എന്താണ് ചക്രവാതച്ചുഴി, നാളെ മഴ ലഭിക്കുമോ?
Metbeat Weather Team
സെക്ലോണിക് സര്‍കുലേഷന്‍ എന്നതിന്റെ മലയാള വാക്കാണ് ചക്രവാതച്ചുഴി. സൈക്ലോണ്‍ എന്നാല്‍ ചുഴലിക്കാറ്റാണ്. എന്നാല്‍ സൈക്ലോണിക് സര്‍ക്കുലേഷന്‍ അഥവാ ചക്രവാതച്ചുഴിയെ ചുഴലിക്കാറ്റാണ് എന്ന് തെറ്റിദ്ധരിച്ച് പേടിക്കേണ്ട. ഏറ്റവും ലളിതമായി പറഞ്ഞാല്‍ കാറ്റിന്റെ ചുഴി എന്നേ ഇതുകൊണ്ട് അര്‍ഥമാക്കേണ്ടതുള്ളൂ. അന്തരീക്ഷത്തില്‍ കാറ്റ് വിവിധ ദിശയിലാണ് സഞ്ചരിക്കുക. മര്‍ദവ്യതിയാനം മൂലം കാറ്റ് ചക്രംപോലെ കറങ്ങാറുണ്ട്. ഇതാണ് ചക്രവാതച്ചുഴി. ഒരു മര്‍ദം കുറഞ്ഞ പ്രദേശത്ത് കാറ്റ് ചുറ്റും കറങ്ങും. പുഴയില്‍ ചുഴി കണ്ടിട്ടില്ലേ അതുപോലെ. ഭൂമിയുടെ ദക്ഷിണാര്‍ധ ഗോളത്തില്‍ (ഉദാ- ആസ്‌ത്രേലിയ) ഈ കറക്കം ഘടികാര ദിശയിലും ഉത്തരാര്‍ധ ഗോളത്തില്‍ (ഇന്ത്യ, യൂറോപ് തുടങ്ങിയ മേഖല) എതിര്‍ഘടികാര ദിശയിലും ആകും. ഭൂമിയുടെ കറക്കം മൂലമുണ്ടാകുന്ന കൊറിയോലിസ് ബലത്തെ തുടര്‍ന്നാണ് ഈ കറക്കത്തിന് രണ്ട് അര്‍ധ ഗോളങ്ങളില്‍ രണ്ട് ദിശകള്‍. വസ്തുവിന്റെ മാസ് (പിണ്ഡം), ആംഗുലാര്‍ വെലോസിറ്റി (കോണിക പ്രവേഗം), ടാന്‍ജന്‍ഷ്യല്‍ വെലോസി്റ്റി (സ്പര്‍ശന രേഖ സംബന്ധിച്ച പ്രവേഗം) എന്നിവ ഉണ്ടെങ്കില്‍ സമവാക്യം ഉപയോഗിച്ച് ഈ ബലം എത്ര എന്ന് കണ്ടെത്താം.
ചുഴലിക്കാറ്റുമായുള്ള ബന്ധം?
ചുഴലിക്കാറ്റ് രൂപപ്പെടുന്നതിന്റെ ആദ്യ സ്റ്റെപ് ചക്രവാതചുഴി രൂപപ്പെടലാണ്. എന്നാല്‍ എല്ലാ ചക്രവാതച്ചുഴിയും ചുഴലിക്കാറ്റ് പോയിട്ട് ന്യൂനമര്‍ദം പോലും ആകാറില്ല. ചക്രവാതച്ചുഴി ശക്തിപ്പെട്ട് ന്യൂനമര്‍ദം ആകുന്നു, ന്യൂനമര്‍ദം ശക്തിപ്പെട്ട് വെല്‍ മാര്‍ക്ഡ് ലോ പ്രഷര്‍ ആകുന്നു, വീണ്ടും ശക്തിപ്പെട്ട് ഡി്പ്രഷന്‍ അഥവാ തീവ്രന്യൂനമര്‍ദം ആകുന്നു. വീണ്ടും ശക്തിപ്പെട്ട് ഡീപ് ഡിപ്രഷന്‍ അഥവാ അതിതീവ്ര ന്യൂനമര്‍ദം ആകുന്നു. പിന്നെയും ശക്തിപ്പെട്ടാലേ ചുഴലിക്കാറ്റാകൂ.. ഈ ചക്രവാതച്ചുഴി ന്യൂനമര്‍ദമാകാനോ ചുഴലിക്കാറ്റാകാനോ സാധ്യതയില്ല.
