WEATHER NEWS AND ANALYSIS
കനത്ത മഴ, കൊങ്കണില് ട്രെയിനുകള് റദ്ദാക്കി, 6000ത്തോളം യാത്രക്കാര് കുടുങ്ങി
July 22, 2021, 7:17 p.m.
Metbeat Weather Desk
കനത്ത മഴയെ തുടര്ന്ന് കൊങ്കണ് റൂട്ടില് ട്രെയിന് സര്വിസ് നിര്ത്തിവച്ചതോടെ 6000 ത്തോളം യാത്രക്കാര് വഴിയില് കുടുങ്ങി. കനത്ത മഴയും പ്രാദേശിക പ്രളയസാധ്യതയും മുംബൈക്കും ഗോവക്കും ഇടയില് ഉണ്ടാകുമെന്ന് കഴിഞ്ഞ ദിവസങ്ങളില് കാലാവസ്ഥാ മുന്നറിയിപ്പുണ്ടായിരുന്നുവെങ്കിലും ഇക്കാര്യം റെയില്വേ ഗൗരവത്തിലെടുത്തില്ലെന്നതാണ് പ്രതിസന്ധിക്കിടയാക്കിയതെന്ന് മാധ്യമങ്ങള് റിപ്പോര്ട്ട് ചെയ്തു. മഹാരാഷ്ട്രയിലെ വഷിഷ്ടി നദി കരവിഞ്ഞതാണ് ട്രെയിന് ഗതാഗതം തടസ്സപ്പെടാന് കാരണം. രത്നഗിരി മേഖലയിലാണ് പാളത്തില് വെള്ളം കയറിയത്. വിഷിഷ്ടി നദി കരകവിഞ്ഞതിനെ തുടര്ന്ന് റെയില്വേ പാലം വെള്ളത്തിനടിയിലായെന്ന് കൊങ്കണ് റെയില്വേ അറിയിച്ചു.
പിടിച്ചിട്ട ട്രെയിനുകള്
ട്രെയിന് നമ്പര് 01134 മംഗളൂരു ജം. -മുംബൈ സി.എസ്.എം.ടി സ്പെഷല് കാംതേ സ്റ്റേഷനിലും 02617 എറണാകുളം - ഹസ്രത് നിസാമുദ്ദീന് പ്രതിദിന സ്പെഷല് സംഘമേശ്വര് റോഡ് സ്റ്റേഷനിലും 04695 കൊച്ചുവേളി - അമൃത്സര് പ്രതിവാര സ്പെഷല് രത്നഗിരി സ്റ്റേഷനിലും 06346 തിരുവനന്തപുരം സെന്ട്രല്- ലോക്മാനിയ തിലക് , മുംബൈ വിലവാഡെ സ്റ്റേഷനിലും 06072 തിരുനെല്വേലി- ദാദര് സ്പെഷല് രാജ്പുര് റോഡ് സ്റ്റേഷനിലും 06001 തിരുവനന്തപുരം- ഹസ്രത് നിസാമുദ്ദീന് പ്രതിദിന സ്പെഷല് വെര്ന സ്റ്റേഷനിലും പിടിച്ചിട്ടു.
കൊങ്കണ് മേഖലയില് മൂന്നു ദിവസം റെഡ് അലര്ട്ട്
മഴ ശക്തിപ്പെടുന്ന സാഹചര്യത്തില് കൊങ്കണ് മേഖലയില് 3 ദിവസം റെഡ് അലര്ട്ട് പ്രഖ്യാപിച്ചു. അടിയന്തര സാഹചര്യം നേരിടാന് മഹാരാഷ്ട്ര മുഖ്യമന്ത്രി ഉദ്ധവ് താക്കറെ നിര്ദേശം നല്കി.
കേരളത്തിലെ മഴ സാധ്യത
കേരളത്തില് നാളെയാണ് കൂടുതല് മഴക്ക് സാധ്യത. കിഴക്കന് മേഖലകള് കേന്ദ്രീകരിച്ച് ഇന്ന് മഴ പെയ്യും. നാളെ ഇടനാട്ടിലും കിഴക്കന് മേഖലകളിലും മഴ സാധ്യത. ശനി മുതല് മഴയുടെ ശക്തി കുറയും. എങ്കിലും ഞായര് വരെ മഴ പ്രതീക്ഷിക്കണം. ഇപ്പോഴത്തെ ന്യൂനമര്ദവും മഴയും കേരളത്തെ പ്രതികൂലമായി ബാധിക്കില്ല. മഴ കൊങ്കണ്, കര്ണാടക മേഖലകളില് കേന്ദ്രീകരിക്കും. വടക്കന് കേരളത്തിലും സാമാന്യം ഭേദപ്പെട്ട മഴ ലഭിക്കും. തെക്കന് ജില്ലകളില് മഴ പ്രതിദിന ശരാശരിയില് കുറവാകും. കിഴക്കന് മലയോരങ്ങളില് മഴ ശക്തമാകാന് സാധ്യതയുള്ളതിനാല് ഡാമുകളിലേക്കുള്ള നീരൊഴുക്ക് കൂടും. പുഴകളിലും അരുവികളിലും ഇറങ്ങരുത്. മലവെള്ളപ്പാച്ചിലിനു സാധ്യതയുണ്ട്.
നിങ്ങളുടെ ഏറ്റവും അടുത്തുള്ള വെതര് സ്റ്റേഷനിലില് നിന്നുള്ള ഏറ്റവും പുതിയ കാലാവസ്ഥാ വിവരങ്ങള് മെറ്റ്ബീറ്റ് വെതര് ആപ്പ് വഴി അറിയാനാകും. വിശദമായ അനാലിസ് ഫേസ്ബുക്കില് ലഭ്യമാകാന് ഞങ്ങളുടെ ഫേസ്ബുക്ക് പേജ് ലൈക്ക് ചെയ്തു എന്നു ഉറപ്പുവരുത്തുക
Comments