യൂറോപ്പിലെ പ്രളയം മരണം 183 ആയി, മഴ തുടരുന്നു
Metbeat Weather Desk
ജര്‍മനിയില്‍ കഴിഞ്ഞ ദിവസമുണ്ടായ പ്രളയത്തില്‍ മരിച്ചവരുടെ എണ്ണം 156 ആയി. യൂറോപ്പില്‍ ഇതുവരെ പ്രളയത്തില്‍ മരിച്ചവരുടെ എണ്ണം 183 ആണെന്നാണ് കണക്കുകള്‍. പടിഞ്ഞാറന്‍ യൂറോപ്പിലാണ് പ്രളയം കനത്ത നാശം വിതച്ചത്. ഇന്ന് രാവിലെ വരെയുള്ള കണക്കനുസരിച്ച് മരണ സംഖ്യ 183 ആയി ഉയര്‍ന്നതായി വാര്‍ത്താ ഏജന്‍സി റിപ്പോര്‍ട്ട് ചെയ്തു. ശനിയാഴ്ചയും പ്രദേശത്ത് കനത്ത മഴ തുടരുകയാണ്.
യൂറോപ്പില്‍ പ്രളയം, അമേരിക്കയില്‍ ഉഷ്ണതരംഗം
കാലാവസ്ഥാ വ്യതിയാനത്തിന്റെ ഗുരുതര പ്രതിസന്ധിയാണ് ലോകരാജ്യങ്ങള്‍ നേരിടുന്നത്. യൂറോപ്പില്‍ ജര്‍മനിയിലും ബെല്‍ജിയത്തിലും പ്രളയം രൂക്ഷമാണ്. അമേരിക്കയിലും കാനഡയിലും ഉഷ്ണതരംഗം ആളുകളുടെ ജീവനെടുക്കുന്നു. ഏഷ്യയില്‍ ഒമാനിലും പ്രളയമാണ് ഇപ്പോള്‍. ഇവിടെങ്ങളിലെല്ലാം പതിവ് കാലാവസ്ഥാ സാഹചര്യങ്ങളില്‍ നിന്ന് വിഭിന്നമായാണ് പ്രകൃതി ദുരന്തങ്ങള്‍ എത്തിയത്. പ്രവചനങ്ങളെ തെറ്റിച്ച് പ്രളയവും മറ്റും രൂക്ഷമാകുന്നതിനു പിന്നില്‍ കാലാവസ്ഥാ വ്യതിയാനമാണ് കാരണമെന്ന് കാലാവസ്ഥാ വിദഗ്ധര്‍ പറയുന്നു. യൂറോപ്പില്‍ സ്വിറ്റ്‌സര്‍ലന്റ്, ലക്‌സംബര്‍ഗ് എന്നീ രാജ്യങ്ങളിലും പ്രളയസമാന മഴയാണ് റിപ്പോര്‍ട്ട് ചെയ്യുന്നത്. കൊവിഡ് പ്രതിസന്ധിക്കിടെയുള്ള പ്രകൃതി ദുരന്തങ്ങള്‍ ഭരണകൂടങ്ങളെയും ആശങ്കയിലാക്കുകയാണ്. യൂറോപ്പിലെ പ്രളയത്തില്‍ ഒരു പ്രദേശത്തെ 1300 പേരെ കാണാതായിട്ടുണ്ട്. ഇതുവരെ 100 മൃതദേഹങ്ങളാണ് കണ്ടെടുത്തത്.
പ്രളയ കാരണം എന്ത്
രണ്ട് അതിമര്‍ദ മേഖലകള്‍ക്കിടയില്‍ കുടുങ്ങിപ്പോയ ഈര്‍പ്പംകൂടിയ വായുവാണ് യൂറോപ്പില്‍ വില്ലനായത്. രണ്ട് അതിമര്‍ദ മേഖലയ്ക്കിടയില്‍ ഒരു ന്യൂനമര്‍ദം രൂപപ്പെടുകയും അവിടെ വായു കുടുങ്ങിപ്പോകുകയും ചെയ്യുന്നത് പതിവാണ്. ഈ വായു അസാധാരണമാം വിധം ഈര്‍പ്പമുള്ളതായിരുന്നു എന്നാണ് തീവ്രമഴക്ക് കാരണമായത്. ഈ ന്യൂനമര്‍ദ മേഖലയിലേക്ക് ദിവസങ്ങളോളം ഈര്‍പ്പം കലര്‍ന്ന വായു ഇരച്ചുകയറി ആ പ്രദേശത്ത് മഴ കനത്തുപ്പെയ്യുകയാണ്. ഈ മഴ ബാള്‍ക്കന്‍ പ്രദേശം വഴി കിഴക്കന്‍ യൂറോപ്പിലേക്ക് നീങ്ങി ദുര്‍ബലമാകുമെന്നാണ് വിലയിരുത്തല്‍. രണ്ടു ദിവസം കൂടി മഴ ഇവിടെ തുടരുമെന്നാണ് ഇപ്പോഴത്തെ നിഗമനം. ആഗോളതാപനമാണ് ഇത്തരം കാലാവസ്ഥാ വ്യതിയാനത്തിന് കാരണമെന്നും സര്‍ക്കാര്‍ മുന്‍കരുതല്‍ നടത്തിയില്ലെന്നും യൂറോപ്പിലെ രാഷ്ട്രീയ നേതാക്കള്‍ ആക്ഷേ
പം ഉന്നയിച്ചിട്ടുണ്ട്. ജര്‍മനിയില്‍ ആറ് ഇഞ്ച് വരെ മഴ പെയ്തതായാണ് കാലാവസ്ഥാ നിരീക്ഷണ കേന്ദ്രത്തിന്റെ കണക്ക്. ചെറു നദികള്‍ പോലും ഇവിടെ കരകവിഞ്ഞ് ഒഴുകുന്നതും മഴ തുടരുന്നതും ദുരന്തഭീതി വര്‍ധിപ്പിക്കുന്നു.
നിങ്ങളുടെ ഏറ്റവും അടുത്തുള്ള വെതര്‍ സ്റ്റേഷനിലില്‍ നിന്നുള്ള ഏറ്റവും പുതിയ കാലാവസ്ഥാ വിവരങ്ങള്‍ മെറ്റ്ബീറ്റ് വെതര്‍ ആപ്പ് വഴി അറിയാനാകും. വിശദമായ അനാലിസ് ഫേസ്ബുക്കില്‍ ലഭ്യമാകാന്‍ ഞങ്ങളുടെ ഫേസ്ബുക്ക് പേജ് ലൈക്ക് ചെയ്തു എന്നു ഉറപ്പുവരുത്തുക, ടെലഗ്രാം ഗ്രൂപ്പില്‍ ജോയിന്‍ ചെയ്യാന്‍ ഇവിടെ ക്ലിക്ക് ചെയ്യുക.
Comments