ആദ്യ മണ്സൂണ് ലോ ബംഗാള് ഉള്ക്കടലില്, കേരളത്തില് മഴ ലഭിക്കും
Metbeat Weather Desk
2021 മണ്സൂണ് സീസണിലെ ആദ്യ ന്യൂനമര്ദം ബംഗാള് ഉള്ക്കടലില് രൂപം കൊണ്ടേക്കും. ജൂണ് 10 നോ 11 നോ ആകും ന്യൂനമര്ദം ഒഡിഷ, ബംഗാള് തീരത്തായി രൂപം കൊള്ളുക. ഇത് തീവ്രന്യൂനമര്ദം വരെയാകാന് സാധ്യതയുണ്ടെന്നും കേരളത്തില് ജൂണ് 10 ഓടെ മഴ ശക്തിപ്പെടുമെന്നും മെറ്റ്ബീറ്റ് വെതറിലെ നിരീക്ഷകര് പറയുന്നു. ജൂണ് 5 ന് ശേഷം കേരളത്തില് മണ്സൂണിന്റെ ഭാഗമായ മഴ ശക്തിപ്പെടാന് സാധ്യതയുണ്ടെന്നും ജൂണ് 10 മുതല് മഴ സജീവമാകുമെന്നും നേരത്തെ മെറ്റ്ബീറ്റ് വെതര് റിപ്പോര്ട്ട് ചെയ്തിരുന്നു.
മണ്സൂണ് ന്യൂനമര്ദവും അന്തരീക്ഷസ്ഥിതിയും
മണ്സൂണ് കാലത്ത് രൂപപ്പെടുന്ന ന്യൂനമര്ദങ്ങളെയാണ് മണ്സൂണ് ലോ അഥവാ ലോ പ്രഷര് എന്നപേരില് അറിയപ്പെടുന്നത്. സാധാരണ മണ്സൂണ് ലോ പ്രഷറുകള് അറബിക്കടലിനെ അപേക്ഷിച്ച് ബംഗാള് ഉള്ക്കടലിലാണ് കൂടുതലും രൂപപ്പെടുക. എന്നാല് ഇവ ചുഴലിക്കാറ്റാകുന്നത് അപൂര്വമാണ്. കടലില് ഏറെ നേരം തുടരുകയും പതിവില്ല. ന്യൂനമര്ദം രൂപപ്പെടുന്നതിന്റെ ഭാഗമായി ജൂണ് 9 മുതല് മ്യാന്മര് തീരത്തായി ചക്രവാതച്ചുഴി രൂപം കൊള്ളും. തുടര്ന്ന് വടക്കുകിഴക്കന് ബംഗാള് ഉള്ക്കടലില് എത്തിയ ശേഷം ന്യൂനമര്ദമാകും. ന്യൂനമര്ദം രൂപപ്പെട്ട ശേഷം തീവ്രന്യൂനമര്ദം വരെ ശക്തിപ്പെട്ട് ബംഗാള്, ബംഗ്ലാദേശ് തീരത്തേക്ക് കരകയറാനാണ് സാധ്യതയെന്ന് മെറ്റ്ബീറ്റ് വെതറിലെ നിരീക്ഷകര് പറയുന്നു.
കാലവര്ഷം വേഗത്തില് പുരോഗമിക്കും
ആദ്യ മണ്സൂണ് ന്യൂനമര്ദം കാലവര്ഷത്തെ വേഗത്തില് ഉത്തരേന്ത്യയിലേക്ക് പുരോഗമിക്കാന് ഇടയാക്കും. മണ്സൂണ് മഴപാത്തി എന്നറിയപ്പെടുന്ന നോര്ത്തേണ് ലിമിറ്റ് ഓഫ് മണ്സൂണിലെ വടക്കോട്ട് വലിച്ചടുപ്പിക്കാന് ന്യൂനമര്ദത്തിന് സാധിക്കും. ഇതിന്റെ എഫക്ട് അന്തരീക്ഷത്തില് അടുത്തദിവസങ്ങളില് കാണാം. ഇന്നലെ പെയ്ത ഇടിയോടുകൂടെയുള്ള മഴ മണ്സൂണ് കാറ്റിന്റെ തീവ്രതകൊണ്ടുള്ള മഴയല്ല. കേരളതീരത്തെ അന്തരീക്ഷച്ചുഴിയാണ് രാത്രി മഴക്ക് കാരണമായത്. ഇക്കാര്യം ഇന്നലെ ഉച്ചയ്ക്ക് മെറ്റ്ബീറ്റ് വെതര് റിപ്പോര്ട്ട് ചെയ്തിരുന്നു. ഇന്നു രാത്രിയും കേരളത്തില് വ്യാപകമായി മഴ ലഭിക്കും. ന്യൂനമര്ദപാത്തിയുടെ സ്വാധീനവും അറബിക്കടലിനു മുകളിലെ താപസംവഹന മേഘങ്ങളും രാത്രി കേരളത്തിലെത്തി മഴ നല്കും. എന്നാല് യഥാര്ഥ മണ്സൂണ് മഴ വരുംദിവസങ്ങളിലാണ് സജീവമാകുക. മണ്സൂണ് മാനദണ്ഡപ്രകാരമുള്ള 4.5 കി.മി വരെ ഉയരത്തില് മണ്സൂണ് കാറ്റ് അടുത്ത ദിവസങ്ങളിലേ യാഥാര്ത്ഥ്യമാകൂ. ഇന്നലെ ശക്തമായ മഴ ലഭിക്കുമ്പോഴും 3.5 കി.മി നു മുകളില് പടിഞ്ഞാറന് കാറ്റ് ഉണ്ടായിരുന്നില്ലെന്നാണ് റഡാര് വിവരങ്ങള് സൂചിപ്പിക്കുന്നത്. ഇന്നു മുതല് മഹാരാഷ്ട്ര മുതല് വടക്കോട്ടുള്ള സംസ്ഥാനങ്ങളിലും ഇടിയും മഴയും (പ്രീ മണ്സൂണ് മഴ) സജീവമാകും.
കേരളത്തില് ഇന്നു രാത്രി പരക്കെ മഴ സാധ്യത
കേരളത്തില് ഇന്നു രാത്രി എല്ലാ ജില്ലകളിലും പരക്കെ മഴ സജീവമാകും. മധ്യ, തെക്കന് ജില്ലകളിലാണ് കൂടുതല് മഴ പ്രതീക്ഷിക്കുന്നത്. വടക്കന് കേരളത്തില് രാത്രി വൈകി മഴയെത്തും. നാളെയും സമാന രീതിയില് മഴയുണ്ടാകും.
Photo: Muhammadali
ഓരോ ദിവസത്തെയും പുതുക്കിയ കാലാവസ്ഥാ വിവരങ്ങള് അറിയാന് മെറ്റ്ബീറ്റ് വെതറിന്റെ ഫേസ്ബുക്ക് പേജ് ലൈക്ക് ചെയ്തു എന്ന് ഉറപ്പു വരുത്തുക. അതിനായി ഈ പോസ്റ്റിന് താഴെ കാണുന്ന ലൈക്ക് ബട്ടന് ക്ലിക്ക് ചെയ്താല് മതിയാകും. metbeat.com സന്ദര്ശിക്കാം
Comments