ന്യൂനമര്‍ദം നാളെ രാത്രിക്ക് ശേഷം, കേരളത്തില്‍ 22 മുതല്‍ മഴ ശക്തിപ്പെടും
Metbeat Weather Desk
ബംഗാള്‍ ഉള്‍ക്കടലില്‍ പുതിയ ന്യൂനമര്‍ദം 22 ന് രാത്രി യോ 23 ന് പുലര്‍ച്ചെയോ രൂപപ്പെട്ടേക്കും. നാളെ മുതല്‍ ഗുജറാത്ത് മുതല്‍ മുംബൈ വരെയുള്ള പടിഞ്ഞാറന്‍ തീരത്തും. 22 മുതല്‍ കേരളം ഉള്‍പ്പെടെ പടിഞ്ഞാറന്‍ തീരം പൂര്‍ണമായും കാലവര്‍ഷക്കാറ്റ് സജീവമാകും. ഇത് കേരളം ഉള്‍പ്പെടെയുള്ള മേഖലകളില്‍ ശക്തമായ മഴക്ക് കാരണമാകും. വ്യാഴാഴ്ച രാത്രിയോടെ തന്നെ ബംഗാള്‍ ഉള്‍ക്കടലില്‍ ഒഡിഷക്കു സമാന്തരമായി ന്യൂനമര്‍ദം രൂപപ്പെടാന്‍ അനുകൂലമാണ് ഇപ്പോഴത്തെ അന്തരീക്ഷസ്ഥിതി.
അന്തരീക്ഷസ്ഥിതി അവലോകനം
പാകിസ്താനു മുകളിലായി രൂപപ്പെട്ട ന്യൂനമര്‍ദം വടക്കുപടിഞ്ഞാറന്‍ സംസ്ഥാനങ്ങളായ ഗുജറാത്തിലും രാജസ്ഥാനിലും മഴ ശക്തിപ്പെടുത്തും. ഡല്‍ഹി, പടിഞ്ഞാറന്‍ ഉത്തര്‍പ്രദേശ് എന്നിവിടങ്ങളിലും മഴ സജീവമായി നിലനിര്‍ത്താല്‍ ഈ ന്യൂനമര്‍ദം സഹായിക്കും. കാലവര്‍ഷക്കാറ്റ് നിലവില്‍ കേരളം ഉള്‍പ്പെടുന്ന ദക്ഷിണേന്ത്യന്‍ മേഖലയില്‍ സജീവമല്ലെങ്കിലും ബംഗാള്‍ ഉള്‍ക്കടലില്‍ ന്യൂനമര്‍ദം രൂപപ്പെടാനുള്ള സാഹചര്യങ്ങള്‍ ഉരുത്തിരിയുന്നത് കാറ്റിന്റെ ഗതിയില്‍ നാളെ മുതല്‍ മാറ്റം ഉണ്ടാക്കും. മഹാരാഷ്ട്ര മുതല്‍ കര്‍ണാടക വരെ തുടരുന്ന തീരദേശ ന്യൂനമര്‍ദപാത്തിയുടെ സ്വാധീനത്താല്‍ കണ്ണൂര്‍, കാസര്‍കോട് ജില്ലകളില്‍ ഇന്നും ഒറ്റപ്പെട്ട ഇടവേളകളോടെയുള്ള മഴ തുടരും. നാളെ കൂടുതല്‍ മഴ ഈ ജില്ലകളില്‍ പ്രതീക്ഷിക്കണം.
മൂന്നാമത്തെ ന്യൂനമര്‍ദം മഴ നല്‍കും
മണ്‍സൂണ്‍ സീസണിലെ മൂന്നാമത്തെയും ജൂലൈയിലെ രണ്ടാമത്തെയും ന്യൂനമര്‍ദമാണ് ബംഗാള്‍ ഉള്‍ക്കടലില്‍ രൂപപ്പെടാനിരിക്കുന്നത്. വടക്കന്‍ ബംഗാള്‍ ഉള്‍ക്കടലില്‍ കാറ്റിന്റെ ദിശയിലും വേഗതയിലും മാറ്റങ്ങള്‍ ദൃശ്യമാണ്. നാളെ രാത്രിയോടെ ന്യൂനമര്‍ദം ഏതു സമയവും രൂപപ്പെടാം. മൂന്നു ദിവസത്തോളം വടക്കുപടിഞ്ഞാറ് ബംഗാള്‍ ഉള്‍ക്കടലില്‍ നിലകൊള്ളുന്ന ന്യൂനമര്‍ദം ബംഗാളിനും ഒഡിഷക്കും ഇടയില്‍ കരകയറും. ജൂലൈ 25 ന് ഈ സിസ്റ്റം തീവ്ര ന്യൂനമര്‍ദം വരെയായി ശക്തിപ്പെട്ട് കരകയറിയേക്കും. ആദ്യ മണ്‍സൂണ്‍ ന്യൂനമര്‍ദത്തെപ്പോലെ മധ്യ, വടക്കന്‍ ഇന്ത്യയില്‍ മഴ ശക്തിപ്പെടുത്താന്‍ ഈ ന്യൂനമര്‍ദം സഹായിക്കും. തമിഴ്‌നാട്ടില്‍ മാത്രമാകും ദക്ഷിണേന്ത്യയില്‍ മഴ കുറയുക. കേരളത്തില്‍ അതിശക്തമായ മഴ ചിലയിടങ്ങളില്‍ പ്രതീക്ഷിക്കാം. ഏതെല്ലാം ജില്ലകളില്‍ എത്രയളവില്‍ മഴ എന്ന കാര്യത്തില്‍ വരും ദിവസങ്ങളിലെ അവലോകന റിപ്പോര്‍ട്ടില്‍ വ്യക്തത വരുത്താനാകും.
കേരളത്തില്‍ നാളത്തെ മഴ സാധ്യത
ബലി പെരുന്നാള്‍ ദിനമായ നാളെ കേരളത്തില്‍ മിക്ക ജില്ലകളിലും മഴക്ക് സാധ്യത. കാസര്‍കോട്, കണ്ണൂര്‍, കോഴിക്കോട്, വയനാട്, ഇടുക്കി, പാലക്കാട് ജില്ലകളില്‍ ഒറ്റപ്പെട്ട ശക്തമായ മഴക്ക് സാധ്യതയുണ്ട്. മറ്റു ജില്ലകളിലും ഒറ്റപ്പെട്ട മഴ പ്രതീക്ഷിക്കാം.
മാന്യ വായനക്കാര്‍ക്ക് മെറ്റ്ബീറ്റ് വെതറിന്റെ ബലിപെരുന്നാള്‍ ആശംസകള്‍
നിങ്ങളുടെ ഏറ്റവും അടുത്തുള്ള വെതര്‍ സ്റ്റേഷനിലില്‍ നിന്നുള്ള ഏറ്റവും പുതിയ കാലാവസ്ഥാ വിവരങ്ങള്‍ മെറ്റ്ബീറ്റ് വെതര്‍ ആപ്പ് വഴി അറിയാനാകും. വിശദമായ അനാലിസ് ഫേസ്ബുക്കില്‍ ലഭ്യമാകാന്‍ ഞങ്ങളുടെ ഫേസ്ബുക്ക് പേജ് ലൈക്ക് ചെയ്തു എന്നു ഉറപ്പുവരുത്തുക, ടെലഗ്രാം ഗ്രൂപ്പില്‍ ജോയിന്‍ ചെയ്യാന്‍ ഇവിടെ ക്ലിക്ക് ചെയ്യുക.
Comments