വടക്കന്‍ കേരളത്തില്‍ മൂന്നിടത്ത് തീവ്രമഴ, രണ്ടു കുട്ടികള്‍ ഉള്‍പ്പെടെ 4 മരണം, മഴ തുടരും
Metbeat Weather Team
കേരളത്തില്‍ കഴിഞ്ഞ 24 മണിക്കൂറില്‍ തീവ്രമഴ ലഭിച്ചു. കരിപ്പൂരിലും മണ്ണാര്‍ക്കാട്ടും കോഴിക്കോട്ടുമാണ് ഇന്ന് രാവിലെ 8.30 ന് അവസാനിച്ച 24 മണിക്കൂറില്‍ തീവ്രമഴ രേഖപ്പെടുത്തിയത്. കരിപ്പൂര്‍ വിമാനത്താവളത്തില്‍ 25.4 സെ.മി മഴയും മണ്ണാര്‍ക്കാട്ട് 23.8 ഉം കോഴിക്കോട് നഗരത്തില്‍ 21.6 സെ.മി മഴയുമാണ് രേഖപ്പെടുത്തിയത്. 24 മണിക്കൂറില്‍ 20 സെ.മി മഴ ലഭിച്ചാല്‍ തീവ്രമഴ എന്നാണ് പറയുക. മലപ്പുറം ആനക്കയത്തും 19 സെ.മി മഴ ലഭിച്ചു. കൊയിലാണ്ടി 17, വടകര 17 കണ്ണൂര്‍ 16, തലശ്ശേരി 13, നിലമ്പൂര്‍ 11, അങ്ങാടിപ്പുറം 10, പെരിന്തല്‍മണ്ണ 10, പാലക്കാട് പറമ്പിക്കുളം 13, തൃത്താല 11, പട്ടാമ്പി 17, വടക്കാഞ്ചേരി 13, പുനലൂര്‍ 13തൃശൂരിലെ പെരിങ്ങല്‍ക്കുത്ത് 17, വയന്തല 11, കാസര്‍കോട് പിലിക്കോട് 12, കണ്ണൂര്‍ ചെറുതാഴം 11, മട്ടന്നൂര്‍ 12, തൊടുപുഴ 12, എറണാകുളം കീരംപാറ 12 സെ.മി മഴ രേഖപ്പെടുത്തി. കേന്ദ്രഭരണ പ്രദേശമായ മാഹിയിലും 15 സെ.മി മഴ രേഖപ്പെടുത്തി.
കുട്ടികള്‍ ഉള്‍പ്പെടെ 4 മരണം
കേരളത്തില്‍ മഴക്കെടുതികളില്‍ കുട്ടികളും മാധ്യമപ്രവര്‍ത്തകനും ഉള്‍പ്പെടെ 4 പേര്‍ മരിച്ചു. തീവ്ര മഴ രേഖപ്പെടുത്തിയ മലപ്പുറം കരിപ്പൂരില്‍ വീട് തകര്‍ന്ന് വീണ് ഉറങ്ങിക്കിടക്കുകയായിരുന്ന കുട്ടികളും കൊല്ലത്ത് വയോധികനും അടുരില്‍ മാധ്യമപ്രവര്‍ത്തകനും മരിച്ചു. കരിപ്പൂരില്‍ വീടിന്റെ പിന്‍ഭാഗത്തെ ചെങ്കലിന്റെ മതില്‍ കുട്ടികള്‍ ഉറങ്ങിക്കിടക്കുകയായിരുന്ന മുറിയിലേക്ക് ഇടിഞ്ഞു വീഴുകയായിരുന്നു. മാതാക്കുളം അബൂബക്കര്‍ സിദ്ദീഖിന്റെ മക്കളായ ലിയാന ഫാത്തിമ (8), ലുബാന ഫാത്തിമ (7 മാസം) എന്നിവരാണ് മരിച്ചത്. കൊല്ലം തെന്‍മല നാഗമലയില്‍ തോട്ടില്‍ വീണ് നാഗമല സ്വദേശി ഗോവിന്ദ രാജ് (65) ആണ് മരിച്ചത്. റോഡ് കരകവിഞ്ഞ് ഒഴുകിയതോടെ റോഡും തോടും തിരിച്ചറിയാനാകെ വീട്ടിലേക്ക് മടങ്ങുമ്പോള്‍ വീഴുകയായിരുന്നു. അടൂരില്‍ ഇന്നലെ രാത്രി ഓടിക്കൊണ്ടിരിന്ന ബൈക്കിന് മുകളിലേക്ക് മരം വീണ് ജന്മഭൂമി അടൂര്‍ ലേഖകന്‍ പി.ടി രാധാകൃഷ്ണ കുറുപ്പാണ് മരിച്ചത്. അടൂര്‍ ചെന്നമ്പള്ളി ജംഗ്ഷന് സമീപം ഇന്നലെ രാത്രി എട്ടുമണിയോടെയാണ് അപകടം.
