ന്യൂനമര്ദം നാളെ കരകയറിയേക്കും; അടുത്ത 48 മണിക്കൂറില് അതിശക്തമായ മഴക്ക് സാധ്യത
Metbeat Weather Desk
ബംഗാള് ഉള്ക്കടലിലെ മധ്യ പടിഞ്ഞാറ് മേഖലയില് രൂപപ്പെട്ട ന്യൂനമര്ദം നാളെ കരകയറിയേക്കും. ന്യൂനമര്ദം ശക്തിപ്പെടാന് സാധ്യതയില്ലെങ്കിലും കേരളത്തില് മഴ ശക്തിപ്പെടും. നിലവില് ന്യൂനമര്ദം തെക്കന് ഒഡിഷക്കും വടക്കന് ആന്ധ്രാപ്രദേശ് തീരത്തിനും ഇടയിലാണ് സ്ഥിതി ചെയ്യുന്നത്. അതോടൊപ്പം കിഴക്ക്- പടിഞ്ഞാറ് കാറ്റിന്റെ ഖണ്ഡധാരയും രൂപപ്പെട്ടിട്ടുണ്ട്. കര്ണാടകയ്ക്കും വടക്കന് കേരള തീരത്തിനും ഇടയില് ദുര്ബലമായ ന്യൂനമര്ദ പാത്തിയും തുടരുന്നു. ഈ സാഹചര്യത്തില് കേരളം ഉള്പ്പെടെയുള്ള ദക്ഷിണേന്ത്യന് സംസ്ഥാനങ്ങളില് അടുത്ത 48 മണിക്കൂര് ശക്തമായ മഴക്ക് സാധ്യതയുണ്ട്.
കേരളത്തില് 48 മണിക്കൂര് അതിശക്തമായ മഴ സാധ്യത
കഴിഞ്ഞ രണ്ടു ദിവസമായി സംസ്ഥാനത്ത് പെയ്യുന്ന മഴ മൂലം കേരളത്തിലെ മഴക്കുറവ് 25 ശതമാനത്തിലെത്തി. കോട്ടയം, പത്തനംതിട്ട, എറണാകുളം ഒഴികെയുള്ള ജില്ലകള് ഇപ്പോഴും മഴക്കുറവ് പട്ടികയിലാണ്. അടുത്ത ദിവസങ്ങളിലെ മഴ സ്ഥിതി മെച്ചപ്പെടുത്തുമെങ്കിലും സംസ്ഥാന ദീര്ഘകാല ശരാശരിയില് മഴക്കുറവ് പരിഹരിക്കാന് പര്യാപ്തമാകില്ല. കേരളത്തില് അടുത്ത 48 മണിക്കൂര് ശക്തമോ അതിശക്തമോ ആയ മഴക്ക് സാധ്യത. മുകളില് പറഞ്ഞ അന്തരീക്ഷ സ്ഥിതി കേരളത്തില് മഴ ശക്തമാകാന് കാരണമാകും. എന്നാല് തീവ്രമഴക്കുള്ള സാഹചര്യം നിലവിലിലില്ലെന്നാണ് മെറ്റ്ബീറ്റിലെ നിരീക്ഷകരുടെ അഭിപ്രായം. സംസ്ഥാനത്ത് 24 മണിക്കൂറില് 10 മുതല് 15 സെ.മി വരെ മഴക്ക് മിക്ക പ്രദേശങ്ങളിലും സാധ്യതയുണ്ട്. കിഴക്കന് മലയോര മേഖലകളിലും വനത്തിനുള്ളിലും 19 സെ.മി വരെ മഴ ലഭിക്കാന് അനുകൂലമാണ് അന്തരീക്ഷസ്ഥിതി. ഇത് പുഴകളിലെ ജലനിരപ്പ് ഉയരാന് ഇടയാക്കും. ഈ സാഹചര്യത്തില് ജാഗ്രത പാലിക്കുന്നത് ഉചിതമാണ്.
മഴ ഏതെല്ലാം ജില്ലകളില് എങ്ങനെ
ഞായര്
കണ്ണൂര്, കാസര്കോട്, കോഴിക്കോട്, പാലക്കാട്, ഇടുക്കി ജില്ലകളില് അതിശക്തമായ മഴക്ക് സാധ്യത. പാലക്കാട്, ഇടുക്കി ജില്ലകളുടെ കിഴക്കന് മലയോര മേഖലകളിലാണ് അതിശക്തമായ മഴക്ക് സാധ്യതയുള്ളത്. വയനാട്, മലപ്പുറം, തൃശൂര്, എറണാകുളം, കോട്ടയം, പത്തനംതിട്ട ജില്ലകളില് ശക്തമായ മഴക്കും ആലപ്പുഴ, തിരുവനന്തപുരം, കൊല്ലം ജില്ലകളില് ഒറ്റപ്പെട്ട ശക്തമായ മഴയോ ഇടത്തരം മഴയോ പ്രതീക്ഷിക്കാം.
തിങ്കള്
തിങ്കളാഴ്ച കണ്ണൂര്, കാസര്കോട് ജില്ലകളില് അതിശക്തമായ മഴക്ക് സാധ്യത. കോഴിക്കോട, വയനാട്, പാലക്കാട്, തൃശൂര്, എറണാകുളം, പത്തനംതിട്ട, കോട്ടയം, ആലപ്പുഴ ജില്ലകളില് ശക്തമായ മഴക്ക് സാധ്യതയുണ്ട്. മലപ്പുറം, കൊല്ലം ജില്ലകളില് ഒറ്റപ്പെട്ട ശക്തമായ മഴയോ ഇടത്തരം മഴയോ പ്രതീക്ഷിക്കാം. തിരുവനന്തപുരം ജില്ലയില് ഇടത്തരം മഴയോ ചാറ്റല് മഴയോ പ്രതീക്ഷിക്കണം. തിങ്കളാഴ്ച രാത്രി മുതല് മഴയുടെ ശക്തിയില് കുറവുണ്ടാകും.
ചൊവ്വ
എല്ലാ ജില്ലകളിലും മഴ കുറയും. ഇടത്തരം അല്ലെങ്കില് ചാറ്റല് മഴക്ക് സാധ്യത.
നിങ്ങളുടെ ഏറ്റവും അടുത്തുള്ള വെതര് സ്റ്റേഷനിലില് നിന്നുള്ള ഏറ്റവും പുതിയ കാലാവസ്ഥാ വിവരങ്ങള് മെറ്റ്ബീറ്റ് വെതര് ആപ്പ് വഴി അറിയാനാകും. വിശദമായ അനാലിസ് ഫേസ്ബുക്കില് ലഭ്യമാകാന് ഞങ്ങളുടെ ഫേസ്ബുക്ക് പേജ് ലൈക്ക് ചെയ്തു എന്നു ഉറപ്പുവരുത്തുക, ടെലഗ്രാം ഗ്രൂപ്പില് ജോയിന് ചെയ്യാന് ഇവിടെ ക്ലിക്ക് ചെയ്യുക.
Comments