ഒമാനില് പ്രളയം, മഴ തുടരും
Metbeat Weather Desk
കഴിഞ്ഞ ദിവസങ്ങളില് മെറ്റ്ബീറ്റ് വെതര് കനത്ത മഴ പ്രവചിച്ച ഒമാനില് ഇന്നലെയുണ്ടായ കനത്ത മഴയില് പലയിടത്തും പ്രളയം. ഒമാനിലും സൗദിയിലും ഞായറാഴ്ച വരെ മഴ തുടരുമെന്നാണ് മെറ്റ്ബീറ്റ് വെതറിന്റെ നിരീക്ഷണം. തലസ്ഥാനമായ മസ്കത്ത് ഉള്പ്പെടെയുള്ള ഗവര്ണറേറ്റുകളില് മഴ ശക്തമാണ്. മേഘങ്ങളുടെ സൂപ്പര് സെല്ലുകള് ഒമാന് മുകളില് സജീവമാണെന്നും സൗദിയിലേക്കും ഇത് നീളുന്നതായും ഉപഗ്രഹ സെന്സറുകളില് നിന്നുള്ള ഡാറ്റ വ്യക്തമാക്കുന്നു. കനത്ത മഴ തുടരുമെന്നാണ് ഇപ്പോഴത്തെ അന്തരീക്ഷസ്ഥിതി സൂചിപ്പിക്കുന്നതെന്ന് മെറ്റ്ബീറ്റിലെ നിരീക്ഷകര് പറഞ്ഞു.
ജാഗ്രത വേണം
നിരവധി മലയാളികള് താമസിക്കുന്ന മേഖലകളിലും മറ്റും പ്രളയ സാധ്യത നിലനില്ക്കുന്നതിനാല് അടുത്ത 48 മണിക്കൂര് കൂടി ജാഗ്രത പാലിക്കുന്നതാണ് ഉചിതം. സൗത്ത് അല് ഷറഖിയ, മസ്കത്ത്, ദോഫാര്, ബാതിന, ദാഖിലിയ ഗവര്ണറേറ്റുകളിലാണ് ശക്തമായ മഴക്ക് സാധ്യതയുള്ളത്. ഈ മേഖലകളില് ജാഗ്രത പാലിക്കണമെന്ന് ഒമാന് കാലാവസ്ഥാ വകുപ്പും നിര്ദേശം നല്കിയിട്ടുണ്ട്. പത്ത് കുട്ടികളെയും പത്ത് സ്ത്രീകളെയും ഖുറിയാത്തിലെ പ്രളയ ബാധിത മേഖലയില് നിന്ന് രക്ഷപ്പെടുത്തിയതായി സിവില് ഡിഫന്സ് അറിയിച്ചു. സിവില് ഡിഫന്സ് ആംബുലന്സ് അതോറിറ്റി, റോയല് ഒമാന് പൊലിസ് എന്നിവരാണ് രക്ഷാപ്രവര്ത്തനത്തിന് നേതൃത്വം നല്കുന്നത്. വാദികള് (റോഡിന് കുറുകെ മലവെള്ളം ഒഴുകാനുള്ള ഭാഗം) മുറിച്ചു കടക്കരുതെന്ന് പൊലിസ് അറിയിച്ചു. അല് കാമില്, അല് വാഫി മേഖലകളില് ആളുകളുമായി പോയ വാഹനങ്ങള് ഒഴുക്കില്പ്പെട്ടു. 3 കുട്ടികള് ഉള്പ്പെടെ 5 പേരാണ് വാഹനങ്ങളിലുള്ളത്. ഇവരെ പൊലിസ് ഹെലികോപ്ടര് വഴി രക്ഷപ്പെടുത്തി. പ്രളയ മേഖലയില് കുടുങ്ങിയവരെ എയര് ലിഫ്റ്റിങ് വഴിയാണ് രക്ഷപ്പെടുത്തുന്നത്.
അസാധാരണ മഴ, പ്രവചനാതീതം
ജൂലൈയില് ഒമാനില് കനത്ത മഴയും വെള്ളപ്പൊക്കവും അസാധാരണമാണെന്ന് ഒമാനിലെ മീറ്റിയോറളജിസ്റ്റുകള് പറയുന്നു. ഏതാനും ദിവസം മഴ തുടരുമെന്നും നിലവിലെ കാലാവസ്ഥ പ്രവചനാതീതമാണെന്നും ഒമാന് കാലാവസ്ഥാ വകുപ്പ് അറിയിച്ചു. സാധാരണ ഏപ്രിലിലോ വര്ഷാവസാനമോ ആണ് പ്രളയ സമാന മഴ ലഭിക്കുന്നതെന്ന് മീറ്റിയോറളജിസ്റ്റ് അഹ്്മദ് അല് റവാഹി പറഞ്ഞു. ഒമാന് കടലില് നിന്നുള്ള ന്യൂനമര്ദമാണ് ഇത്തവണ ശക്തമായ മഴക്ക് കാരണം. അറബിക്കടലില് നിന്നുള്ള ഈര്പ്പമുള്ള കാലവര്ഷക്കാറ്റും ഒമാനിലേക്ക് ഈര്പ്പ പ്രവാഹം വര്ധിപ്പിക്കുകയും മഴ ശക്തിപ്പെടുത്തിയെന്നുമാണ് മെറ്റ്ബീറ്റിലെ നിരീക്ഷകരുടെ നിഗമനം.
Photo: Muhammed Saifi
നിങ്ങളുടെ ഏറ്റവും അടുത്തുള്ള വെതര് സ്റ്റേഷനിലില് നിന്നുള്ള ഏറ്റവും പുതിയ കാലാവസ്ഥാ വിവരങ്ങള് മെറ്റ്ബീറ്റ് വെതര് ആപ്പ് വഴി അറിയാനാകും. വിശദമായ അനാലിസ് ഫേസ്ബുക്കില് ലഭ്യമാകാന് ഞങ്ങളുടെ ഫേസ്ബുക്ക് പേജ് ലൈക്ക് ചെയ്തു എന്നു ഉറപ്പുവരുത്തുക, ടെലഗ്രാം ഗ്രൂപ്പില് ജോയിന് ചെയ്യാന് ഇവിടെ ക്ലിക്ക് ചെയ്യുക.
Comments