ബംഗാള് ഉള്ക്കടലില് ന്യൂനമര്ദം 21 ന്; കേരളത്തില് മഴ നല്കും
Metbeat Weather Desk
കഴിഞ്ഞ ദിവസങ്ങളില് മെറ്റ്ബീറ്റ് വെതറിന്റെ അവലോകന റിപ്പോര്ട്ടില് വ്യക്തമാക്കിയതു പ്രകാരം കേരളത്തില് ഇന്ന് (വെള്ളി) രാത്രി മുതല് മഴ കുറയും. വടക്കന് കേരളത്തില് ഇടവേളകളോടെ മഴ ലഭിക്കും. തെക്കന് ജില്ലകള്ക്ക് ഇടവേളകളോടെ ഒറ്റപ്പെട്ട മഴയാണ് പ്രതീക്ഷിക്കേണ്ടത്. ജൂലൈ 21 നകം ബംഗാള് ഉള്ക്കടലിന്റെ വടക്കു പടിഞ്ഞാറന് മേഖലയില് ന്യൂനമര്ദം രൂപപെട്ടേക്കും. ഇത് കേരളത്തില് മഴ ശക്തിപ്പെടുത്തുമെന്നാണ് ഞങ്ങളുടെ മെറ്റ് ടീമിന്റെ നീരീക്ഷണം. തുടര്ന്നുള്ള ദിവസങ്ങളിലെ നിരീക്ഷണത്തിലേ മഴയുടെ തോത് സംബന്ധിച്ച വിശദാംശങ്ങള് ലഭ്യമാകുകയുള്ളൂ.
കാലവര്ഷ മഴ പാത്തി വടക്കോട്ട്
അറബിക്കടലില് സജീവമായ കാലവര്ഷക്കാറ്റുണ്ടെങ്കിലും മണ്സൂണ് മഴ പാത്തിയിലെ വ്യതിയാനം കേരളത്തില് മഴ ഏതാനും ദിവസത്തേക്ക് കുറയ്ക്കും. മണ്സൂണ് മഴ പാത്തിയുടെ പടിഞ്ഞാറന് അഗ്രം നാളെ മുതല് വടക്കോട്ട് മാറുന്നതാണ് മഴ കുറയാന് കാരണം. അതേസമയം, മഹാരാഷ്ട്ര മുതല് വടക്കന് കേരളം വരെ നീളുന്ന ന്യൂനമര്ദ പാത്തിയുടെ സ്വാധീനം വടക്കന് ജില്ലകളില് ഇടവിട്ട ഇടത്തരം, അല്ലെങ്കില് ശക്തമായ മഴ നല്കും. ദക്ഷിണേന്ത്യയില് കാറ്റിന്റെ ഖണ്ഡധാരയും മഴക്ക് അനുകൂലമായി നിലകൊള്ളുന്നതിനാലാണ് മഴ പൂര്ണമായും അകലില്ല എന്നു പറയുന്നത്.
21 ന് ന്യൂനമര്ദം, മഴ ശക്തിപ്പെടുത്തും
ഈ മാസം 21 ന് ബംഗാള് ഉള്ക്കടലിന്റെ വടക്കുപടിഞ്ഞാറ് മേഖലയില് രൂപം കൊള്ളുമെന്ന് പ്രതീക്ഷിക്കുന്ന ന്യൂനമര്ദം കേരളത്തിലും മഴ നല്കും. ഒഡിഷ തീരത്തോട് ചേര്ന്ന് രൂപം കൊള്ളുന്ന ന്യൂനമര്ദം 23 ന് ഒഡിഷയില് കരകയറുമെന്നാണ് പ്രതീക്ഷിക്കുന്നത്. ഈ സമയം മുംബൈ മുതല് തിരുവനന്തപുരം വരെയുള്ള പടിഞ്ഞാറന് തീരത്ത് മഴ ശക്തിപ്പെടും. മണ്സൂണ് പാത്തി ഈ സമയം വീണ്ടും ബ്രേക്കിലേക്ക് നീങ്ങുമെങ്കിലും ന്യൂനമര്ദ മഴയാണ് കേരളത്തില് ലഭിക്കുക. ചൈന കടല്, പടിഞ്ഞാറന് ശാന്തസമുദ്രം എന്നിവിടങ്ങളിലെ അന്തരീക്ഷ നീരൊഴുക്കുകളുടെ സ്വാധീനം എന്നിവ പടിഞ്ഞാറന് തീരത്തെ മഴ ശക്തിപ്പെടുത്തുമെന്നാണ് മെറ്റ്ബീറ്റ് വെതറിലെ മീറ്റിയോറളജിസ്റ്റ് അഭിപ്രായപ്പെടുന്നത്. 25 ഓടെ ന്യൂനമര്ദം സ്വാധീനം കുറയുന്ന മുറയ്ക്ക് കേരളത്തില് മഴ കുറയും. മണ്സൂണ് ബ്രേക്കിന്റെ സ്വാധീനമാകും പിന്നീട് അനുഭവപ്പെടുക. അന്തരീക്ഷസ്ഥിതിയില് നിരന്തരം പരിവര്ത്തനം നടക്കുന്ന സമയമായതിനാല് ഇവയിലെ മാറ്റം ഫോര്കാസ്റ്റിലും മാറ്റം വരുത്തുമെന്നതിനാല് ഏറ്റവും പുതിയ അപ്ഡേറ്റുകള് ഞങ്ങളുടെ ഫേസ്ബുക്ക് പേജിലോ, മെറ്റ്ബീറ്റ് ആപ്പിലോ നോക്കി ഉറപ്പുവരുത്തണം. കാലാവസ്ഥാ പ്രവചനം സങ്കീര്ണമായ വിഷയമായതിനാല് പൂര്ണമായി വായിച്ചു മനസിലാക്കിയ ശേഷം മാത്രം സംശയം ചോദിക്കണമെന്നും പ്രിയ വായനക്കാരോട് അഭ്യര്ഥിക്കുന്നു.
നിങ്ങളുടെ ഏറ്റവും അടുത്തുള്ള വെതര് സ്റ്റേഷനിലില് നിന്നുള്ള ഏറ്റവും പുതിയ കാലാവസ്ഥാ വിവരങ്ങള് മെറ്റ്ബീറ്റ് വെതര് ആപ്പ് വഴി അറിയാനാകും. വിശദമായ അനാലിസ് ഫേസ്ബുക്കില് ലഭ്യമാകാന് ഞങ്ങളുടെ ഫേസ്ബുക്ക് പേജ് ലൈക്ക് ചെയ്തു എന്നു ഉറപ്പുവരുത്തുക, ടെലഗ്രാം ഗ്രൂപ്പില് ജോയിന് ചെയ്യാന് ഇവിടെ ക്ലിക്ക് ചെയ്യുക.
Comments