ചൈനീസ് റോക്കറ്റ് വീണത് കേരളത്തിന് തൊട്ടടുത്ത്, ദുരന്തം ഒഴിവായത് തലനാരിഴക്ക്
Metbeat Weather Desk
നിയന്ത്രണം വിട്ട ചൈനീസ് റോക്കറ്റ് വീണത് കേരളത്തിന് തൊട്ടടുത്ത്. തലനാരിഴക്കാണ് ദുരന്തം ഒഴിവായത്. ലഭ്യമായ ഡാറ്റ വിലയിരുത്തുമ്പോള് ഇന്ന് രാവിലെ ഇന്ത്യന് സമയം 7.44 ന് മാലദ്വീപിന് വടക്കായാണ് റോക്കറ്റ് കടലില് പതിച്ചതെന്നാണ് വിവിധ ഏജന്സികള് സ്ഥിരീകരിക്കുന്നത്. ഈ പ്രദേശത്തേക്ക് തിരുവനന്തപുരത്ത് നിന്ന് ഏകദേശം 724 കി.മി ഉള്ളൂവെന്നാണ് ഞങ്ങളുടെ നിരീക്ഷകര് പറയുന്നത്. കേരളത്തേക്കാള് മാലദ്വീപാണ് ദുരന്തത്തില് നിന്ന് ഒഴിവായത്. ചൈന ഉള്പ്പെടെയുള്ള ബഹിരാകാശ ശാസ്ത്രജ്ഞരുടെ കണക്കുകൂട്ടലുകള് തെറ്റിച്ചാണ് റോക്കറ്റ് ഇന്ത്യന് മഹാസമുദ്രത്തില് വീണത്. ഇന്ന് വരെ റോക്കറ്റ് കടന്നുപോകുന്ന പാത കഴിഞ്ഞ ദിവസം പ്രവചിക്കപ്പെട്ടിരുന്നു. ഇതില് ഇന്ത്യയും ഉള്പ്പെടുമെന്ന് കഴിഞ്ഞ ദിവസം മെറ്റ്ബീറ്റ് വെതറിന്റെ റിപ്പോര്ട്ടില് പരാമര്ശിച്ചിരുന്നു.
ഒഴിവായത് ആശങ്ക, ആശ്വാസമായി ലോകം
ഇന്ന് ഭൂമിലേക്ക് എത്തുമെന്നായിരുന്നു ഇന്നലെ രാത്രി വൈകിവരെയുള്ള പ്രവചനം. ഇന്നലെ അര്ധരാത്രി കഴിഞ്ഞ് മെറ്റ്ബീറ്റ് വെതര് ടീം റിപ്പോര്ട്ട് തയാറാക്കുമ്പോള് റോക്കറ്റ് ഭൂമിക്ക് 150 കി.മി ഉയരത്തിലെത്തിയിരുന്നു. 100 കി.മി ല് അന്തരീക്ഷത്തിലെ വായുമണ്ഡലത്തില് എത്തുമ്പോഴാണ് വായുവിന്റെ ഘര്ഷണം മൂലം തീപിടിച്ച് താഴേക്ക് വരുന്നത്. ഭൂഗുരുത്വാകര്ഷണം വേഗതയും വര്ധിപ്പിക്കും. നിമിഷങ്ങള്ക്കകം ഭൂമിയിലെത്തും എന്നായിരുന്നു ഇന്നലത്തെ നിരീക്ഷണം. 150 കി.മി ഉയരത്തില് ദീര്ഘവൃത്താകൃതിയിലാണ് ഇത് ഭൂമിയെ ചുറ്റിയിരുന്നത്. വേഗത 27,657 കി.മി ആയിരുന്നു. തുടര്ന്ന് ഭൗമമണ്ഡലത്തിലേക്ക് പ്രവേശിച്ചപ്പോള് മണിക്കൂറില് 28,043 കി.മി ആയിരുന്നു വേഗത. ഏപ്രില് 29 നാണ് 22.5 ടണ് ഭാരമുള്ള ഷാങ് സെങ് എന്ന സി.ഇസെഡ് -5 ബി റോക്കറ്റ് ചൈന വിക്ഷേപിച്ചത്. 340 നും 450 നും കി.മി ഉയരത്തിലുള്ള ഭ്രമണപഥത്തില് ആയിരുന്നു ഇതിന്റെ സഞ്ചാരപഥം. ബഹിരാകാശത്ത് നിയന്ത്രണം നഷ്ടപ്പെട്ട റോക്കറ്റ് ഭാഗം മെയ് നാലിന് 300 കി.മി ഉയരത്തില് വച്ച് താഴേക്ക് പോന്നു. ഇന്ത്യ ഉള്പ്പെടെയുള്ള രാജ്യങ്ങള് ഭീഷണിയിലായെങ്കിലും ഒടുവില് കടലില് പതിച്ചത് ആശ്വാസമാണ്.
