WEATHER NEWS AND ANALYSIS
ചക്രവാതച്ചുഴി അറബിക്കടലിലെത്തി, എല്ലാ ജില്ലകളിലും ഇടിയോടെ മഴക്ക് സാധ്യത
Oct. 23, 2021, 2:18 p.m.
Metbeat Weather Desk
കഴിഞ്ഞ ദിവസം (ഒക്ടോബര് 21) ലെ മെറ്റ്ബീറ്റ് വെതറിന്റെ അവലോകന റിപ്പോര്ട്ടില് സൂചിപ്പിച്ചതുപോലെ കന്യാകുമാരി കടലിലെ ചക്രവാതച്ചുഴിയുടെ ശേഷിപ്പുകള് തെക്കുകിഴക്കന് അറബിക്കടലിലെത്തി. ഇത് ലക്ഷദ്വീപിനു സമീപം നിലകൊള്ളുന്നു. സമുദ്രനിരപ്പില് നിന്ന് 1.5 കി.മി ഉയരത്തിലെ കാറ്റിനെ സ്വാധീനിക്കുന്നതിനാല് കേരളത്തില് ഇന്നു മുതല് തിങ്കള് വരെ പലയിടത്തും ഇടിയോടു കൂടെ ഒറ്റപ്പെട്ട ശക്തമായ മഴക്ക് സാധ്യതയുണ്ട്.
എല്ലാ ജില്ലകളിലും ഇടിയോടെ മഴ സാധ്യത
അടുത്ത 24 മണിക്കൂറില് എല്ലാ ജില്ലകളിലും മഴക്ക് സാധ്യത. വൈകിട്ട് മുതല് പുലര്ച്ചെ വരെ ഇടിയോടെ മഴക്കാണ് സാധ്യത. കണ്ണൂര്, പാലക്കാട്, എറണാകുളം, മലപ്പുറം, പത്തനംതിട്ട, കോട്ടയം, ഇടുക്കി ജില്ലകളില് ഒറ്റപ്പെട്ട ശക്തമായ മഴ പ്രതീക്ഷിക്കുന്നു. തിങ്കളാഴ്ച ഈ പ്രദേശങ്ങളില് ഒറ്റപ്പെട്ട ഇടത്തരം മഴയാണ് പ്രതീക്ഷിക്കുന്നത്. തിങ്കളാഴ്ച രാത്രി വൈകി മുതല് ചൊവ്വാഴ്ച രാവിലെ വരെ കോഴിക്കോട്, തിരുവനന്തപുരം, കൊല്ലം, കോട്ടയം, പത്തനംതിട്ട, ഇടുക്കി, മലപ്പുറം, പാലക്കാട് ജില്ലകളില് ഇടിയോടെ ശക്തമായ മഴ പ്രതീക്ഷിക്കാം. ബുധന്, വ്യാഴം ദിവസങ്ങളില് ദുര്ബലമെങ്കിലും പലയിടത്തും തുലാവര്ഷത്തിന്റെ ഭാഗമായ മഴ ലഭിക്കും.
ദക്ഷിണേന്ത്യയിലും കാലവര്ഷം വിടവാങ്ങല് തുടങ്ങി
ദക്ഷിണേന്ത്യന് സംസ്ഥാനങ്ങളായ കര്ണാടക, തെലങ്കാന, ആന്ധ്രാപ്രദേശ് എന്നിവിടങ്ങളിലെ വടക്കന് മേഖലകളില് നിന്ന് കാലവര്ഷം വിടവാങ്ങിയതായി കേന്ദ്ര കാലാവസ്ഥാ വകുപ്പ് അറിയിച്ചു. തെക്കന് കര്ണാടകയിലും തെക്കന് ആന്ധ്രാപ്രദേശിലും കേരളം, തമിഴ്നാട് പൂര്ണമായും ഇനി കാലവര്ഷം വിടവാങ്ങാനുണ്ട്. ഇത് ഈ മാസം 26 നകം പൂര്ത്തിയാകുമെന്നാണ് കേന്ദ്രകാലാവസ്ഥാ വകുപ്പിന്റെ നിഗമനം. സാധാരണ ഒക്ടോബര് 15 ന് കര്ണാടകയുടെ ഭൂരിഭാഗം പ്രദേശത്തു നിന്നും കാലവര്ഷം വിടവാങ്ങാറുണ്ട്. എന്നാല് 23 ആയിട്ടും സംസ്ഥാനത്തിന്റെ പകുതി പ്രദേശത്ത് മാത്രമേ കാലവര്ഷം വിടവാങ്ങിയിട്ടുള്ളൂ. അതിനിടെ, കേരളത്തില് ഒക്ടോബര് ഒന്നു മുതല് 23 വരെ 117 ശതമാനം അധിക മഴ റിപ്പോര്ട്ട് ചെയ്തു. 233.4 മില്ലി മീറ്റര് മഴയാണ് തുലാവര്ഷത്തിന്റെ ഭാഗമായി ഇതുവരെ സാധാരണയായി ലഭിക്കേണ്ടത്. എന്നാല് 506.5 മില്ലി മീറ്റര് മഴ ഇതുവരെ റിപ്പോര്ട്ട് ചെയ്തു.
കൂടുതല് വിവരങ്ങള്ക്ക് ഞങ്ങളുടെ ഫേസ്ബുക്ക് പേജ് ലൈക്ക് ചെയ്ത് പിന്തുടരുക, മെറ്റ്ബീറ്റിന്റെ മൊബൈല് ആപ്പ്, യൂട്യൂബ് ചാനലുകളും പിന്തുടരുക. Metbeat Weather ആപ്പ് ഇന്സ്റ്റാള് ചെയ്യാന് ഈ ലിങ്ക് ക്ലിക്ക് ചെയ്യുകയോ ഗൂഗിള് പ്ലേസ്റ്റോറില് മെറ്റ്ബീറ്റ് വെതര് എന്ന് സെര്ച്ച് ചെയ്യുകയോ ചെയ്യാം
Comments