യാസ് അതിതീവ്ര ചുഴലിക്കാറ്റാകും, ഇന്നു രാത്രി മുതല് ചിലയിടങ്ങളില് മഴ സാധ്യത
Metbeat Weather Desk
മധ്യ കിഴക്കന് ബാംഗാള് ഉള്ക്കടലില് മധ്യ പടിഞ്ഞാറ് ബംഗാള് ഉള്ക്കടലിനോട് ചേര്ന്ന് സ്ഥിതി ചെയ്യുന്ന യാസ് തീവ്ര ചുഴലിക്കാറ്റ് അടുത്ത ആറു മണിക്കൂറില് അതിതീവ്ര ചുഴലിക്കാറ്റായേക്കും. നിലവില് സമുദ്രനിരപ്പില് നിന്ന് ഒന്നര കി.മി ഉയരത്തില് കാറ്റിന് 140 കി.മി വരെ വേഗതയുണ്ട്. അതിതീവ്ര ചുഴലിക്കാറ്റ് സ്ഥിരീകരിക്കാന് ഏതാനും മണിക്കൂര് കൂടി നിരിക്ഷിക്കേണ്ടിവരും. നിലവിലെ സ്ഥിതി അനുസരിച്ച് നാളെ (ബുധന്) പുലര്ച്ചെ അഞ്ചു മണിയോടെ അതിതീവ്ര ചുഴലിക്കാറ്റായി ഒഡിഷയിലെ പരാദീപിനും ബലാഷോറിനും ഇടയില് കരതൊടാനാണ് സാധ്യത. ആന്ധ്ര, ഒഡിഷ, ബംഗാള് തീരത്ത് കനത്ത മഴയും ശക്തിയേറിയ കാറ്റും ഉണ്ടാകും.
വിവിധ സംസ്ഥാനങ്ങളില് മഴ സാധ്യത
യാസ് ചുഴലിക്കാറ്റ് ഉഗ്രരൂപം പ്രാപിക്കുന്ന സാഹചര്യത്തില് കേരളം ഉള്പ്പെടെ വിവിധ സംസ്ഥാനങ്ങളില് മഴക്ക് സാധ്യതയുണ്ട്. ആന്ധ്രാപ്രദേശ്, തെലങ്കാന, ഒഡിഷ, ബംഗാള്, മധ്യപ്രദേശ്, ബിഹാര്, സിക്കിം, അസം തുടങ്ങിയ സംസ്ഥാനങ്ങളില് മഴയും കാറ്റും ഉണ്ടാകും. ചുഴലിക്കാറ്റ് മൂലം കനത്ത മഴ പ്രതീക്ഷിക്കുന്ന പ്രദേശങ്ങള് കഴിഞ്ഞ ദിവസത്തെ പോസ്റ്റില് വിശദമാക്കിയിട്ടുണ്ട്.
ഇന്നു രാത്രി മുതല് കേരളത്തില് ഒറ്റപ്പെട്ട മഴ
യാസ് ചുഴലിക്കാറ്റ് ശക്തിപ്പെടുന്ന സാഹചര്യത്തില് കഴിഞ്ഞ ഏതാനും ദിവസങ്ങളിലെ പോസ്റ്റുകളില് മെറ്റ്ബീറ്റ് വെതര് വ്യക്തമാക്കിയതു പ്രകാരം ഇന്നു രാത്രി മുതല് തെക്കന് കേരളത്തില് പ്രത്യേകിച്ച് തിരുവനന്തപുരം, കൊല്ലം ജില്ലകളില് മഴ സജീവമാകും. കാസര്കോട്, കണ്ണൂര്, കോഴിക്കോട് ജില്ലയുടെ കിഴക്കന് മേഖല, വയനാട് ജില്ല, കോട്ടയം, ഇടുക്കി, പത്തനംതിട്ട ജില്ല, മലപ്പുറം, ആലപ്പുഴ, ജില്ലകളുടെ തീരദേശം എന്നിവിടങ്ങളില് മഴക്ക് സാധ്യതയുണ്ട്. ഇതില് ആലപ്പുഴ, ഇടുക്കി, കോട്ടയം, പത്തനംതിട്ട, കൊല്ലം, തിരുവനന്തപുരം ജില്ലകളില് ഇടത്തരം മഴയോ ഒറ്റപ്പെട്ട ശക്തമായ മഴയോ ലഭിക്കും.
