June 8, 2021, 4:52 p.m.
Metbeat Weather Desk
വടക്കന് ബംഗാള് ഉള്ക്കടലില് ബംഗാള് തീരക്കടലില് ജൂണ് 11 ന് വെള്ളിയാഴ്ച പുലര്ച്ചെ ഈ വര്ഷത്തെ ആദ്യ മണ്സൂണ് ന്യൂനമര്ദം രൂപപ്പെടും. ന്യൂനമര്ദത്തിന്റെ ഭാഗമായി കേരളം ഉള്പ്പെടുന്ന പടിഞ്ഞാറന് തീരത്തും വടക്കുകിഴക്കന് സംസ്ഥാനങ്ങളിലും കാലവര്ഷം വീണ്ടും സജീവമാകും. ഉത്തരേന്ത്യയില് മഹാരാഷ്ട്ര, മധ്യപ്രദേശ്, ഡല്ഹി സംസ്ഥാനങ്ങളിലും കാലവര്ഷം പുരോഗമിക്കാന് ഈ ന്യൂനമര്ദം സഹായകമാകും.
കേരളത്തില് മഴ തിരികെയെത്തും
ഇടവേളക്ക് ശേഷം കേരളത്തില് ഇന്നു രാത്രി മുതല് മഴ നേരിയ തോതില് തിരികെയെത്തും. തുടര്ച്ചയായ മഴ ഉണ്ടാകില്ല. തെക്കന് കേരളത്തിലും മധ്യകേരളത്തിലും കിഴക്കന് മലയോരങ്ങള് കേന്ദ്രീകരിച്ച് ഇന്നു രാത്രിയും നാളെയും മഴ ലഭിക്കും. ഒറ്റപ്പെട്ട പ്രദേശങ്ങളില് (ഏതാനും കിലോമീറ്റര് ചുറ്റളവില്) ശക്തമായ മഴക്ക് സാധ്യതയുണ്ട്. എറണാകുളം, ഇടുക്കി, പത്തനംതിട്ട, കോട്ടയം, കൊല്ലം, തിരുവനന്തപുരം ജില്ലകളുടെ കിഴക്കന് മേഖലയിലാണ് മഴ പ്രതീക്ഷിക്കുന്നത്. ബുധനാഴ്ച വടക്കന് കേരളത്തിലെ കോഴിക്കോട്, കണ്ണൂര്, വയനാട്, മലപ്പുറം ജില്ലകളുടെ കിഴക്കും ഇടത്തരം മഴക്ക് സാധ്യത. കൂടുതല് മഴയും ഈ മേഖലയില് വനമേഖലകളിലാകും പെയ്യുക. വ്യാഴാഴ്ച വടക്ക്, മധ്യ ജില്ലകളില് മഴ കൂടുതല് ശക്തിപ്പെടാം. ശനിയാഴ്ച വരെയുള്ള മഴ ഒറ്റപ്പെട്ട രീതിയിലാകും പെയ്യുക. കാലവര്ഷത്തിന്റെ പ്രതീതിയുളവാക്കുന്ന തുടര്ച്ചയായ മണ്സൂണ് ഈ മാസം 12 ന് ശേഷമേ പ്രതീക്ഷിക്കുന്നുള്ളൂ.
കേരളത്തിലും മറ്റു സംസ്ഥാനങ്ങളിലും കാറ്റിന് സാധ്യത
ഇന്നും നാളെയും കടലിലും തീരദേശത്തും മണിക്കൂറില് 40 കി.മി വരെയുള്ള കാറ്റിന് സാധ്യതയുണ്ട്. ബുധനാഴ്ച കരയില് കാറ്റിന് വേഗം കൂടും. കാഞ്ഞങ്ങാട് മടിക്കേരി വരെയുള്ള മേഖല, വയനാടിന്റെ വടക്കു ഭാഗം, വടകര, പേരാമ്പ്ര, കുറ്റ്യാടി, പാലക്കാട് ജില്ലയിലെ മിക്ക പ്രദേശങ്ങളും, തിരൂര്, പൊന്നാനി, ചാവക്കാട്, ചാലക്കുടി, ഇരിങ്ങാലക്കുട, കായംകുളം, ആലപ്പുഴ, ചെങ്ങന്നൂര്, കറുകച്ചാല്, കൊല്ലം, വര്ക്കല, ഇടുക്കി ജില്ലയിലെ മിക്ക പ്രദേശങ്ങള്, പത്തനംതിട്ട ജില്ലയുടെ കിഴക്കന് മേഖല, കൊല്ലം, തിരുവനന്തപുരം ജില്ലകളുടെ കിഴക്ക് തുടങ്ങിയ പ്രദേശങ്ങളിലും പരിസരത്തും നാളെ ഉച്ചയ്ക്ക് ശേഷം മണിക്കൂറില് 30 മുതല് 45 കി.മി വരെ വേഗതയുള്ള കാറ്റിന് സാധ്യതയുണ്ട്. തമിഴ്നാട്ടിലെ പടിഞ്ഞാറന് മേഖല, തെക്കന് മേഖല, ചെന്നൈ, പുതുച്ചേരി, കര്ണാടക, ആന്ധ്രാപ്രദേശ് എന്നിവിടങ്ങളിലും ലക്ഷദ്വീപിലും നാളെ മണിക്കൂറില് 45 കി.മി വരെ വേഗത്തില് കാറ്റ് വീശാം.
ഓരോ ദിവസത്തെയും പുതുക്കിയ കാലാവസ്ഥാ വിവരങ്ങള് അറിയാന് മെറ്റ്ബീറ്റ് വെതറിന്റെ ഫേസ്ബുക്ക് പേജ് ലൈക്ക് ചെയ്തു എന്ന് ഉറപ്പു വരുത്തുക. അതിനായി ഈ പോസ്റ്റിന് താഴെ കാണുന്ന ലൈക്ക് ബട്ടന് ക്ലിക്ക് ചെയ്താല് മതിയാകും. metbeat.com സന്ദര്ശിക്കാം
Comments