ന്യൂനമര്‍ദങ്ങള്‍ മഴ കൂട്ടി; രാജ്യത്ത് ഉള്ളി വില കൂടും
Agro Desk, Metbeat Weather
കാലാവസ്ഥാ വ്യതിയാനവും ചുഴലിക്കാറ്റുകളും രാജ്യത്തെ കാര്‍ഷിക മേഖലയില്‍ തിരിച്ചടിയാകുന്നു. തൊതെ ചുഴലിക്കാറ്റിനെ തുടര്‍ന്ന് മഹാരാഷ്ട്രയിലും മറ്റുമുണ്ടായ കനത്ത മഴയില്‍ കൃഷി നശിച്ചത് അടുത്ത മാസങ്ങളില്‍ ഉള്ളിവില വര്‍ധിക്കാന്‍ ഇടയാക്കും. മറ്റു പച്ചക്കറികളുടെ ഉത്പാദനത്തിലും ഗണ്യമായ കുറവുണ്ടെങ്കിലും മറ്റു സംസ്ഥാനങ്ങളില്‍ കൃഷി കുറവുള്ള ഉള്ളിക്ക് തന്നെയാകും രാജ്യവ്യാപകമായി വില കൂടുക. സെപ്റ്റംബര്‍- നവംബര്‍ മാസങ്ങളില്‍ സാധാരണ ഉള്ളിവില വര്‍ധിക്കാറുണ്ട്. സാധാരണയില്‍ കൂടുതല്‍ മഴ ലഭിക്കുന്നതാണ് കര്‍ഷകരെ ദുരിതത്തിലാക്കുന്നത്.
തോതെ ചുഴലിക്കാറ്റും പേമാരിയും
മെയ് 15 ന് ശേഷം രൂപപ്പെട്ട തോതെ ചുഴലിക്കാറ്റ് മഹാരാഷ്ട്രയിലെ പൂനെയിലും മറ്റും ശക്തമായ മഴ നല്‍കിയിരുന്നു. ഈ മഴയില്‍ കൃഷി നാശം സംഭവിച്ചത് ഉത്പാദനം കുറയ്ക്കും. ഉള്ളിവില നിയന്ത്രിക്കാന്‍ 2 ലക്ഷം മ്രെടിക് ടണ്‍ ബസര്‍ സ്റ്റോക്ക് സൂക്ഷിക്കാനായിരുന്നു കേന്ദ്ര സര്‍ക്കാര്‍ തീരുമാനിച്ചിരുന്നത്. കൊവിഡും കാലാവസ്ഥാ പ്രശ്‌നങ്ങളും കാരണം ഈ ലക്ഷ്യം കൈവരിക്കാന്‍ ഇത്തവണ കഴിയില്ലെന്നാണ് റിപ്പോര്‍ട്ടുകള്‍. മെയ് രണ്ടാം വരെ 1,570 മെട്രിക് ടണ്‍ ഉള്ളിയാണ് ഉത്പാദിപ്പിക്കപ്പെട്ടത്. പതിനായിരം മെട്രിക് ടണ്‍ ലക്ഷ്യമായിരുന്നു ഈ സമയം പൂര്‍ത്തിയാക്കേണ്ടത്.
പുതിയ ന്യൂനമര്‍ദവും മഴ കൂട്ടും
ഇത്തവണ കാലവര്‍ഷവും ഉത്തരേന്ത്യയില്‍ നേരത്തെ എത്തുന്നതും മഴ അളവ് കൂട്ടുന്നതും കൃഷിയെ ബാധിക്കും. നാഷനല്‍ അഗ്രികള്‍ച്ചറല്‍ കോഓപറേറ്റീവ് മാര്‍ക്കറ്റിങ് ഫെഡറേഷന്‍ ഓഫ് ഇന്ത്യ (എന്‍.എ.എഫ്.ഇ.ഡി) യുടെ ഡാറ്റ അനുസരിച്ച് ഇന്ത്യയില്‍ ഏറ്റവും കൂടുതല്‍ ഉള്ളി ഉത്പാദിപ്പിക്കുന്നത് മഹാരാഷ്ട്ര, ഗുജറാത്ത്, രാജസ്ഥാന്‍, മധ്യപ്രദേശ് സംസ്ഥാനങ്ങളിലാണ്. ബംഗാള്‍ ഉള്‍ക്കടലില്‍ രൂപം കൊള്ളുന്ന ന്യൂനമര്‍ദം ഈ സംസ്ഥാനങ്ങളില്‍രാജസ്ഥാന്‍ ഒഴികെ മഴ ശക്തിപ്പെടുത്തും. അന്തരീക്ഷത്തിലെ കൂടിയ ഈര്‍പ്പ സാന്നിധ്യം ഉള്ളി സൂക്ഷിക്കുന്നതിനും തടസ്സമാണ്. ഇത്തവണ വേനലില്‍ ഉത്തരേന്ത്യന്‍ സംസ്ഥാനങ്ങളിലും കൂടുതല്‍ മഴ ലഭിച്ചു. വരള്‍ച്ച അനുഭവപ്പെടുന്ന സംസ്ഥാനങ്ങളില്‍ വരള്‍ച്ചയുണ്ടായില്ല. മണ്‍സൂണ്‍ ശക്തിപ്പെടുന്നതും ചുഴലിക്കാറ്റും ന്യൂനമര്‍ദ മഴയും ഉള്ളിയില്‍ ജലാശം കൂടാനും പെട്ടെന്ന് കേടുവരാനും കാരണമാകുമെന്ന് വിമുതിര്‍ന്ന കണ്‍സ്യൂമര്‍ അഫേഴ്‌സ് ഉദ്യോഗസ്ഥന്‍ പറഞ്ഞു. ബിഹാറിലെ പട്‌നയില്‍ ക്വിന്റലിന് ഏപ്രില്‍ 14 ന് ഉള്ളിക്ക് 1500 രൂപയായിരുന്നത് മെയ് 14 ന് 1,900 രൂപയായി വര്‍ധിച്ചു. ജൂണ്‍ 14 ന് വില വീണ്ടും വര്‍ധിക്കാനാണ് സാധ്യതയെന്ന് കര്‍ഷകര്‍ പറയുന്നു.
ഓരോ ദിവസത്തെയും പുതുക്കിയ കാലാവസ്ഥാ വിവരങ്ങള്‍ അറിയാന്‍ മെറ്റ്ബീറ്റ് വെതറിന്റെ ഫേസ്ബുക്ക് പേജ് ലൈക്ക് ചെയ്തു എന്ന് ഉറപ്പു വരുത്തുക. അതിനായി ഈ പോസ്റ്റിന് താഴെ കാണുന്ന ലൈക്ക് ബട്ടന്‍ ക്ലിക്ക് ചെയ്താല്‍ മതിയാകും. metbeat.com സന്ദര്‍ശിക്കാം
Comments