WEATHER NEWS AND ANALYSIS
ന്യൂനമര്ദം 11 നകം , കേരളത്തില് ഞായര് മുതല് മഴയില് പുരോഗതിയുണ്ടാകും
Sept. 9, 2021, 10:22 p.m.
Metbeat Weather Desk
സെപ്റ്റംബര് മാസത്തിലെ രണ്ടാമത്തെ ന്യൂനമര്ദം സെപ്റ്റംബര് 11 ശനിയാഴ്ച ബംഗാള് ഉള്ക്കടലില് രൂപപ്പെടും. മ്യാന്മര് ഇന്ത്യന് തീരങ്ങള്ക്കിടയിലാണ് ന്യൂനമര്ദം രൂപപ്പെടുക. 11 ന് മ്യാന്മര് തീരത്തോട് ചേര്ന്നാണ് ന്യൂനമര്ദം രൂപപ്പെടുന്നതിനാല് ഇന്ത്യന് സംസ്ഥാനങ്ങളെ അന്ന് കാര്യമായി ബാധിക്കില്ല. വടക്കുകിഴക്കന് ബംഗാള് ഉള്ക്കടലില് നാളെ ശക്തിപ്രാപിക്കുന്ന ചക്രവാതച്ചുഴി ശനിയാഴ്ചയോടെ ന്യൂനമര്ദമാകുമെന്നാണ് പ്രതീക്ഷിക്കുന്നത്. മ്യാന്മറിന്റെ തീരദേശത്തോട് ചേര്ന്ന് ന്യൂനമര്ദം രൂപപ്പെടാനുള്ള ഒരുക്കങ്ങള് ദൃശ്യമാണ്. കഴിഞ്ഞ ന്യൂനമര്ദത്തേക്കാള് കൂടുതല് ശക്തമുള്ളതാകും രൂപപ്പെടാനിരിക്കുന്ന ന്യൂനമര്ദം. സെപ്റ്റംബര് 13 നോ 14 നോ ഇച് ഒഡിഷക്കും ബംഗാളിനും ഇടയില് കരകയറാനാണ് സാധ്യത. കരകയറിയ ശേഷം പടിഞ്ഞാറ് വടക്കുപടിഞ്ഞാറ് ദിശയില് ന്യൂനമര്ദം സഞ്ചരിക്കും. ചത്തീസ്ഗഡ്, മധ്യപ്രദേശ്, ബിഹാര്, ഉത്തര്പ്രദേശ് സംസ്ഥാനങ്ങളില് ന്യൂനമര്ദം ശക്തമായ മഴക്ക് കാരണമാകും. ഉത്തരേന്ത്യയില് ഈ ന്യൂനമര്ദം പൊതുവെ ശക്തമായ മഴക്ക് കാരണമാകും. ഇതേ കുറിച്ച് അടുത്ത ദിവസങ്ങളില് കൂടുതല് വ്യക്തത നേടാനാകും.
കേരളത്തില് 12 മുതല് ഒറ്റപ്പെട്ട മഴ
ന്യൂനമര്ദം രൂപപ്പെടുന്ന 11 വരെ കേരളത്തില് മിക്ക ജില്ലകളില് മഴ കുറയും. എന്നാല് വരണ്ട കാലാവസ്ഥ പ്രതീക്ഷിക്കേണ്ടതില്ല. ഒന്നോ രണ്ടോ മഴ പെയ്യാനുള്ള സാഹചര്യം നിലവിലുണ്ട്. ന്യൂനമര്ദം രൂപപ്പെടുന്ന 11 ന് കേരളത്തില് ന്യൂനമര്ദത്തിന്റെ സ്വാധീനമുണ്ടാകില്ല. പിറ്റേന്ന് മുതല് വടക്കന് ജില്ലകളിലും മധ്യ, തെക്കന് കേരളത്തിലെ കിഴക്കന് മേഖലകളിലും മഴ പതിയെ സജീവമായിത്തുടങ്ങും. 14 വരെ ഈ മഴ ഏറിയും കുറഞ്ഞും അനുഭവപ്പെടും. ന്യൂനമര്ദം കരകയറിയ ശേഷം കേരളത്തിലെ മഴയുടെ ശക്തി കുറയുകയും ഇടവേളകള് ലഭിക്കുകയും ചെയ്യും. ന്യൂനമര്ദം രൂപപ്പെട്ട ശേഷമേ മഴ ഏതെല്ലാം പ്രദേശങ്ങളെ ഏതുവിധത്തില് ബാധിക്കുമെന്ന് വ്യക്തമാകൂ. അതിനാല് അടുത്ത ദിവസങ്ങളിലെ അപ്ഡേഷനുകള് കൂടി ഇതോടൊപ്പം ചേര്ത്തുവായിക്കണം.
നിങ്ങളുടെ ജി.പി.എസ് ലൊക്കേഷന് അനുസരിച്ചുള്ള കാലാവസ്ഥാ പ്രവചനം അറിയാന് മെറ്റ്ബീറ്റ് വെതര് ആപ്പ് പ്ലേ സ്റ്റോറില് നിന്ന് ഡൗണ്ലോഡ് ചെയ്യാം. പ്രീമീയം സര്വിസിലൂടെ കൂടുതല് കൃത്യതയോടെയുള്ള വിവരങ്ങള് അറിയാനാകും.
Comments