July 21, 2021, 6:38 p.m.

Metbeat Weather Desk
ചൈനയിലെ ഹെനാന്‍ പ്രവിശ്യയിലെ ഷെന്‍സോയിലും പരിസര മേഖലകളിലെ പ്രവിശ്യകളിലും ഉണ്ടായ പ്രളയം ഗുരുതരമാകുന്നു. ഷെന്‍സോയിലെ മെട്രോയില്‍ വെള്ളം കയറി 25 പേര്‍ മരിച്ചു. ട്രെയിനുകളില്‍ കഴുത്തറ്റം വെള്ളമാണ് ഉള്ളത്. ടണലുകളില്‍ നിന്നും മറ്റുമായി 500 ലേറെ പേരെ രക്ഷപ്പെടുത്തി. പ്രളയബാധിത പ്രദേശത്തു നിന്ന് രണ്ട് ലക്ഷം പേരെ മാറ്റിപാര്‍പ്പിച്ചു. നദികളെല്ലാം കരകവിഞ്ഞ് ഒഴുകുന്ന സാഹചര്യത്തിലും മഴ സജീവമാകുന്നതും രക്ഷാപ്രവര്‍ത്തനത്തെയും ബാധിച്ചു. പ്രളയം രാജ്യത്ത് ഗുരുതരമായ ആള്‍നാശവും വസ്തുനഷ്ടവും വരുത്തിയതായി ചൈനീസ് പ്രസിഡന്റ് ഷീ ജിന്‍പിങ് പറഞ്ഞു.
 
ഒരു വര്‍ഷത്തെ മഴ 3 ദിവസം കൊണ്ട് പെയ്തു
ഷെന്‍സോയിലെ 12 ലേറെ നഗരങ്ങളില്‍ പ്രളയക്കെടുതി തുടരുകയാണ്. 24 മണിക്കൂറിനിടെ 45 സെ.മി മഴയാണ് ഇവിടെ രേഖപ്പെടുത്തിയത്. പ്രദേശത്ത് പെയ്ത 60 വര്‍ഷത്തിനിടെ ഏറ്റവും ശക്തമായ മഴയാണിത്. ഡാമുകളും പുഴകളും കരകവിഞ്ഞു. കഴിഞ്ഞ ദിവസം രണ്ട് ഡാമുകള്‍ കരകവിഞ്ഞതും പ്രളയം രൂക്ഷമാക്കി. പ്രവിശ്യ തലസ്ഥാനമായ ഷെന്‍സോയില്‍ ഒരു വര്‍ഷത്തെ മഴയാണ് മൂന്നു ദിവസം കൊണ്ട് പെയ്തതെന്ന്് ചൈനീസ് മാധ്യമങ്ങള്‍ റിപ്പോര്‍ട്ട് ചെയ്തു. ചൈനീസ് സാമൂഹിക മാധ്യമമായ വെയ്‌ബോയില്‍ ദുരന്ത ദൃശ്യങ്ങള്‍ വൈറലാണ്. സ്‌കൂളുകളില്‍ നിന്ന് കുട്ടികളെ രക്ഷപ്പെടുത്തി. ഷെന്‍സോയിലെ ആശുപത്രിയില്‍ വൈദ്യുതി മുടങ്ങിയതിനെ തുടര്‍ന്ന് ഗുരുതരാവസ്ഥയിലുള്ള 600 രോഗികളെ മറ്റൊരു ആശുപത്രിയിലേക്ക് മാറ്റി. 

ഡാമുകള്‍ തകര്‍ച്ചാ ഭീഷണിയില്‍
ലൊയാങ് മേഖലയിലെ ഡാമിലെ ജലനിരപ്പ് 20 മീറ്റര്‍ പിന്നിട്ടതോടെ ബലക്ഷയം സംഭവിച്ചതായും ഏതുനിമിഷവും തകരാമെന്നും അധികൃതര്‍ മുന്നറിയിപ്പ് നല്‍കി. പലരും വീടിന്റെ മേല്‍ക്കൂരയിലാണ് കഴിയുന്നത്. ഷെന്‍സോയില്‍ ചൊവ്വാഴ്ച 62.4 സെ.മി മഴയാണ് രേഖപ്പെടുത്തിയത്. 

ചുഴലിക്കാറ്റ് ഭീഷണി, ഒരാഴ്ച മഴ തുടരും
ഫിലിപ്പൈന്‍സ് കടലില്‍ നിന്ന് ഉത്ഭവിച്ച് കിഴക്കന്‍ ചൈനാ കടലിലെത്തിയ ഇന്‍ ഫാ എന്ന ഫാബിയാന്‍ ചുഴലിക്കാറ്റ് ചൈനയില്‍ കരതൊടും. ഇതോടെ കൂടുതല്‍ നാശനഷ്ടം ഉണ്ടാകുമെന്നാണ് കാലാവസ്ഥാ നിരീക്ഷകരുടെ അനുമാനം. ഫാബിയാന്‍ ചുഴലിക്കാറ്റ് ചൈനീസ് തീരത്തു നിന്ന് നിലവില്‍ ഏകദേശം 730 കി.മി അകലെയാണെന്ന് മെറ്റ്ബീറ്റ് വെതറിലെ നിരീക്ഷകര്‍ പറഞ്ഞു. 175 കി.മി വേഗതയുള്ള ഫാബിയാന് 952 മില്ലി ബാര്‍ മര്‍ദ്ദമുണ്ട്. ഫാബിയാന്‍ ചൈനയിലേക്ക് പോകുംവഴി കേരളത്തിലെ കാറ്റിനെയും ആകര്‍ഷിക്കുന്നത് അടുത്ത ദിവസങ്ങളില്‍ കേരളത്തിലും മഴ വര്‍ധിപ്പിക്കും. ഞായറാഴ്ച രാത്രി കരകയറിയ ശേഷം ഇത് ഇപ്പോള്‍ പ്രളയമുണ്ടായ മേഖലയ്ക്കു സമീപത്തുകൂടെ കടന്നുപോകും. ചൈനയിലെ ഷാന്‍ഹായിക്ക് സമീപമാണ് കരകയറുക. 500 കി.മി മേഖലയില്‍ ശക്തമായ കാറ്റും മഴയും നല്‍കിയാണ് ഫാബിയാന്‍ കരയിലൂടെ നീങ്ങുക. ചൊവ്വാഴ്ചക്ക് ശേഷം മഴ കുറയുമെങ്കിലും ജൂലൈ 29 വ്യാഴം മാത്രമേ മേഖലയില്‍ മഴ കുറയാന്‍ സാധ്യതയുള്ളൂ.
 Photo: Xinhua
നിങ്ങളുടെ ഏറ്റവും അടുത്തുള്ള വെതര്‍ സ്റ്റേഷനിലില്‍ നിന്നുള്ള ഏറ്റവും പുതിയ കാലാവസ്ഥാ വിവരങ്ങള്‍ മെറ്റ്ബീറ്റ് വെതര്‍ ആപ്പ് വഴി അറിയാനാകും. വിശദമായ അനാലിസ് ഫേസ്ബുക്കില്‍ ലഭ്യമാകാന്‍ ഞങ്ങളുടെ ഫേസ്ബുക്ക് പേജ് ലൈക്ക് ചെയ്തു എന്നു ഉറപ്പുവരുത്തുക