WEATHER NEWS AND ANALYSIS
ന്യൂനമര്ദം ശക്തിപ്പെട്ട് തീവ്ര ന്യൂനമര്ദമായി; ചൈനാ കടലിലെ ചന്തു ചുഴലിക്കാറ്റ് ചതിക്കില്ല
Sept. 12, 2021, 9:30 p.m.
Metbeat Weather Desk
ബംഗാള് ഉള്ക്കടലില് രൂപപ്പെട്ട ന്യൂനമര്ദം ശക്തിപ്പെട്ട് തീവ്രന്യൂനമര്ദമായി . ഇന്ന് രാവിലെ വെല്മാര്ക്ഡ് ലോ പ്രഷര് ആയി മാറിയ ന്യൂനമര്ദ്ദം രാത്രിയോടെ തീവ്ര ന്യൂനമര്ദം (ഡിപ്രഷന്) ആകുകയായിരുന്നു. ഒരാഴ്ചയായി മെറ്റ്ബീറ്റ് വെതര് സൂചിപ്പിക്കുന്നത് പോലെ ഇന്ന് (ഞായര്) കേരളത്തില് പലയിടത്തും ഒറ്റപ്പെട്ട ഇടത്തരം മഴ ലഭിച്ചു. ന്യൂനമര്ദം കൂടുതല് ശക്തിപ്പെട്ട സാഹചര്യത്തില് കേരളത്തില് ഇടവേളകളോടെ മഴ ചില പ്രദേശങ്ങളില് കനത്തു പെയ്യും. ഏറെ നേരം മഴ നീണ്ടുനില്ക്കില്ല. കേരള തീരത്ത് മേഘരൂപീകരണം താരതമ്യേന കുറവായതാണ് കാരണം.
കിഴക്കന് ചൈനാ കടലില് ചന്തു ചുഴലിക്കാറ്റ്
ബംഗാള് ഉള്ക്കടലില് ന്യൂനമര്ദം ശക്തിപ്പെടുന്നതിനൊപ്പം കിഴക്കന് ചൈനാകടലില് തായ്വാനു വടക്കു കിഴക്കായി രൂപപ്പെട്ട ചന്തു ചുഴലിക്കാറ്റ് രാവിലെ നേരിയതോതില് കേരളതീരത്തെ കാറ്റിനെ ആകര്ഷിച്ചെങ്കിലും ഇപ്പോള് സ്വാധീനമില്ല. ഈ സാഹചര്യം കേരളത്തില് മഴയില് കുറവ് വരുത്തും. ചന്തു ചുഴലിക്കാറ്റിന് നിലവില് 175 കി.മി വേഗതയുണ്ട്. ചൈനയിലെ ഷാങ്ഹായ് തീരം ലക്ഷ്യമാക്കി നീങ്ങുകയാണ്. നാളെ 220 കി.മി വരെ വേഗം പ്രാപിച്ച് തീരംതൊടാനാണ് സാധ്യത. ഈ ചുഴലിക്കാറ്റ് പ്രതീക്ഷിച്ച പാതയില് നീങ്ങുന്നതിനാല് ഇന് കേരളത്തെ ഒരുതരത്തിലും സ്വാധീനിക്കാന് ഇടയില്ല.
ന്യൂനമര്ദം തീരത്തോടടുക്കുന്നു
തീവ്രന്യൂനമര്ദം തീരത്തോട് അടുക്കുകയാണ്. ഇന്നു പുലര്ച്ചെയോ നാളെ രാവിലെയോ ഒഡിഷയിലെ പാരദ്വീപിനും ബലാസോറിനും ഇടയില് കരകയറുമെന്നാണ് പ്രതീക്ഷിക്കുന്നത്.
കേരളത്തിലെ മഴ സാധ്യത
പാലക്കാട് ജില്ലയില് ശക്തമായ കാറ്റിന് സാധ്യതയുണ്ട്. കണ്ണൂര്, കോഴിക്കോട്, മലപ്പുറം, പാലക്കാട്, ഇടുക്കി, പത്തനംതിട്ട ജില്ലകളുടെ കിഴക്കന് മേഖലയില് ഒറ്റപ്പെട്ട ശക്തമായ മഴയോ ഇടത്തരം മഴയോ ബുധനാഴ്ച വരെ തുടരും. തീരദേശത്തും ഇടനാട്ടിലും ഒറ്റപ്പെട്ട ഇടത്തരം മഴ അടുത്ത 48 മണിക്കൂര് കൂടി തുടരും. കോട്ടയം, പത്തനംതിട്ട, എറണാകുളം, കൊല്ലം, തൃശൂര് ജില്ലയിലും ഇത്തരത്തിലുള്ള മഴ ലഭിക്കും.
കടലില് കാറ്റിന് സാധ്യത
കടലില് അടുത്ത 12 മണിക്കൂര് കൂടി ശക്തമായ കാറ്റിന് സാധ്യതയുണ്ട്. ഉയര്ന്ന തിരമാലകളും പ്രതീക്ഷിക്കാം. ഈ സാഹചര്യത്തില് കടല്പ്പണിക്ക് പോകുന്നവര് കാലാവസ്ഥാ വകുപ്പിന്റെ മുന്നറിയിപ്പ് കര്ശനമായി പാലിക്കണം.
മുകളില് പറഞ്ഞ റിപ്പോര്ട്ട് ഒറ്റപ്പെട്ട പ്രദേശങ്ങളിലെ മഴയായതിനാല് നിങ്ങളുടെ പ്രദേശം ആ പട്ടികയില് ഉള്പ്പെടുമോ എന്നറിയാന് മെറ്റ്ബീറ്റ് വെതറിന്റെ മൊബൈല് ആപ്പ് പ്ലേ സ്റ്റോറില് നിന്നോ ഈ ലിങ്ക് വഴിയോ ഡൗണ്ലോഡ് ചെയ്ത് ഉപയോഗിക്കുക. പ്രീമിയം ഫീച്ചര് വഴി രണ്ടു മണിക്കൂര് ഇടവിട്ട വിവരങ്ങള് അറിയാനാകും.
Comments