കാലവര്ഷം വിടവാങ്ങുന്നു, ഇനി തുലാവര്ഷത്തിലേക്ക്, ഒറ്റപ്പെട്ടയിടങ്ങളില് ശക്തമായ മഴ
Metbeat Weather Desk
കേരളത്തില് കാലവര്ഷ മഴ കുറയുന്നു. കഴിഞ്ഞ ദിവസങ്ങളിലെ അവലോകന റിപ്പോര്ട്ടുകളില് സൂചിപ്പിച്ചതുപ്രകാരം ഇന്നലെയും ഇന്നും സംസ്ഥാനത്ത് മഴ കുറഞ്ഞു. ഒറ്റപ്പെട്ട പ്രദേശങ്ങളില് മാത്രമാണ് മഴ ലഭിച്ചത്. നാളെ (ഒക്ടോബര് 20) മുതല് വെള്ളി (ഒക്ടോബര് 22) വരെ സംസ്ഥാനത്ത് തുലാവര്ഷത്തിനു മുന്നോടിയായി ഇടിയോടുകൂടെയുള്ള ഒറ്റപ്പെട്ട മഴയാണ് പ്രതീക്ഷിക്കുന്നത്. തമിഴ്നാടിനും ശ്രീലങ്കയ്ക്കും ഇടയിലെ കാറ്റിന്റെ ചുഴി കാരണം വ്യാഴം, വെള്ളി കിഴക്കന് മേഖലയില് നിന്ന് കൂടുതല് പ്രദേശത്ത് ഇടിയോടെ മഴ ലഭിക്കും. എന്നാല് തീവ്രമാകില്ല. പ്രളയകാരണമാകുന്ന രീതിയില് കഴിഞ്ഞ ദിവസത്തേതിനു സമാനമായ മഴ അതിശക്തമായി തുടരില്ലെന്നാണ് മെറ്റ്ബീറ്റ് വെതറിന്റെ നിരീക്ഷണം. ഇന്നത്തെ പോലെ നാളെ പകലും വെയില് പ്രതീക്ഷിക്കാം. ഉച്ചയ്ക്ക് ശേഷം കിഴക്കന് മേഖലയിലാണ് ഒറ്റപ്പെട്ട മഴ പ്രതീക്ഷിക്കുന്നത്. ശനി, ഞായര് ദിവസങ്ങളിലാണ് കൂടുതല് ശക്തമായ മഴ പ്രതീക്ഷിക്കാം. തെക്കന് കേരളത്തില് ഒറ്റപ്പെട്ട പ്രദേശത്ത് പ്രത്യേകിച്ച് കിഴക്കന് മേഖലയിലാകും ഈ ദിവസങ്ങളില് മഴ ഉണ്ടാകുക. ഈ സീസണില് സാധാരണ ലഭിക്കുന്ന മഴയല്ലാതെ പ്രളയഭീതിക്ക് കാരണമായ അതിശക്തമോ തീവ്രമോ ആയ മഴ ശനി, ഞായര് ദിവസങ്ങളിലും പ്രതീക്ഷിക്കുന്നില്ലെന്നാണ് ഞങ്ങളുടെ നീരീക്ഷകരുടെ നിഗമനം. 24 മണിക്കൂറില് 10 മുതല് 15 സെ.മി വരെ മഴയാണ് കിഴക്കന് മേഖലയില് പ്രതീക്ഷിക്കുന്നത്. ഇത് അപകടകരമാകുന്ന മഴയല്ല. വ്യാഴം, വെള്ളി മഴ കുറച്ചുകൂടി നീണ്ടു നിന്നേക്കും. സര്ക്കുലേഷന്റെ സാന്നിധ്യം മൂലമാണിത്.
