ന്യൂനമര്ദം നാളെ, ശനിയാഴ്ച മുതല് കേരളത്തിലും മഴ സജീവമാകും
Metbeat Weather Desk
മധ്യ കിഴക്കന് ബംഗാള് ഉള്ക്കടലിനു മുകളില് രൂപം കൊണ്ട ചക്രവാതച്ചുഴി നാളെ രാവിലെയോടെ ന്യൂനമര്ദമായി മാറും. തുടര്ന്ന് 24 മണിക്കൂറിനകം തീവ്രന്യൂനമര്ദമായി മാറും. തുടര്ന്ന് ശനിയാഴ്ച വൈകിട്ടോടെ ഒഡിഷയുടെ ബാലാസോറിനു സമീപം കരകയറും.
രാജ്യവ്യാപകമായി മഴ ശക്തിപ്പെടുത്തും
ഈ സീസണിലെ ആദ്യ ന്യൂനമര്ദം രാജ്യവ്യാപകമായി കാലവര്ഷം വ്യാപിക്കുകയും ശക്തിപ്പെടുത്തുകയും ചെയ്യും. കേരളം മുതല് ഗുജറാത്ത് വരെയുള്ള മേഖലയില് കാലവര്ഷ മാനദണ്ഡങ്ങള് പൂര്ണമായി പാലിക്കപ്പെടും വിധം കാറ്റും മറ്റ് അന്തരീക്ഷഘടകങ്ങളും മാറി. അറബിക്കടലില് മതിയായ തോതില് മേഘരൂപീകരണം സാധ്യമാകാത്തതിനാലാണ് കേരളത്തില് ഇപ്പോള് മഴ ലഭിക്കാത്തത്. ഈ സ്ഥിതിക്ക് ജൂണ് 12 മുതല് മാറ്റം വരും. കേരളം ഉള്പ്പെടെ പടിഞ്ഞാറന് തീരത്ത് ശക്തമായ മഴ ലഭിക്കും. തെക്കന് കേരളത്തേക്കാള് വടക്കന് ജില്ലകളിലാണ് ശക്തമായ മഴ സാധ്യതയുള്ളത്. ഒപ്പം രാജ്യത്തിന്റെ മറ്റു ഭാഗങ്ങളിലും കാലവര്ഷം സജീവമാകും.
മുംബൈയില് ജാഗ്രത തുടരണം
കഴിഞ്ഞ ദിവസത്തെ ശക്തമായ മഴ താല്ക്കാലികമായി കുറഞ്ഞെന്നു കരുതി മുംബൈയിലും മഹാരാഷ്ട്രയിലും ഉള്ളവര് ജാഗ്രത കൈവിടരുത്. ജൂണ് 12 നും 16 നും ഇടയില് മുംബൈയില് അതിശക്തമായ മഴ തുടര്ച്ചയായി ലഭിക്കാനുള്ള സാധ്യത ഇപ്പോഴുമുണ്ട്. ന്യൂനമര്ദത്തിന്റെ ഭാഗമായി പടിഞ്ഞാറന് തീരത്ത് ഏറ്റവും കൂടുതല് മഴ ലഭിക്കുക മുംബൈയിലും കൊങ്കണിലും ആകും. തുടര്ന്ന് കര്ണാടക, ഗോവ, വടക്കന് കേരളം എന്നിവിടങ്ങളിലും മഴയുണ്ടാകും. മുംബൈയില് മേല്സൂചിപ്പിച്ച ദിവസങ്ങളില് പ്രാദേശിക പ്രളയ സാധ്യത (localized flood) മുന്നില്ക്കണ്ട് വ്യക്തിഗത കരുതല് അഭികാമ്യമാണ്.
കേരളത്തില് 12 മുതല് മഴ
ശനിയാഴ്ച ഉച്ചയ്ക്ക് ശേഷം കേരളത്തില് മണ്സൂണ് തിരികെ എത്തിത്തുടങ്ങും എന്നാണ് ഇപ്പോഴത്തെ നീരീക്ഷണം. മണ്സൂണ് പാറ്റേണ് സാധാരണ നിലയിലേക്ക് മാറുന്നുണ്ട്. ശനിയാഴ്ച രാത്രിയോടെ കാസര്കോട്, കണ്ണൂര്, കോഴിക്കോട്, വയനാട്, മലപ്പുറം ജില്ലകളില് മഴ ശക്തിപ്പെട്ടേക്കും. ഇടുക്കിയിലും പാലക്കാട്ടും, തൃശൂരും ഒറ്റപ്പെട്ട ഇടത്തരം മഴ സാധ്യതയുണ്ട്. 13 ന് ഞായറാഴ്ച മേല്പറഞ്ഞ പ്രദേശങ്ങളില് കൂടുതല് ശക്തമായി മഴ ലഭിക്കും. കണ്ണൂര്, കോഴിക്കോട്, മലപ്പുറം മലയോര മേഖലയില് അതിശക്തമായ മഴ പ്രതീക്ഷിക്കാം. ഇടുക്കി, പത്തനംതിട്ട. കോട്ടയം ജില്ലകളുടെ മലയോരത്തും മഴ സാധ്യതയുണ്ട്. 16 വരെ ഇതേ പാറ്റേണില് മഴ തുടരാനുള്ള സാധ്യതയുണ്ട്. മഴ യുടെ തോത് ഭൂപ്രകൃതി തുടങ്ങിയ മാനദണ്ഡങ്ങള് അടിസ്ഥാനമാക്കി കാലാവസ്ഥാ വകുപ്പ്, ദുരന്തനിവാരണ അതോറിറ്റി എന്നിവര് നല്കുന്ന ഔദ്യോഗിക മുന്നറിയിപ്പുകള് പാലിക്കുക.
കടലില് പോകരുത്
കേരളം, കര്ണാടക, ലക്ഷദ്വീപ് തീരങ്ങളില് നാളെ (വെള്ളി) മുതല് 14 (തിങ്കള്) വരെ മത്സ്യത്തൊഴിലാളികള് കടലില് പോകരുതെന്ന് കേന്ദ്ര കാലാവസ്ഥാ വകുപ്പ് അറിയിച്ചു. മണിക്കൂറില് 50 കി.മി വരെ കാറ്റിന് വേഗതയുണ്ടാകാന് സാധ്യതയുള്ളതിനാലാണിത്.
Image- EuMetsat
ഓരോ ദിവസത്തെയും പുതുക്കിയ കാലാവസ്ഥാ വിവരങ്ങള് അറിയാന് മെറ്റ്ബീറ്റ് വെതറിന്റെ ഫേസ്ബുക്ക് പേജ് ലൈക്ക് ചെയ്തു എന്ന് ഉറപ്പു വരുത്തുക. അതിനായി ഈ പോസ്റ്റിന് താഴെ കാണുന്ന ലൈക്ക് ബട്ടന് ക്ലിക്ക് ചെയ്താല് മതിയാകും. metbeat.com സന്ദര്ശിക്കാം
Comments