WEATHER NEWS AND ANALYSIS
അത്തം മങ്ങി വെളുക്കും, ഓണം കറുക്കാനും സാധ്യത
Aug. 10, 2021, 8:33 p.m.
Metbeat Weather Desk
അത്തം കറുത്താല് ഓണം വെളുക്കുമെന്നാണ് പഴമൊഴി. അത്തനാളുകളില് വെയിലുണ്ടായാല് ഓണത്തിന് മഴയായിരിക്കുമെന്ന് സാരം. ഇത്തവണ അടുത്ത 10 ദിവസം പ്രളയ ഭീതിക്ക് അടിസ്ഥാനമില്ലെങ്കിലും മലയാളിയുടെ പൊന്നോണം മഴയില് കുതിരുമെന്നാണ് അന്തരീക്ഷസ്ഥിതി പ്രവചനം നല്കുന്ന സൂചനകള്. ബംഗാള് ഉള്ക്കടലിലെ ന്യൂനമര്ദമാണ് ഓണത്തിന് മഴ നല്കാന് കാരണമാകുക. ന്യൂനമര്ദം രൂപപ്പെടുന്നത് സംബന്ധിച്ച് സ്ഥിരീകരണത്തിന് ഏതാനും ദിവസം കൂടി കാത്തിരിക്കേണ്ടിവരും. എങ്കിലും ന്യൂനമര്ദ സാധ്യത ബംഗാള് ഉള്ക്കടലില് പ്രത്യേകിച്ച് ഒഡിഷ തീരക്കടലില് നിലനില്ക്കുന്നു. ഈ ന്യൂനമര്ദത്തിന്റെ പൊസിഷനും കാറ്റിന്റെ പാറ്റേണും വ്യക്തമാകുന്നതോടെ കേരളത്തിലെ മഴ സാധ്യത സംബന്ധിച്ചും വ്യക്തത കൈവരും.
അന്തരീക്ഷസ്ഥിതി അവലോകനം
നിലവില് മണ്സൂണ് ബ്രേക്കിന് സമാനമായ അന്തരീക്ഷമാണ് ഇന്ത്യയിലുള്ളത്. എന്നാല് കഴിഞ്ഞ ദിവസത്തെ അവലോകനത്തില് സൂചിപ്പിച്ചതുപോലെ കേരളം ഉള്പ്പെടെയുള്ള തെക്കന് സംസ്ഥാനങ്ങളിലും വടക്കുകിഴക്കന് സംസ്ഥാനങ്ങളിലും മഴ തുടരും. അതിന്റെ കാരണം അറിയാന് ഇതുമായി ബന്ധപ്പെട്ട കഴിഞ്ഞ ദിവസത്തെ പോസ്റ്റ് വായിക്കുക.
തീരദേശത്ത് മഴ സാധ്യത
നാളെ (ബുധന്) കേരളത്തിന്റെ തീരദേശത്ത് മഴക്ക് സാധ്യതയുണ്ട്. മണ്സൂണ് കാറ്റ് തീരദേശത്ത് സജീവമാകുന്ന സാഹചര്യം ഉടലെടുക്കുന്നതിനാലാണിത്. ഭൂമധ്യരേഖാ പ്രദേശത്തെ ന്യൂനമര്ദം കേരളം ഉള്പ്പെടുയുള്ള പടിഞ്ഞാറന് തീരത്തും ശ്രീലങ്കയുടെ പടിഞ്ഞാറ്, തെക്കുപടിഞ്ഞാറന് തീരത്തും ഒറ്റപ്പെട്ട ശക്തമായ മഴ നല്കും. ഈ സ്ഥിതി അടുത്ത 3 ദിവസം തുടരാനാണ് സാധ്യത. എന്നാല് തീരത്തു നിന്ന് കിഴക്കോട്ട് സഞ്ചരിക്കും തോറും മഴയുടെ ശക്തിയും സാന്നിധ്യവും കുറഞ്ഞേക്കും. 15 ന് ശേഷം തമിഴ്നാട് തീരത്ത് ഉടലെടുക്കുന്ന ചക്രവാതച്ചുഴിയും ഭൂമധ്യ രേഖാ പ്രദേശത്തെ ചക്രവാതച്ചുഴികളും വടക്കന് കേരളത്തിന്റെ തീരദേശത്തും കര്ണാടക തീരത്തും മഴ നല്കും. 19 ന് ശേഷം ഒഡിഷ തീരത്തു ഉടലെടുക്കുമെന്ന് പ്രതീക്ഷിക്കുന്ന ന്യൂനമര്ദം നിലവിലെ സൂചനകള് പ്രകാരം കേരളത്തില് മഴ നല്കും. ഒന്നാം ഓണത്തിനും തിരുവോണത്തിനും മഴയുണ്ടാകാനാണ് ഇപ്പോഴത്തെ അന്തരീക്ഷ സ്ഥിതി പ്രവചനം പ്രകാരം സാധ്യത. ഭൂമധ്യരേഖാ പ്രദേശത്തെ അന്തരീക്ഷമാറ്റം കണക്കിലെടുത്ത് അടുത്ത ദിവസങ്ങളിലെ നീരീക്ഷണത്തിലേ ഇക്കാര്യത്തില് കൂടുതല് വ്യക്തത ലഭിക്കൂ. അതിനാല് ഓരോ മണിക്കുറിലെയും തല്സ്ഥിതി പ്രവചനം അറിയാന് മെറ്റ്ബീറ്റ് വെതറിലെ ആന്ഡ്രോയിഡ് ആപ്പ് ഉപയോഗിക്കുക.
Photo- Jithesh Poonath
വിശദമായ അനാലിസ് ഫേസ്ബുക്കില് ലഭ്യമാകാന് ഞങ്ങളുടെ ഫേസ്ബുക്ക് പേജ് ലൈക്ക് ചെയ്തു എന്നു ഉറപ്പുവരുത്തുക
Comments