മഴ നല്‍കുമോ, എത്രത്തോളം?
ചക്രവാതച്ചുഴികള്‍ എപ്പോഴും മഴ നല്‍കും എന്ന് പറയാനാകില്ല. കാറ്റിന്റെ കറക്കത്തിന്റെ ശക്തി, വ്യാപ്തി, മേഖല, മേഘരൂപീകരണ സാധ്യത, അന്തരീക്ഷസ്ഥിതി, ഈര്‍പ്പ തോത് എന്നിവ മഴ ഉണ്ടാകുമോ ഇല്ലെയോ എന്ന് നിശ്ചയിക്കുന്നു. ഇപ്പോള്‍ തമിഴ്‌നാട് തീരത്തുണ്ടായ ചക്രവാതച്ചുഴി നാളെയും മറ്റന്നാളും മഴ നല്‍കുമെന്ന് മെറ്റ്ബീറ്റ് വെതറും വെതര്‍മാന്‍ കേരളയും കഴിഞ്ഞ ദിവസം പറഞ്ഞത് ഓര്‍ക്കുമല്ലോ. അതിന്റെ കാരണം എന്താണ് എന്ന് നോക്കാം.
ഈ ചക്രവാത ചുഴി മഴ നല്‍കുന്നത് എങ്ങനെ?
ഇപ്പോള്‍ രൂപപ്പെട്ട ചക്രവാത ചുഴി തെക്കന്‍ തമിഴ്‌നാട് തീരത്തു നിന്ന് സമുദ്രനിരപ്പില്‍ നിന്ന് ഏകദേശം 1.5 കി.മി ഉയരത്തിലാണ് സ്ഥിതി ചെയ്യുന്നത്. ഇതിന്റെ ചുഴിക്കറക്കം തെക്കന്‍ തമിഴ്‌നാട്, തെക്കന്‍ കേരളം എന്നിവക്കു മുകളിലൂടെയാകും. ഇത് അടുത്ത 36 മണിക്കൂര്‍ അവിടെ തുടരാനാണ് സാധ്യത. ബംഗാള്‍ ഉള്‍ക്കടിലെ ഈര്‍പ്പത്തെ ഈ ചക്രവാതച്ചുഴി തമിഴ്‌നാട്ടിലേക്കും കേരളത്തിലേക്കും പ്രവഹിപ്പിക്കും. കേരളത്തിനു മുകളില്‍ ഈ കാറ്റിന് കേരളം കടന്ന് മുന്നോട്ടുപോകാനാകില്ല. ദുര്‍ബലമായ പടിഞ്ഞാറന്‍ കാറ്റിന്റെ തടസമുണ്ടാകും. കാറ്റിന്റെ ഗതിമുറിവ് ഇവിടെ സംഭവിക്കാം. പടിഞ്ഞാറന്‍ കാറ്റിന്റെ സാന്നിധ്യം ഉണ്ടെങ്കില്‍ അഭിസരണവും നടക്കാം. ഏതായാലും ഇടിവെട്ടി മഴ പെയ്യും. ഉച്ചയ്ക്ക് ശേഷം. നാളെ കൂടുതല്‍ പ്രദേശങ്ങളിലേക്ക് മഴ വ്യാപിക്കും.
Photo- representative image
കൂടുതല്‍ വിവരങ്ങള്‍ക്ക് ഞങ്ങളുടെ ഫേസ്ബുക്ക് പേജ് ലൈക്ക് ചെയ്ത് പിന്തുടരുക, മെറ്റ്ബീറ്റിന്റെ മൊബൈല്‍ ആപ്പ്, യൂട്യൂബ് ചാനലുകളും പിന്തുടരുക. Metbeat Weather ആപ്പ് ഇന്‍സ്റ്റാള്‍ ചെയ്യാന്‍ ഈ ലിങ്ക് ക്ലിക്ക് ചെയ്യുകയോ ഗൂഗിള്‍ പ്ലേസ്റ്റോറില്‍ മെറ്റ്ബീറ്റ് വെതര്‍ എന്ന് സെര്‍ച്ച് ചെയ്യുകയോ ചെയ്യാം.
Comments