ല. ചൊവ്വാഴ്ചയും സമാന പാറ്റേണിൽ മഴ തുടരും. വടക്കൻ ജില്ലകളിൽ അതിശക്തമായ മഴ സാധ്യതയും നിലനിൽക്കുന്നതിനാൽ ജാഗ്രത പാലിക്കേണ്ടിവരും. ബുധനാഴ്ച മുതൽ മഴയുടെ ശക്തി കുറയുമെന്നാണ് ഇ്‌പ്പോഴത്തെ അന്തരീക്ഷസ്ഥിതി അവലോകനം സൂചിപ്പിക്കുന്നതെന്നും മെറ്റ്ബീറ്റ് വെതർ നിരീക്ഷിക്കുന്നു.
Photo- Sanesh A 

ഞങ്ങളുടെ പോസ്റ്റുകള്‍ മുടങ്ങാതെ ലഭിക്കാന്‍ ഞങ്ങളുടെ ടെലഗ്രാം ഗ്രൂപ്പിലോ, ചാനലിലോ
അംഗങ്ങളാകുക. ഗ്രൂപ്പ് ലിങ്ക്, ചാനല്‍ ലിങ്ക് . അപ്പപ്പോഴത്തെ അപ്‌ഡേഷന് ഫേസ്ബുക്ക് പേജ് ലൈക്ക് ചെയ്യുക