കോഴിക്കോട് ബീച്ചില്‍ ഈ വര്‍ഷവും കവരുപൂത്തു
Metbeat Weather Desk
കോഴിക്കോട് ബീച്ചില്‍ ഇന്നലെ രാത്രി കവരുപൂത്തു. കഴിഞ്ഞ വര്‍ഷവും സമാന രീതിയില്‍ കവരുപൂത്തിരുന്നു. കടലിലെ ബയോ ലൂമിനന്‍സ് പ്രതിഭാസമാണ് കവരു പൂക്കല്‍ എന്ന് അറിയപ്പെടുന്നത്. കടല്‍, തടാകം, ചതുപ്പ് മേഖലകളില്‍ ഇത് കാണാറുണ്ട്. കടലിലെ കവരുപൂക്കലാണ് തിരമാലകള്‍ക്കൊപ്പം നയമ മനോഹര കാഴ്ച ഒരുക്കുന്നത്. ഈ വര്‍ഷം കഴിഞ്ഞ മാര്‍ച്ചില്‍ തൃശൂര്‍ ജില്ലയിലെ മാളയില്‍ പള്ളിപ്പുറം ചെന്തുരുത്തി ഫയര്‍ സ്്‌റ്റേഷനുടുത്തെ വെള്ളക്കെട്ടില്‍ കവരു പൂത്തതായി റിപ്പോര്‍ട്ട് പുറത്തുവന്നിരുന്നു.
എന്താണ് കവരു പൂക്കല്‍
മിന്നാമിനുങ്ങിനെപ്പോലെ സൂക്ഷ്മ ജീവികള്‍ പുറപ്പെടുവിക്കുന്ന പ്രകാശമാണ് കവര്. ബയോലൂമിനെന്‍സ് പ്രതിഭാസത്തെയാണ് കവര് എന്ന് വിളിക്കുന്നത്. ബാക്ടീരിയ, ഫംഗസ്, ആല്‍ഗെ തുടങ്ങിയവയാണ് സാധാരണ ഇത്തരത്തില്‍ കവരിന് കാരണം. തണുത്ത വെളിച്ചം എന്ന പേരിലും ഇത് അറിയപ്പെടാറുണ്ട്. ചെങ്കടലിന്റെ ചുവപ്പ് നിറത്തിനു കാരണവും ഇതേ പ്രതിഭാസമാണ്. ചില തരം മത്സ്യങ്ങളും കടലില്‍ ഇത്തരത്തില്‍ പ്രകാശം പരത്താറുണ്ട്. കടലിനോട് ചേര്‍ന്ന കായലിലും ബയോലൂമിനെന്‍സ് പ്രതിഭാസം കാണപ്പെടാറുണ്ട്. ഇതുമായി ബന്ധപ്പെട്ട് കൂടുതല്‍ ഗവേഷണങ്ങള്‍ നടന്നുവരുന്നുണ്ട്.
കേരള തീരത്ത് അപൂര്‍വം, മാലദ്വീപില്‍ സര്‍വസാധാരണം
കടലില്‍ കവരുപൂക്കല്‍ കേരള തീരത്ത് അപൂര്‍വമാണെന്ന് വിദഗ്ധര്‍ പറയുന്നു. എന്നാല്‍ ലക്ഷദ്വീപ്, മാലദ്വീപ് എന്നീ കടലുകളില്‍ ഈ പ്രതിഭാസം സര്‍വസാധാരണമായി കൂടുതല്‍ കാണപ്പെടാറുണ്ട്. താരതമ്യേന തെളിഞ്ഞ വെള്ളമുള്ള കടലില്‍ ഈ കാഴ്ച മനോഹര ദൃശ്യമാണ് നല്‍കുക. എപ്പോഴും കലുഷിതമായ കടലില്‍ കവരു പൂക്കല്‍ പതിവല്ല. 2020 നവംബറിലും കോഴിക്കോട് കടലില്‍ കവരു പൂത്തത് മെറ്റ്ബീറ്റ് വെതര്‍ റിപ്പോര്‍ട്ട് ചെയ്തിരുന്നു. ഇതിന്റെ ദൃശ്യങ്ങള്‍ മെറ്റ്ബീറ്റ് വെതര്‍ ഫോളോവേഴ്‌സ് പകര്‍ത്തുകയായിരുന്നു. തെളിഞ്ഞ ആകാശവും നിലാവും ഉള്ള രാത്രിയാണ് കവരുപൂത്തത് കണ്ണിന് ആനന്ദം പകരുന്നതായി. കേരള തീരത്ത് ഇളം നീല നിറത്തുള്ള പ്രകാശമാണ് കവരുപൂക്കലിനെ തുടര്‍ന്ന് കാണാനായത്. പച്ചനിറത്തിലും ഓറഞ്ച് നിറത്തിലും എല്ലാം കവര് പൂക്കാറുണ്ട്. ഇന്നലെ (ശനി) രാത്രിയിലും കോഴിക്കോട് സൗത്ത് ബീച്ചില്‍ കവരു പൂത്തു. ഇതിന്റെ ദൃശ്യങ്ങള്‍ മെറ്റ്ബീറ്റ് വെതര്‍ പേജ് ഫോളോവര്‍ ഷാഹിര്‍ പകര്‍ത്തിയാണ് മെറ്റ്ബീറ്റിനെ വിവരം അറിയിച്ചത്.
നിങ്ങളുടെ ജി.പി.എസ് ലൊക്കേഷന്‍ അനുസരിച്ചുള്ള കാലാവസ്ഥാ പ്രവചനം അറിയാന്‍ മെറ്റ്ബീറ്റ് വെതര്‍ ആപ്പ് പ്ലേ സ്റ്റോറില്‍ നിന്ന് ഡൗണ്‍ലോഡ് ചെയ്യാം. പ്രീമീയം സര്‍വിസിലൂടെ കൂടുതല്‍ കൃത്യതയോടെയുള്ള വിവരങ്ങള്‍ അറിയാനാകും. മെറ്റ്ബീറ്റ് വെതര്‍ ഫോണ്‍വഴി കാലാവസ്ഥ വിവരങ്ങള്‍ നല്‍കാറില്ല. വിശദമായ അനാലിസിസിനു ഞങ്ങളുടെ വെബ്‌സൈറ്റ്, ഫേസ്ബുക്ക് പേജ് സന്ദര്‍ശിക്കുക. യുട്യൂബ് ചാനല്‍ സബ്‌സ്‌ക്രൈബ് ചെയ്ത് പുതിയ വിഡിയോകളും കാണാം.
Comments