ശനിയാഴ്ചക്ക് ശേഷം കാലവര്ഷം സജീവമാകും; മഴ കുറയാന് കാരണമെന്ത്?
Metbeat Weather Desk
കേരളത്തില് കാലവര്ഷം ജൂണ് 5 ശനിയാഴ്ചക്ക് ശേഷം സജീവമാകും. വെള്ളിയാഴ്ച മുതല് എറണാകുളം മുതല് തെക്കോട്ടുള്ള ജില്ലകളില് മഴ ശക്തിപ്പെടും. എറണാകുളത്തിന് വടക്കുള്ള ജില്ലകളില് ഒറ്റപ്പെട്ട മഴയാകും വെള്ളിയാഴ്ച ലഭിക്കുക. ശനി മുതല് വടക്കന് കേരളത്തിലേക്കും മഴ വ്യാപിക്കും. ജൂണ് രണ്ടാം വാരം മഴ കൂടുതല് ശക്തിപ്പെടുമെന്നും മെറ്റ്ബീറ്റ് വെതറിലെ നിരീക്ഷകര് പറയുന്നു.
കാലവര്ഷം തുടക്കം മന്ദഗതിയില്
മെയ് 10 മുതല് അറബിക്കടലില് കാലവര്ഷത്തിന് അനുകൂലമായ തെക്കുപടിഞ്ഞാറന് കാറ്റ് ഈ വര്ഷം രൂപപ്പെട്ടിരുന്നു. തുടര്ന്ന് ആഫ്രിക്കന് തീരംവഴി അറബിക്കടലില് എത്തിയ മാഡന് ജൂലിയന് ഓസിലേഷന് (എം.ജെ.ഒ) വേനല് മഴ ശക്തിപ്പെടുത്തി. ഒപ്പം ന്യൂനമര്ദത്തിനും ഇതു കാരണമായി. ചൂടേറിയ അറബിക്കടലില് രൂപപ്പെട്ട ന്യൂനമര്ദം അതിവേഗം തോതെ ചുഴലിക്കാറ്റായി ഗുജറാത്ത് തീരം തൊട്ടു. തുടര്ന്ന് എം.ജെ.ഒ പ്രഭാവം ബംഗാള് ഉള്ക്കടലിലേക്ക് മാറി. ചൂടേറിയ ബംഗാള് ഉള്ക്കടലില് രൂപപ്പെട്ട ന്യൂനമര്ദം പെട്ടെന്ന് ശക്തിപ്രാപിക്കുന്ന യാസ് ചുഴലിക്കാറ്റായി. ഒഡിഷയില് തീരം തൊട്ടു. അറബിക്കടലില് തോതെ ചുഴലിക്കാറ്റ് നിലനിന്നപ്പോള് തന്നെ തെക്കുപടിഞ്ഞാറന് മണ്സൂണിന് സമാനമായ അന്തരീക്ഷസ്ഥിതി ഉടലെടുത്തു. മണ്സൂണ് പ്രഖ്യാപിക്കാന് ഉതകും വിതം 90 ശതമാനത്തിലേറെ മാനദണ്ഡങ്ങള് പൂര്ത്തിയായി. 4.5 കി.മി ഉയരത്തില് വരെ കാറ്റ് പടിഞ്ഞാറന് ദിശയില് നിന്നാകണമെന്ന മാനദണ്ഡം പാലിക്കപ്പെട്ടില്ല. എന്നാല് പലപ്പോഴും ഉയരം ഇതിനോടടുത്തു. മറ്റു മാനദണ്ഡങ്ങളെല്ലാം ഏറെക്കുറേ അനുകൂലം.
