Sept. 7, 2021, 7:23 p.m.

Metbeat Weather Desk
ഇന്നലെ രാത്രി കരകയറിയ ന്യൂനമര്‍ദം മധ്യ ഇന്ത്യയിലെത്തിയതോടെ കേരളത്തില്‍ മഴ കുറയും. കണ്ണൂര്‍, കോഴിക്കോട്, മലപ്പുറം, ഇടുക്കി, പാലക്കാട് ജില്ലകളുടെ കിഴക്കന്‍ മേഖലയില്‍ ഒറ്റപ്പെട്ട ഇടത്തരം മഴയാണ് അടുത്ത 24 മണിക്കൂറില്‍ പ്രതീക്ഷിക്കുന്നത്. അതിനിടെ ഈ മാസം 11 ന് പുതിയ ന്യൂനമര്‍ദം ബംഗാള്‍ ഉള്‍ക്കടലില്‍ രൂപപ്പെടും. ഈ ന്യൂനമര്‍ദത്തിന്റെ ഫലമായി സെപ്റ്റംബര്‍ 14 ന് ശേഷം മഴ വീണ്ടും തിരികെ എത്താനാണ് സാധ്യത. 16 വരെ രണ്ടു ദിവസമാകും മഴ ലഭിക്കുക. 

അടുത്ത 4 ദിവസം മഴ കുറയും
ന്യൂനമര്‍ദത്തിന്റെ ഫലമായി കഴിഞ്ഞ ദിവസങ്ങളില്‍ ലഭിച്ച കനത്ത മഴ ഇന്നു മുതല്‍ കുറയും. നേരത്തെ ചൊവ്വാഴ്ച വരെയാണ് മഴ സാധ്യതയെന്ന് പഴയ പോസ്റ്റുകള്‍ പ്രതിപാദിച്ചത് ഓര്‍ക്കുമല്ലോ. ഈ സാഹചര്യത്തില്‍ നിലവില്‍ മാറ്റം ഇല്ല. നാളെ കൂടുതല്‍ പ്രദേശങ്ങളില്‍ വെയില്‍ തെളിയും. മുകളില്‍ വ്യക്തമാക്കിയ പ്രദേശങ്ങളുടെ കിഴക്കന്‍ മേഖലകളില്‍ പെട്ടെന്ന് ആകാശം കറുത്ത് അല്‍പനേരം മഴ പെയ്ത് തെളിയും. കിഴക്കന്‍ മേഖലയിലാണ് കൂടുതല്‍ മഴ സാധ്യത. ചില പ്രദേശങ്ങളില്‍ മാത്രം കനത്തു പെയ്യും. വനാന്തരങ്ങളിലാകും ശക്തമായ മഴ എന്നതിനാല്‍ ചോലകളിലും അരുവികളിലും കുളിക്കുന്നതും മറ്റും അപകടം ക്ഷണിച്ചുവരുത്തും. താഴ്്‌വാരത്ത് വെയിലാണെങ്കിലും മലവെള്ളപ്പാച്ചില്‍ ഇത്തരം മേഖലയില്‍ പ്രതീക്ഷിക്കാം. 

പുതിയ ന്യൂനമര്‍ദവും കേരളവും 
പുതിയ ന്യൂനമര്‍ദം 11 നകം രൂപപ്പെടുമെങ്കിലും ആദ്യഘട്ടത്തില്‍ കേരളത്തില്‍ നേരിയ സ്വാധീനമേ ഉണ്ടാകാന്‍ ഇടയുള്ളൂ. സെപ്റ്റംബര്‍ 14 മുതല്‍ മഴ മുന്‍പത്തെ ദിവസങ്ങളേക്കാള്‍ സജീവമാകും. 16 വരെയാണ് ഈ മഴ സാധ്യത. ഈ ന്യൂനമര്‍ദം ജാര്‍ഖണ്ഡ്, ബിഹാര്‍, ഉത്തരാഖണ്ഡ് എന്നിവിടങ്ങളില്‍ കനത്ത മഴക്കും പ്രാദേശിക പ്രളയത്തിനും ഇടയാക്കിയേക്കും.
Photo- Shihab Rasheed 
നിങ്ങളുടെ ജി.പി.എസ് ലൊക്കേഷന്‍ അനുസരിച്ചുള്ള കാലാവസ്ഥാ പ്രവചനം അറിയാന്‍ മെറ്റ്ബീറ്റ് വെതര്‍ ആപ്പ് പ്ലേ സ്റ്റോറില്‍ നിന്ന് ഡൗണ്‍ലോഡ് ചെയ്യാം. പ്രീമീയം സര്‍വിസിലൂടെ കൂടുതല്‍ കൃത്യതയോടെയുള്ള വിവരങ്ങള്‍ അറിയാനാകും. മെറ്റ്ബീറ്റ് വെതര്‍ ഫോണ്‍വഴി  കാലാവസ്ഥ വിവരങ്ങള്‍ നല്‍കാറില്ല. വിശദമായ അനാലിസിസിനു ഞങ്ങളുടെ വെബ്‌സൈറ്റ്, ഫേസ്ബുക്ക് പേജ് സന്ദര്‍ശിക്കുക. യുട്യൂബ് ചാനല്‍ സബ്‌സ്‌ക്രൈബ് ചെയ്ത് പുതിയ വിഡിയോകളും കാണാം.