ന്യൂനമര്ദം രൂപപ്പെട്ടു, കനത്തമഴക്കും കാറ്റിനും സാധ്യത, ജാഗ്രത വേണം
Metbeat Weather Desk
നാളെ രാവിലെ രൂപപ്പെടുമെന്ന് പ്രതീക്ഷിച്ച ന്യൂനമര്ദം തെക്കുകിഴക്കന് അറബിക്കടലില് ഇന്നു തന്നെ രൂപപ്പെട്ടു. ലക്ഷദ്വീപിലെ കവരത്തിയോട് ചേര്ന്ന് ഏകദേശം 150 കി.മി അകലെയാണ് ന്യൂനമര്ദത്തിന്റെ സ്ഥാനം. ന്യൂനമര്ദം രൂപപ്പെട്ടത് കേന്ദ്ര കാലാവസ്ഥാ വകുപ്പ് (ഐ.എം.ഡി) എന്.ഒ.എ.എ. നാസ എന്നിവയുമായി സഹകരിച്ച് പ്രവര്ത്തിക്കുന്ന കോര്പറേറ്റീവ് ഇന്സ്റ്റിറ്റ്യൂട്ട് ഓഫ് മീറ്റിയോറോളജിക്കല് സ്റ്റഡീസ് (സി.ഐ.എം.എസ്.എസ്) എന്നിവ സ്ഥിരീകരിച്ചു. ഗോബല് ഫോര്കാസ്റ്റ് സിസ്റ്റത്തിന്റെ മാതൃകയിലും ന്യൂനമര്ദ സാന്നിധ്യം സ്ഥിരീകരിക്കുന്നുണ്ട്. പെട്ടെന്ന് ശക്തിപ്രാപിക്കുന്ന സ്വഭാവമാണ് ന്യൂനമര്ദത്തിനുള്ളത്. അതിനാല് നാളെ (വെള്ളി) രാവിലെ വീണ്ടും ശക്തിപ്പെട്ട് വെല് മാര്ക്ഡ് ലോ പ്രഷറും ശനിയാഴ്ചയോടെ വീണ്ടും ശക്തിപ്പെട്ട് തീവ്ര ന്യൂനമര്ദവും ആകുമെന്നാണ് കാലാവസ്ഥാ പ്രവചന മാതൃകകള് സൂചിപ്പിക്കുന്നത്. എന്നാല് ശനിയാഴ്ച തന്നെ തോ തെ ചുഴലിക്കാറ്റ്് രൂപപ്പെടാനുള്ള അന്തരീക്ഷസ്ഥിതി നിലവിലുണ്ടെന്നാണ് മെറ്റ്ബീറ്റ് വെതറിന്റെ നിരീക്ഷണം. വടക്കു വടക്കുപടിഞ്ഞാറ് ദിശയില് നീങ്ങും.
കടല് സജീവം, ചുഴലിക്കാറ്റ് ശക്തിപ്പെടും
അറബിക്കടലിന്റെ സമുദ്രോപരിതാപന നില 30 ഡിഗ്രിക്ക് മുകളില് തുടരുന്ന സാഹചര്യം സിസ്റ്റത്തെ വേഗത്തില് ശക്തിപ്പെടാന് സഹായിക്കും. കാറ്റിന്റെ ഖണ്ഡരേഖാശ്രേണിയും ന്യൂനമര്ദത്തിന് ചുഴലിക്കാറ്റാകാന് അനുകൂലമാണ്. അറബിക്കടലില് കഴിഞ്ഞ ദിവസം എത്തിയ ആഗോളമഴപാത്തി എന്നറിയപ്പെടുന്ന എം.ജെ.ഒയുടെ സാന്നിധ്യവും ന്യൂനമര്ദത്തിനും ചുഴലിക്കാറ്റിനും അനുകൂലമാണ്. കടലിന്റെ ചൂട് ഉഗ്രശേഷിയിലേക്ക് മാറാനുള്ള ഊര്ജം പകരുകയും ചെയ്യും. ന്യൂനമര്ദം തീവ്ര ന്യൂനമര്ദം (ഡിപ്രഷന്) ആകുന്നതുവരെ സഞ്ചാരവേഗം കുറവായിരിക്കും. തോ തെ ചുഴലിക്കാറ്റ് രൂപ്പപെട്ട ശേഷമാകും വടക്ക് വടക്കു പടിഞ്ഞാറ് ദിശയിലേക്കുള്ള സഞ്ചാരം വേഗത്തിലാകുക. തുടര്ന്ന് ഗോവ, മഹാരാഷ്ട്ര തീരങ്ങള്ക്ക് സമാന്തരമായി സഞ്ചരിച്ച് ഗുജറാത്തില് കര കയറാനാണ് സാധ്യത കൂടുതല്.