കനത്ത മഴ തുടരും, വടക്കന്‍ ജില്ലകളില്‍ കൂടുതല്‍ ജാഗ്രത
പസഫിക് സമുദ്രത്തിലെ ചുഴലിക്കാറ്റുകളും ബംഗാള്‍ ഉള്‍ക്കടലിലെ ന്യൂനമര്‍ദ രൂപീകരണവും അറബിക്കടലിലെ ന്യൂനമര്‍ദ രൂപീകരണ സാധ്യവും മൂലം കേരളത്തില്‍ കനത്ത മഴ വിവിധ പ്രദേശങ്ങളില്‍ തുടരുമെന്ന് മെറ്റ്ബീറ്റ് വെതറിലെ നിരീക്ഷകര്‍ പറഞ്ഞു. നാളെ (ബുധന്‍) രാത്രി വരെ കോഴിക്കോട്, എറണാകുളം, തൃശൂര്‍, മലപ്പുറം, ഇടുക്കി, പാലക്കാട് ജില്ലകളില്‍ അതിശക്തമായ മഴയും കണ്ണൂര്‍, കാസര്‍കോട്, ആലപ്പുഴ, കോട്ടയം, പത്തനംതിട്ട, വയനാട് ജില്ലകളില്‍ ശക്തമായ മഴയും തിരുവനന്തപുരം, കൊല്ലം ജില്ലകളില്‍ ഇടത്തരം മഴയും പ്രതീക്ഷിക്കാം. പസഫിക് സമുദ്രത്തിലെ ചൈനാകടലിലുള്ള ചുഴലിക്കാറ്റ് ദുര്‍ബലമായി കരകയറുന്നതോടെ കേരളത്തിലും മഴയുടെ ശക്തി കുറയും. ബുധനാഴ്ച രാത്രിവൈകിയോ വ്യാഴാഴ്ചയോ മഴയുടെ ശക്തി കുറയുമെന്ന് മെറ്റ്ബീറ്റ് വെതര്‍ സ്ഥാപകന്‍ വെതര്‍മാന്‍ കേരള പറഞ്ഞു. എന്നാല്‍ വെള്ളിയാഴ്ചയോടെ വീണ്ടും തെക്കന്‍ ജില്ലകളില്‍ (എറണാകുളം മുതല്‍ തിരുവനന്തപുരം വരെ ) വീണ്ടും ശക്തമായ മഴ ബംഗാള്‍ ഉള്‍ക്കടലിലെ ന്യൂനമര്‍ദത്തിന്റെ ഭാഗമായി ലഭിക്കും. അറബിക്കടലിലെ ന്യൂനമര്‍ദം കേരളത്തില്‍ തെക്കന്‍ ജില്ലകളെ അപേക്ഷിച്ച് വടക്കന്‍ ജില്ലകളെയാണ് ബാധിക്കാന്‍ ഇടയാക്കുക. ഇക്കാര്യത്തില്‍ ഇപ്പോഴും വ്യക്തത കുറവുണ്ടെന്ന് അദ്ദേഹം വ്യക്തമാക്കി. വെള്ളി മുതല്‍ ഞായര്‍ വരെയുള്ള ദിവസങ്ങളില്‍ ന്യൂനമര്‍ദ സാധ്യത മൂലം കേരളത്തില്‍ കൂടുതല്‍ ജാഗ്രത അനിവാര്യമാണ്.