മെയ് 28 ന് മാനദണ്ഡങ്ങള് പാരമ്യത്തിലെത്തി
മെയ് 28 ന് മണ്സൂണ് എത്തുമെന്നായിരുന്നു മെറ്റ്ബീറ്റ് വെതറിന്റെ പ്രവചനം. മെയ് 26 നും 27 നും കാറ്റിന്റെ ഒദ്യോഗിക മാനദണ്ഡം പാലിക്കപ്പെട്ടില്ലെന്ന് ഒഴിച്ചാല് കേരളത്തില് തുടര്ച്ചയായി മഴ ലഭിച്ചു. തെക്കുപടിഞ്ഞാറന് കാറ്റ് കൊണ്ടുവന്ന മഴയാണ് അന്ന് സജീവമായത്. ഔദ്യോഗിക സ്ഥിരീകരണത്തിന് സാങ്കേതിക തടസമുണ്ടെങ്കിലും പെയ്തത് മണ്സൂണിന് പെയ്യേണ്ട തുടക്കമഴയുടെ ഒരു ഭാഗമായിരുന്നുവെന്ന് ഞങ്ങളുടെ നിരീക്ഷകരുടെ പാനലില് ഭൂരിഭാഗം പേരും അഭിപ്രായപ്പെട്ടു. പക്ഷേ മഴയുടെ തുടര്ച്ച തുടര് ദിവസങ്ങളിലുണ്ടാകില്ലെന്ന് വ്യക്തമായി. തുടര്ന്ന് ഇന്നുവരെ മഴ കുറയുകയും ചെയ്തു. നാളെയും ഈ സാഹചര്യം തുടരും.
എന്തു കൊണ്ട് മഴ കുറയുന്നു?
ഇന്നലെ മഡഗാസ്കറിനും മാലദ്വീപിനും ഇടയിലായി രൂപം കൊണ്ട ന്യൂനമര്ദം വീണ്ടും കാറ്റിന്റെ പാറ്റേണില് മാറ്റം വരുത്തി. കാറ്റിന്റെ ദിശയിലും മാറ്റമുണ്ട്. ന്യൂനമര്ദം ദുര്ബലമാകുന്നതോടെ ജൂണ് മൂന്നിന് ശേഷം കാറ്റിന്റെ പാറ്റേണില് മാറ്റം പ്രതീക്ഷിക്കാം. പക്ഷേ മൂന്നു കിലോമീറ്റര് ഉയരം വരെ മാത്രമേ കാറ്റ് പടിഞ്ഞാറന് ദിശയില് നിന്നാകാന് സാധ്യതയുള്ളൂ. മൂന്നു കി.മി നു മുകളില് കാറ്റ് പടിഞ്ഞാറന് ദിശയില് നിന്നാകാന് ജൂണ് 6 വരെയെങ്കിലും കാത്തിരിക്കേണ്ടി വരും. ജൂണ് 6 ഞായറാഴ്ചക്ക് ശേഷം കാലവര്ഷം സജീവമാകുന്നതിനുള്ള അന്തരീക്ഷസ്ഥിതിയാണുള്ളതെന്നും ജൂണ് രണ്ടാംവാരത്തിലും പരക്കെ മഴ ലഭിക്കുമെന്നും മെറ്റ്ബീറ്റ് വെതറിലെ നിരീക്ഷകര് അഭിപ്രായപ്പെടുന്നു.
കാലവര്ഷം എത്തിയെന്ന് സ്ഥിരീകരിക്കാന് കാലാവസ്ഥാ വകുപ്പ് സ്വീകരിക്കുന്ന മാനദണ്ഡങ്ങള്
മഴയുടെ അളവ്
കേരളത്തിലെ 11 കേന്ദ്രങ്ങളും (തിരുവനന്തപുരം,പുനലൂര്, കൊല്ലം, ആലപ്പുഴ, കോട്ടയം, കൊച്ചി, തൃശൂര്, കോഴിക്കോട്, തലശ്ശേരി, കണ്ണൂര്, കുട്ലു) ലക്ഷദ്വീപിലെ 2 കേന്ദ്രങ്ങളും ( അമിനി, മിനിക്കോയ്) മാംഗ്ലൂരും ഉള്പ്പെടെ 14 സ്ഥലങ്ങളിലെ മഴയുടെ അളവ് ആണ് ആദ്യ മാനദണ്ഡം. ഈ 14 ഇടങ്ങളില് 60 ശതമാനം സ്ഥലങ്ങളിലെങ്കിലും 2.5 മില്ലീമീറ്ററോ അതില് കൂടുതലോ മഴ തുടര്ച്ചയായി 2 ദിവസം ലഭിച്ചിരിക്കണം.
