July 29, 2021, 7:19 p.m.

Metbeat Weather Desk
യു.എസിലെ അലസ്‌കയില്‍ ബുധനാഴ്ച രാത്രിവൈകിയുണ്ടായ ഭൂകമ്പത്തെ തുടര്‍ന്നുള്ള സുനാമി മുന്നറിയിപ്പ് പിന്‍വലിച്ചു. യു.എസ് ജിയോളജിക്കല്‍ സര്‍വേയുടെ റിപ്പോര്‍ട്ട് അനുസരിച്ച് 8.2 തീവ്രതയിലാണ് ആദ്യ ഭൂകമ്പം ഉണ്ടായത്. തുടര്‍ന്ന് 6 തീവ്രത രേഖപ്പെടുത്തിയതടക്കം നിരവധി തുടര്‍ ചലനങ്ങളുമുണ്ടായി. പെരിവില്ലെയില്‍ നിന്ന് 91 കി.മി തെക്കു കിഴക്കാണ് ഭൂകമ്പ പ്രഭവ കേന്ദ്രം. പ്രാദേശിക സമയം ബുധനാഴ്ച രാത്രി 10.15 നാണ് ഭൂകമ്പം റിപ്പോര്‍ട്ട് ചെയ്തത്. തുടര്‍ന്ന് യു.എസ് നാഷനല്‍ സുനാമി മുന്നറിയിപ്പ് കേന്ദ്രം സുനാമി മുന്നറിയിപ്പ് പുറപ്പെടുവിച്ചു. 6000 പേരുള്ള കൊഡിയാക് ദ്വീപില്‍ സുനാമി അലര്‍ട്ട് സൈറണ്‍ മുഴക്കി. പ്രാദേശിക റേഡിയോ സ്‌റ്റേഷന്റെ റിപ്പോര്‍ട്ട് അനുസരിച്ച് ദ്വീപില്‍ തിരമാലകള്‍ ഉയര്‍ന്നെങ്കിലും കാര്യമായ നാശനഷ്ടങ്ങളില്ല. 1965 ന് ശേഷം അലസ്‌ക മേഖലയിലുണ്ടാകുന്ന വലിയ ഭൂകമ്പമാണിത്. പസഫിക് മേഖലയിലെ ഭൂകമ്പ സാധ്യതാ മേഖലയാണ് അലസ്‌ക. 1964 ല്‍ 9.2 തീവ്രത രേഖപ്പെടുത്തിയ ഭൂചലനം അലസ്‌കയിലുണ്ടായിരുന്നു. വടക്കേ അമേരിക്കയില്‍ റിപ്പോര്‍ട്ട് ചെയ്യപ്പെട്ടതില്‍ ഏറ്റവും ശക്തിയുള്ളതാണ് ഈ ഭൂചലനം. ഭൂകമ്പത്തിലും സുനാമിയിലും 250 പേരാണ് മരിച്ചത്. ഒക്ടോബറിലും 7.5 തീവ്രത രേഖപ്പെടുത്തിയ ഭൂചലനം അലസ്‌കയുടെ തെക്കന്‍ തീരത്ത് സുനാമിക്ക് കാരണമായിരുന്നു. മുന്നറിയിപ്പുള്ളതിനാല്‍ നാശനഷ്ടങ്ങള്‍ റിപ്പോര്‍ട്ട് ചെയ്യപ്പെട്ടിരുന്നില്ല.

നിങ്ങളുടെ ഏറ്റവും അടുത്തുള്ള വെതര്‍ സ്റ്റേഷനിലില്‍ നിന്നുള്ള ഏറ്റവും പുതിയ കാലാവസ്ഥാ വിവരങ്ങള്‍ മെറ്റ്ബീറ്റ് വെതര്‍ ആപ്പ് വഴി അറിയാനാകും. വിശദമായ അനാലിസ് ഫേസ്ബുക്കില്‍ ലഭ്യമാകാന്‍ ഞങ്ങളുടെ ഫേസ്ബുക്ക് പേജ് ലൈക്ക് ചെയ്തു എന്നു ഉറപ്പുവരുത്തുക