പ്രവചനം തെറ്റിച്ച് കടലില് പതിച്ചു
വിവിധ ബഹിരാകാശ ഏജന്സികളുടെ പ്രവചനം തെറ്റിച്ചാണ് റോക്കറ്റ് കടലില് പതിച്ചത്. കടലില് പതിക്കുമെന്നായിരുന്നു നേരത്തെ ചൈനീസ് ഏജന്സിയുടെ നിഗമനം. നാശനഷ്ടങ്ങളുണ്ടാകില്ലെന്നും അന്തരീക്ഷത്തില് വച്ചുതന്നെ കത്തിത്തീരുമെന്നും അവര് പറഞ്ഞു. പക്ഷേ ഇന്ത്യക്ക് സമീപം കടലില് വീഴുമെന്ന് ആരും പ്രവചിച്ചില്ല. ഇന്തോനേഷ്യക്ക് സമീപം കടലില് വീഴുമെന്നാണ് റഷ്യന് ഏജന്സി ഇന്നലെ പുലര്ച്ചെ പ്രവചിച്ചത്. റോക്കറ്റിന്റെ വേഗത കൃത്യമായി മനസിലാക്കാന് കഴിയാത്തതാണ് പ്രവചനം തെറ്റിച്ചത്. അതിവേഗത്തിലുള്ള റോക്കറ്റ് ഓരോ മിനുട്ടിലും സഞ്ചരിക്കുന്നത് നൂറു കണക്കിന് കിലോമീറ്ററുകളാണ്. റോക്കറ്റ് വീഴുന്ന സ്ഥലത്തെ കുറിച്ച് യു.എസ്, യൂറോപ്യന് സ്പേസ് ഏജന്സികള് പ്രവചിച്ചതും പാളി. റോക്കറ്റിന്റെ ഭാഗം ഭൂരിഭാഗവും കത്തിത്തീര്ന്ന ശേഷമാണ് കടലില് പതിച്ചതെന്നാണ് ചൈനീസ് ഏജന്സി അറിയിച്ചത്. മാലദ്വീപില് റോക്കറ്റ് അവശിഷ്ടം വീണോ എന്നും വ്യക്തമല്ല. മാലദ്വീപിനടുത്ത് കടലില് വീണില്ലെങ്കില് കേരളമോ തമിഴ്നാടോ ആകുമായിരുന്നു അടുത്ത ലക്ഷ്യസ്ഥാനം.
നിങ്ങളുടെ പ്രദേശത്തെ കാലാവസ്ഥാ പ്രവചനം ലൊക്കേഷന് അടിസ്ഥാനമാക്കി കൂടുതല് കൃത്യതയോടെ അറിയാന് ഞങ്ങളുടെ മൊബൈല് ആപ്പ് ഇന്സ്റ്റാള് ചെയ്യുക. അതിനായി ഇവിടെ ക്ലിക്ക് ചെയ്യുക.
Comments