ജാഗ്രത പാലിക്കണം
മഴമൂലമുള്ള ദുരന്തങ്ങള്‍ ഒഴിവാക്കാന്‍ ജനങ്ങള്‍ വിവിധ സര്‍ക്കാര്‍ ഏജന്‍സികളും മറ്റും നല്‍കുന്ന മുന്നറിയിപ്പുകള്‍ പാലിക്കണമെന്ന് മെറ്റ്ബീറ്റ് വെതര്‍ അഭ്യര്‍ഥിക്കുന്നു. അടുത്ത 3 ദിവസത്തെ കാലാവസ്ഥാ മുന്നറിയിപ്പുകളും സുരക്ഷാ നിര്‍ദേശങ്ങളും പാലിക്കുന്നുവെന്ന് ഓരോരുത്തരും ഉറപ്പുവരുത്തണം. പ്രാദേശിക വെള്ളക്കെട്ടുകള്‍, താഴ്ന്ന പ്രദേശങ്ങളില്‍ വെള്ളം കയറല്‍ എന്നിവ ഉണ്ടാകും. കുട്ടികളെ ഒരു കാരണവശാലും വെള്ളം കെട്ടിനില്‍ക്കുന്നിടങ്ങളിലേക്ക് പോകാന്‍ അനുവദിക്കരുത്. തോടുകളും പുഴയും കരകവുയുന്നതിനാല്‍ ഇതുവഴി റോഡിലൂടെയുള്ള യാത്ര സുരക്ഷിതമല്ല. കിഴക്കന്‍ മലയോരങ്ങളില്‍ മണ്ണിടിച്ചിലും ഉരുള്‍പൊട്ടല്‍ ഭീഷണിയും ഉള്ളതിനാല്‍ വിനോദ സഞ്ചാരത്തിനായി ഇത്തരം പ്രദേശങ്ങളിലേക്ക് പോകരുത്. കടലില്‍ പോകുന്നവര്‍ കാലാവസ്ഥാ വകുപ്പിന്റെ മുന്നറിയിപ്പ് പാലിക്കണം. ജില്ലാ, പ്രാദേശിക ഭരണകൂടങ്ങള്‍, സിവില്‍ ഡിഫന്‍സ്, പൊലിസ്, ഫയര്‍ഫോഴ്‌സ് തുടങ്ങിയ വകുപ്പുകളുടെ നിര്‍ദേശം പിന്തുടരുക. കാലാവസ്ഥാ പ്രവചനവും അവലോകനത്തിനും സര്‍ക്കാര്‍, സ്വകാര്യ കാലാവസ്ഥാ ഏജന്‍സികള്‍, വിദഗ്ധര്‍, നിരീക്ഷകര്‍ എന്നിവരെ മാത്രം പിന്തുടരുക. വ്യാജ വാര്‍ത്തകളും മറ്റും സമൂഹ മാധ്യമങ്ങളില്‍ ഉള്ളതിനാല്‍ ഇവയെ അവഗണിക്കുക.
Photo Courtesy- Fb Page TV Ibrahim MLA
കൂടുതല്‍ വിവരങ്ങള്‍ക്ക് ഞങ്ങളുടെ ഫേസ്ബുക്ക് പേജ് ലൈക്ക് ചെയ്ത് പിന്തുടരുക, മെറ്റ്ബീറ്റിന്റെ മൊബൈല്‍ ആപ്പ്, യൂട്യൂബ് ചാനലുകളും പിന്തുടരുക. Metbeat Weather ആപ്പ് ഇന്‍സ്റ്റാള്‍ ചെയ്യാന്‍ ഈ ലിങ്ക് ക്ലിക്ക് ചെയ്യുകയോ ഗൂഗിള്‍ പ്ലേസ്റ്റോറില്‍ മെറ്റ്ബീറ്റ് വെതര്‍ എന്ന് സെര്‍ച്ച് ചെയ്യുകയോ ചെയ്യാം
Comments