നിലവിലെ അന്തരീക്ഷസ്ഥിതി
തെക്കുപടിഞ്ഞാറന് മണ്സൂണ് (കാലവര്ഷം) പിന്വാങ്ങാന് അനുകൂല അന്തരീക്ഷസ്ഥിതിയാണ് തെക്കേ ഇന്ത്യയിലുള്ളത്. വടക്കുകിഴക്കന് മണ്സൂണ് (തുലാവര്ഷം) തുടങ്ങാനും സമയമായി. തുലാവര്ഷം തുടങ്ങുന്നതിന്റെ ഭാഗമായി സംഭവിക്കുന്ന അന്തരീക്ഷ പരിവര്ത്തനമാണ് ഇപ്പോള് നടക്കുന്നത്. ഇതിന്റെ ഭാഗമായി നാളെ (ബുധന്) കാറ്റിന്റെ ഗതിയില് ചില മാറ്റം ഉണ്ടാകാം. ഇതുമൂലം കാറ്റിന്റെ ഗതിമുറിവ് തെക്കന് തമിഴ്നാട്ടില് നാളെ സംഭവിക്കാം. ഇത് ആ മേഖലയില് ഇടിയോടെ മഴ ഉണ്ടാക്കും. തമിഴ്നാടിനോട് അതിര്ത്തി പങ്കിടുന്ന മേഖലകളിലും ഇതിന്റെ ഭാഗമായി ഇടിയും മഴയും ഉണ്ടാകും. എന്നാല് കേരളത്തിലേക്ക് ഈ അന്തരീക്ഷസ്ഥിതി വ്യാപിക്കാനുള്ള സാധ്യത കുറവാണ്. കിഴക്കന് അതിര്ത്തിയിലെ വനമേഖലകളില് ഇതിന്റെ ഭാഗമായ ഒറ്റപ്പെട്ട ശക്തമായ മഴ ലഭിക്കും. കിഴക്കന് മേഖലയില് ശക്തമായ ഇടിമിന്നലും പ്രതീക്ഷിക്കണം. സാധാരണ പെയ്യുന്ന മഴയില് കവിഞ്ഞ് ഈ മേഖലയില് അതിശക്തമോ തീവ്രമോ ആയ മഴക്ക് സാധ്യത കുറവാണ്. കേരളത്തിന്റെ തീരദേശം, ഇടനാട് പ്രദേശങ്ങളില് നാളെ പകല് വെയിലും ഉച്ചയ്ക്ക് ശേഷം ഇടനാട്ടില് ഒറ്റപ്പെട്ട സാധാരണ മഴയും ലഭിക്കാം. ശ്രീലങ്കയ്ക്കും തമിഴ്നാട് തീരത്തിനും സമീപത്തായി കടലിനു മുകളില് രൂപപ്പെട്ട കാറ്റിന്റെ ചുഴി തമിഴ്നാട്ടില് കിഴക്കന് കാറ്റ് ശക്തമാകുകയും മഴക്ക് കാരണമാകുകയും ചെയ്യും. അതിശക്തമായ മഴ പ്രതീക്ഷിക്കേണ്ടത് തമിഴ്നാട്ടിലെ തൂത്തുക്കുടി, തിരുനെല്വേലി മേഖലകളിലാണ്. തിരുവനന്തപുരം ജില്ലയിലെ കിഴക്കന് മലയോരത്തും ഒറ്റപ്പെട്ട ശക്തമായ മഴ ലഭിക്കാം.
തുലാവര്ഷം 24 ന് എത്താം
കാലവര്ഷം വിടവാങ്ങാന് ഒരുങ്ങുകയാണ്. കേരളത്തില് നിന്നാണ് കാലവര്ഷം അവസാനമായി വിടവാങ്ങേണ്ടത്. കാവവര്ഷം വിടവാങ്ങലിന്റെ അടുത്ത സ്റ്റോപ്പോടെ കേരളത്തില് നിന്ന് പൂര്ണമായി കാലവര്ഷം വിടവാങ്ങുമെന്നാണ് പ്രതീക്ഷിക്കുന്നത്. ഇക്കാര്യത്തില് ഔദ്യോഗിക സ്ഥിരീകരണം നല്കേണ്ടത് കേന്ദ്രകാലാവസ്ഥാ വകുപ്പാണ്. തുലാവര്ഷം തുടങ്ങാനുള്ള അന്തരീക്ഷ പരിവര്ത്തനം ഇപ്പോള് തന്നെ ഏറെക്കുറെ ദൃശ്യമാണ്. ഇത് അടുത്ത ദിവസങ്ങളില് കൂടുതല് സജീവമാകും. 24 ന് ശേഷം ഏതു സമയത്തും തുലാവര്ഷം എത്താം. തുലാവര്ഷം എന്ന് എത്തിയെന്ന് സ്ഥിരീകരിക്കേണ്ടത് ഔദ്യോഗിക ഏജന്സിയായ കാലാവസ്ഥാ വകുപ്പാണ്.
Photo- Jadav Chand
കൂടുതല് വിവരങ്ങള്ക്ക് ഞങ്ങളുടെ ഫേസ്ബുക്ക് പേജ് ലൈക്ക് ചെയ്ത് പിന്തുടരുക, മെറ്റ്ബീറ്റിന്റെ മൊബൈല് ആപ്പ്, യൂട്യൂബ് ചാനലുകളും പിന്തുടരുക. Metbeat Weather ആപ്പ് ഇന്സ്റ്റാള് ചെയ്യാന് ഈ ലിങ്ക് ക്ലിക്ക് ചെയ്യുകയോ ഗൂഗിള് പ്ലേസ്റ്റോറില് മെറ്റ്ബീറ്റ് വെതര് എന്ന് സെര്ച്ച് ചെയ്യുകയോ ചെയ്യാം.
Comments