കാറ്റിന്റെ വേഗത
ഭൂമധ്യരേഖ (0°) തൊട്ട് 10° N വരെ അക്ഷാംശത്തിനും 55° E തൊട്ട് 80° E വരെ രേഖാംശത്തിനും ഇടയിലുള്ള പ്രദേശത്ത്, കാറ്റ് പടിഞ്ഞാറുദിശയില് നിന്നായിരിക്കണം. അന്തരീക്ഷത്തില് ഏകദേശം 4.5 കിലോമീറ്റര് ( 600 hPa) ഉയരം വരെ പടിഞ്ഞാറന് കാറ്റുതന്നെ ആയിരിക്കണം ( westerly winds) അന്തരീക്ഷത്തില് ഏകദേശം 750 മീറ്റര് ഉയരത്തിലെ (925 hPa) പടിഞ്ഞാറന് കാറ്റിന്റെ വേഗത മണിക്കൂറില് 30 മുതല് 40 കിലോമീറ്റര് വരെയെങ്കിലും ആവണം. (5-10 °N, 70-80°E എന്നീ അക്ഷാംശ-രേഖാംശങ്ങള്ക്കിടയിലുള്ള പ്രദേശത്തെ) ( satellite ല് നിന്നും കണ്ടെത്തുന്ന കാറ്റിന്റെ വിവരം അനുസരിച്ചോ, Regional Specialised Meteorological Centre, New Delhi- നടത്തുന്ന കാറ്റിന്റെ വിശകലനപ്രകാരമോ ആണ് ഇതു ചെയ്യുന്നത്.)
OLR അഥവ ഭൗമവികിരണം
5-10 °N, 70-78 °E എന്ന അക്ഷാംശരേഖാംശങ്ങള്ക്കുള്ളിലെ സ്ഥലത്തു നിന്നുള്ള OLR വാല്യൂ 200 W/m2 ലും കുറവായിരിക്കണം. (ഭൂമി പുറത്തേക്ക് വിടുന്ന ഊര്ജ്ജം നഗ്നനേത്രങ്ങള് കൊണ്ട് കാണാനാവാത്ത തരംഗദൈര്ഘ്യം കൂടിയ വികിരണങ്ങള് ആയാണ് സഞ്ചരിക്കുന്നത് ( terrestrial radiation- ഭൗമാവികിരണങ്ങള്) . ഇതിനെ നമ്മുടെ അന്തരീക്ഷം ഒരു പരിധി വരെ ആഗിരണം ചെയ്യുന്നുണ്ട് . അതു കഴിഞ്ഞ് പുറത്തെത്തുന്ന ഊര്ജ്ജം എത്രയെന്ന് സാറ്റലൈറ്റുകള്ക്ക് (INSAT) മനസ്സിലാക്കാന് സാധിക്കും. അതിനെ സൂചിപ്പിക്കുന്നതാണ് OLR വാല്യൂ. (OLR, എത്രത്തോളം അന്തരീക്ഷം മേഘാവൃതമാണ് എന്നതിന്റെ സൂചന നല്കുന്നു.)
മെയ് 10 നു ശേഷം ഇത്രയും മാനദണ്ഡങ്ങള് ഒരുമിച്ച് പാലിക്കപ്പെടുന്ന സാഹചര്യം ഉണ്ടായാല്, ഇതിലെ (തുടര്ച്ചയായി 2.5 മില്ലീമീറ്ററോ അതില്ക്കൂടുതലോ മഴ ലഭിച്ച) രണ്ടാം ദിവസത്തില് മണ്സൂണ് കേരളത്തില് ആരംഭിച്ചു എന്ന് പറയുന്നു.
ഓരോ ദിവസത്തെയും പുതുക്കിയ കാലാവസ്ഥാ വിവരങ്ങള് അറിയാന് മെറ്റ്ബീറ്റ് വെതറിന്റെ ഫേസ്ബുക്ക് പേജ് ലൈക്ക് ചെയ്തു എന്ന് ഉറപ്പു വരുത്തുക. അതിനായി ഈ പോസ്റ്റിന് താഴെ കാണുന്ന ലൈക്ക് ബട്ടന് ക്ലിക്ക് ചെയ്താല് മതിയാകും. metbeat.com സന്ദര്ശിക്കാം.
Comments