WEATHER NEWS AND ANALYSIS
നയനമനോഹര കാഴ്ചയൊരുക്കി ബംഗളൂരുവില് 22 ഡിഗ്രി ഹാലോ
May 24, 2021, 8:30 p.m.
Metbeat Weather Desk
ബംഗളൂരുവില് ഇന്ന് സൂര്യന് ചുറ്റും അപൂര്വ വലയം അഥവാ 22 ഡിഗ്രി ഹാലോ രൂപപ്പെട്ടു. ഒരു മണിക്കൂര് നേരത്തേക്ക് തെളിഞ്ഞ ആകാശത്ത് ഇത് ദൃശ്യമായിരുന്നുവെന്ന് മാധ്യമങ്ങള് റിപ്പോര്ട്ട് ചെയ്തു. സാധാരണ കാണുന്നതിനേക്കാള് വ്യക്തവും മനോഹരവുമായിരുന്നു ബംഗളൂരുവിലെ 22 ഡിഗ്രി ഹാലോ എന്നതാണ് സവിശേഷത. ഇതോടെ സോഷ്യല് മീഡിയയിലും മറ്റും ഹാലോയുടെ മനോഹര ചിത്രങ്ങള് വൈറലായി. 2021 മാര്ച്ച് 25 ന് കേരളത്തില് മണ്ണാര്ക്കാട് ഉള്പ്പെടെ പലയിടത്തും ഹാലോ ദൃശ്യമായിരുന്നു. അന്തരീക്ഷത്തില് ഈര്പ്പത്തിന്റെ തോത് വര്ധിക്കുമ്പോഴാണ് ഈ പ്രതിഭാസം ഉണ്ടാകുന്നത്. ഈ സമയത്ത് സൂര്യനും ചന്ദ്രനും ചുറ്റും വലയം ദൃശ്യമാകും. രാത്രിയില് പലപ്പോഴും ചന്ദ്രനു ചുറ്റും ഇത്തരം വലയം ദൃശ്യമാകാറുണ്ട്.
എന്താണ് ഹാലോ?
അന്തരീക്ഷത്തില് തങ്ങിനില്ക്കുന്ന ഐസ് പരലുകളോ, ഈര്പ്പ കണങ്ങളിലൂടെയോ പ്രകാശ സ്രോതസ്സില് നിന്നുള്ള വെളിച്ചം കടന്നുപോകുമ്പോഴുള്ള ദൃശ്യ പ്രതിഭാസമാണ് ഹാലോ. പ്രഭാവലയം എന്നര്ഥം വരുന്ന ഗ്രീക്ക് പദമാണിത്. സൂര്യനും ചന്ദ്രനും ചുറ്റുമാണ് സാധാരണ ഇത് പ്രത്യക്ഷപ്പെടുക. വൃത്താകൃതിയില് രൂപപ്പെടുന്ന ഇവയെ 22 ഡിഗ്രി ഹാലോ എന്നാണ് വിളിക്കുന്നത്. ഹാലോയും കാലാവസ്ഥയുമായി ബന്ധമുണ്ട്. ഹാലോയുണ്ടെങ്കില് മഴസാധ്യതയും ഉണ്ടെന്നായിരുന്നു ആദ്യകാലത്തെ കാലാവസ്ഥാ നിരീക്ഷകര് പറയാറുള്ളത്. സിറോസ്ട്രാറ്റസ് മേഘങ്ങളുടെ സാന്നിധ്യമാണ് സാധാരണ ഹാലോകള് സൂചിപ്പിക്കുന്നത്. ഈ മേഘങ്ങള് മഴപെയ്യിക്കില്ലെങ്കിലും മഴക്ക് കാരണമാകുന്ന മേഘരൂപീകരണത്തിന് അന്തരീക്ഷത്തിന്റെ ഈര്പ്പക്കൂടുതല് കാരണമാകാറുണ്ട്. ട്രോപോസ്ഫിയറിലെ സിറസ്, സിറോസ്ട്രാറ്റസ് മേഘങ്ങളിലാണ് സാധാരണ ഐസ് പരലുകള് രൂപം കൊള്ളുന്നത്. ഇത് സമുദ്രനിരപ്പില് നിന്ന് 510 കി.മി ഉയരത്തിലാകും ഉണ്ടാകുക. ഇന്ന് ബംഗളൂരുവില് ദൃശ്യമായ ഹാലോയുടെ ചിത്രമാണ് ഇതോടൊപ്പം.
Photo- P.C Mohan
Disclaimer & Credit : This is based on Metbeat Weather’s Observation. Please follow IMD in India or Respective National Forecaster if you are in abroad for official Local Weather forecast and Alerts. Media Requested to Credit Metbeat Weather or metbeat.com
if you use our data and analysis news purpose.
Comments