ചൊവ്വ
ഇന്നു വൈകിട്ട് മുതലുള്ള 24 മണിക്കൂറില് കൊല്ലം, തിരുവനന്തപുരം, ഇടുക്കി ജില്ലയുടെ ലോ റേഞ്ച്, പത്തനംതിട്ട, ആലപ്പുഴ, കോട്ടയം ജില്ലകളില് ഒറ്റപ്പെട്ട ശക്തമായ മഴയോ ഇടത്തരം മഴയോ പ്രതീക്ഷിക്കണം. എറണാകുളം ജില്ലയില് ഇടത്തരം മഴക്ക് സാധ്യത. കാസര്കോട്, കണ്ണൂര്, കോഴിക്കോട് ജില്ലകളുടെ കിഴക്ക് പ്രദേശങ്ങളില് ഇടത്തരം മഴ സാധ്യത. മറ്റു ജില്ലകളില് ഒറ്റപ്പെട്ട മഴ.
ബുധന്
മുകളില് പറഞ്ഞ മേഖലകളില് മഴ തുടരും. ഒപ്പം വടക്കന് കേരളത്തില് ഒറ്റപ്പെട്ട ശക്തമായ മഴയോ ഇടത്തരം മഴയോ പ്രതീക്ഷിക്കാം. ഇടുക്കി, പത്തനംതിട്ട ജില്ലകളില് ശക്തമായ മഴക്ക് സാധ്യത. വയനാട്ടില് മഴ താരതമ്യേന കുറവായിരിക്കും.
മത്സ്യത്തൊഴിലാളി മുന്നറിയിപ്പ്
തമിഴ്നാട് പുതുച്ചേരി തീരങ്ങളില് മത്സ്യത്തൊഴിലാളികള് പോകുന്നതിന് വിലക്ക്. കേരളം, കര്ണാടക, ലക്ഷദ്വീപ് തീരങ്ങളില് മത്സ്യബന്ധന വിലക്കില്ലെന്ന് കേന്ദ്ര കാലാവസ്ഥാ വകുപ്പ് അറിയിച്ചു. അതേസമയം, കന്യാകുമാരി കടലിലും തെക്കന് കേരള തീരക്കടലിലും നാളെ ശക്തമായ കാറ്റിന് സാധ്യതയുണ്ടെന്ന് ഞങ്ങളുടെ ഓഷ്യനോഗ്രാഫര് പറയുന്നു. കവരത്തി മുതല് കൊല്ലം വരെയുള്ള കടല്മേഖലയില് മര്ദവ്യതിനമുണ്ട്. ഇവിടെ നിന്നുള്ള കാറ്റിനെ യാസ് ചുഴലിക്കാറ്റ് ആകര്ഷിക്കുന്നു. കൊല്ലം മുതല് വടക്കോട്ട് എറണാകുളം വരെ കാറ്റിന് മണിക്കൂറില് 45 കി.മി വരെ വേഗതയുണ്ടാകും. ഉയര്ന്ന തിരമാലകള്ക്കും സാധ്യതയുണ്ട്. ബുധന്, വ്യാഴം ദിവസങ്ങളിലാണ് കടലില് കാറ്റിനും മഴക്കും സാധ്യതയുള്ളത്.
കാലാവസ്ഥാ വകുപ്പ് നല്കുന്ന ഏറ്റവും പുതിയ മുന്നറിയിപ്പ് അനുസരിച്ച് മാത്രം കടല്ജോലികളില് ഏര്പ്പെടുക.
Photo- Binduraj Mohanan
ഓരോ ദിവസത്തെയും പുതുക്കിയ കാലാവസ്ഥാ വിവരങ്ങള് അറിയാന് മെറ്റ്ബീറ്റ് വെതറിന്റെ ഫേസ്ബുക്ക് പേജ് ലൈക്ക് ചെയ്തു എന്ന് ഉറപ്പു വരുത്തുക. അതിനായി ഈ പോസ്റ്റിന് താഴെ കാണുന്ന ലൈക്ക് ബട്ടന് ക്ലിക്ക് ചെയ്താല് മതിയാകും. metbeat.com സന്ദര്ശിക്കാം.
Comments