WEATHER NEWS AND ANALYSIS
ന്യൂനമര്ദം നേരത്തെ രൂപപ്പെട്ടേക്കും, കേരളത്തിലും മഴ സാധ്യത
Aug. 13, 2021, 4:53 p.m.
Metbeat Weather Desk
ഈ മാസം ആറിനുള്ള മെറ്റ്ബീറ്റ് വെതറിന്റെ അനാലിസിസ് റിപ്പോര്ട്ടില് പറഞ്ഞ ബംഗാള് ഉള്ക്കടലിലെ ന്യൂനമര്ദം നേരത്തെ രൂപപ്പെടും. ഓഗസ്റ്റ് 19 നായിരുന്നു അന്നത്തെ റിപ്പോര്ട്ടില് ന്യൂനമര്ദം രൂപപ്പെടാനുള്ള സാധ്യത കണക്കുകൂട്ടിയിരുന്നത്. ഏറ്റവും പുതിയ അന്തരീക്ഷ വിശകലനം പ്രകാരം ന്യൂനമര്ദം ഓഗസ്റ്റ് 17 ന് തന്നെ രൂപപ്പെട്ടേക്കും. ഒഡിഷ തീരത്ത് രൂപം കൊള്ളുന്ന ന്യൂനമര്ദം ഓഗസ്റ്റ് 19 ഓടെ ഒഡിഷയില് കരകയറി മധ്യ ഇന്ത്യയിലേക്ക് നീങ്ങും.
മണ്സൂണ് ബ്രേക്കും നേരത്തെ തീരും
ഓഗസ്റ്റ് 16 വരെ തുടരുമെന്ന് പ്രതീക്ഷിച്ച മണ്സൂണ് ബ്രേക്കും രണ്ടു ദിവസം നേരത്തെ നാളെ തീരും. ഇതോടെ രാജ്യത്തിന്റെ വിവിധ ഭാഗങ്ങളില് മഴ സജീവമാകും. കേരളത്തിലും നാളെ മുതല് കഴിഞ്ഞ ദിവസങ്ങളെ അപേക്ഷിച്ച് കൂടുതല് മഴക്ക് സാധ്യതയുണ്ട്.
ഓഗസ്റ്റിലെ ആദ്യ ന്യൂനമര്ദം
ഓഗസ്റ്റിലെ ആദ്യ ന്യൂനമര്ദമാണ് ചൊവ്വാഴ്ചയോടെ രൂപം കൊള്ളുക. ഇന്ന് (വെള്ളി) ഈ മേഖലയില് ചക്രവാതച്ചുഴി രൂപപ്പെട്ടു. ഇത് നാളെ കൂടുതല് സജീവമാകും. ഓഗസ്റ്റ് 15 ഓടെ വടക്കുപടിഞ്ഞാറ് ബംഗാള് ഉള്ക്കടലില് മറ്റൊരു ന്യൂനമര്ദം കൂടി ഉടലെടുക്കും. ഇതാണ് ന്യൂനമര്ദത്തിന് ഹേതുവാകുക. രാജ്യത്തിന്റെ കിഴക്കന് തീരത്ത് രൂപം കൊണ്ട ന്യൂനമര്ദപാത്തി സജീവമാകുന്നതും കിഴക്കന് തീരത്ത് ന്യൂനമര്ദം രൂപംകൊള്ളുന്നത് രാജ്യത്ത് വീണ്ടും മണ്സൂണ് സജീവമാക്കും.
കേരളത്തിലെ മഴ സാധ്യത
ന്യൂനമര്ദം രൂപപ്പെടുന്നതുവരെ കേരളത്തില് ഒറ്റപ്പെട്ട മഴ തുടരും. ഓഗസ്റ്റ് 16 ന് ശേഷം മിക്ക ജില്ലകളിലും മഴ വ്യാപകമായി ലഭിക്കാന് സാധ്യതയുണ്ട്. നിലവില് ഇന്ന് ലഭിക്കുന്ന മഴ ആന്ധ്രക്കും ഒഡിഷക്കും ഇടയില് രൂപപ്പെട്ട ചക്രവാതച്ചുഴിയുടെ സ്വാധീനം മൂലമാണ്. കേരളത്തിന്റെ ആകാശവും പരിസരവും മഴക്ക് അനുകൂലമാണ്. കാറ്റിന്റെ ഗതിവ്യതിയാനം അനുസരിച്ച് മഴയുടെ തോത് വിവിധ പ്രദേശങ്ങളില് കൂടിയും കുറഞ്ഞും അനുഭവപ്പെടും. തിങ്കള് മുതല് കൂടുതല് മഴ സാധ്യത. നിലവിലുള്ള അന്തരീക്ഷസ്ഥിതി പ്രകാരം ഓണത്തിന് കേരളത്തില് മഴ പ്രതീക്ഷിക്കണം. ന്യൂനമര്ദത്തിന്റെ ശക്തി, സ്ഥാനം സ്വഭാവം എന്നിവ അനുസരിച്ച് മഴ എത്രത്തോളം ലഭിക്കുമെന്ന് പറയാനാകും. അതിനായി അടുത്ത ദിവസങ്ങളിലെ നിരീക്ഷണം ആവശ്യമാണ്. ഞങ്ങളുടെ ഫേസ്ബുക്ക് പേജും ആന്ഡ്രോയിഡ് മൊബൈല് ആപ്ലിക്കേഷനും ഇതിനായി ഉപയോഗിക്കാം.
നിങ്ങളുടെ ഏറ്റവും അടുത്തുള്ള വെതര് സ്റ്റേഷനിലില് നിന്നുള്ള ഏറ്റവും പുതിയ കാലാവസ്ഥാ വിവരങ്ങള് മെറ്റ്ബീറ്റ് വെതര് ആപ്പ് വഴി അറിയാനാകും. വിശദമായ അനാലിസ് ഫേസ്ബുക്കില് ലഭ്യമാകാന് ഞങ്ങളുടെ ഫേസ്ബുക്ക് പേജ് ലൈക്ക് ചെയ്തു എന്നു ഉറപ്പുവരുത്തുക
Comments