കേരളത്തില് ശക്തമായ മഴ, കാറ്റ് തുടരും
ഇന്നു രാത്രി മുതല് കേരളത്തില് ന്യൂനമര്ദത്തിന്റെ ഭാഗമായി ശക്തമായ മഴ ലഭിക്കും. തീരദേശത്ത് കാറ്റിന് ശക്തി കൂടും. കടല് പ്രക്ഷുബ്ധമാകും. ഈ മാസം 16 വരെ കേരള തീരത്ത് മത്സ്യബന്ധനം സുരക്ഷിതമല്ല. തെക്കുകിഴക്ക് അറബി കടലില് മത്സ്യബന്ധന യാനങ്ങള് ഉണ്ടെങ്കില് അടിയന്തരമായി ഏറ്റവും അടുത്ത തീരത്ത് അടുക്കുന്നതാണ് സുരക്ഷിതമെന്ന് ഞങ്ങളുടെ മെറ്റ് ടീം പറയുന്നു. കണ്ണൂരിനും മംഗലാപുരത്തിനും ഇടയില് വച്ചാകും തോതെ ചുഴലിക്കാറ്റ് പിറവിയെടുക്കുക. കേരള തീരത്ത് 50 കി.മി വേഗത്തില് വരെ കാറ്റുണ്ടാകും. നാളെ ഉച്ചയോടെ കാറ്റിന്റെ ശക്തി 30 കി.മി കൂടും. തീരദേശത്തും ഇടനാട് പ്രദേശത്തുമാണ് ശക്തമായ കാറ്റുണ്ടാകുക. തിരുവനന്തപുരം മുതല് മംഗലാപുരം വരെയുള്ള തീരദേശങ്ങളിലാണ് പ്രധാനമായും ശക്തമായ കാറ്റ് പ്രതീക്ഷിക്കേണ്ടത്.
മഴ ശക്തമാകും, കരുതല് വേണം
നാളെ (വെള്ളി) വൈകിട്ട് വരെ കോഴിക്കോട് മുതല് എറണാകുളം വരെയുള്ള ജില്ലകളില് ഇടത്തരം മഴക്ക് സാധ്യതയുണ്ട്. എറണാകുളം മുതല് തിരുവനന്തപുരം വരെയുള്ള ജില്ലകള്ക്ക് അടുത്ത 24 മണിക്കൂറില് ശക്തമായതോ ഒറ്റപ്പെട്ട അതിശക്തമായതോ ആയ മഴ പ്രതീക്ഷിക്കാം. കിഴക്കന് ജില്ലകളായ ഇടുക്കി, വയനാട് എന്നിവിടങ്ങളിലും ശക്തമായ മഴയുണ്ടാകും.
ശനിയാഴ്ച കേരളത്തില് എല്ലാ ജില്ലകളിലും അതിശക്തമായ മഴക്ക് സാധ്യതയുണ്ട്. ഇടുക്കി, തിരുവനന്തപുരം, മലപ്പുറം ജില്ലകളുടെ കിഴക്കന് മലയോര മേഖലകളില് പ്രത്യേകം ജാഗ്രത പുലര്ത്തണം. ഇവിടെ അതിശക്തമായ മഴ ലഭിക്കും. കോഴിക്കോട്, മലപ്പുറം, തൃശൂര്, എറണാകുളം, ആലപ്പുഴ, കൊല്ലം, പത്തനംതിട്ട, തിരുവനന്തപുരം, പാലക്കാട് ജില്ലകളും ജാഗ്രത പുലര്ത്തണം.
കംപ്യൂട്ടര്വത്കൃത മഴ സാധ്യതാ പ്രവചനം, തല്സമയ ഉപഗ്രഹ ചിത്രങ്ങള്, അതതു പ്രദേശത്തെ ഒരാഴ്ച വരെയുള്ള മണിക്കൂറുകള് ഇടവിട്ട മഴ സാധ്യതാ മുന്നറിയിപ്പ്, മറ്റ് അന്തരീക്ഷസ്ഥിതി പ്രവചനം, വിശദമായ കാലാവസ്ഥാ അവലോകനങ്ങള് തുടങ്ങിയവ മെറ്റ്ബീറ്റ് വെതറിന്റെ മൊബൈല് ആപ്ലിക്കേഷന്, വെബ്സൈറ്റ് എന്നിവയില് ലഭ്യമാണ്. ഇനി പറയുന്ന ലിങ്കുകളില് അവ ലഭ്യമാകും.
Comments