WEATHER NEWS AND ANALYSIS
കേരളത്തില് ഒറ്റപ്പെട്ട വേനല് മഴ, ഉത്തരേന്ത്യ കൊടുംചൂടിലേക്ക്
April 25, 2021, 3:08 p.m.
Metbeat Weather Desk
ഒറ്റപ്പെട്ട പ്രദേശങ്ങളില് ഏറെ നേരം നീണ്ടു നില്ക്കാത്ത വേനല് മഴ സംസ്ഥാനത്ത് തുടരും. കേരളത്തില് ശക്തമായതോ പരക്കെയോ ഉള്ള മഴ സാധ്യതയില്ല. കിഴക്കന് മലയോര മേഖലകളിലാണ് കൂടുതലും മഴ സാധ്യത. തെക്ക്-വടക്ക് ന്യൂനമര്ദ പാത്തിയുടെ സ്വാധീനം നിലനില്ക്കുന്നതിനാല് കേരളത്തിന്റെ അതിര്ത്തി മേഖലകളിലും ഇടനാട്ടിലും മഴ സാധ്യത നിലനില്ക്കുന്നു. തമിഴ്നാട്, കര്ണാടക സംസ്ഥാനങ്ങളിലും ഇടിയോടുകൂടെ മഴയുണ്ടാകും.
അന്തരീക്ഷസ്ഥിതി അവലോകനം
കര്ണാടകക്കു മുകളിലൂടെ തമിഴ്നാടിനു കുറകെ ന്യൂനമര്ദപാത്തി രൂപപ്പെട്ടിട്ടുണ്ട്. ഇതാണ് മഴക്ക് സാഹചര്യം ഒരുക്കുക. കാസര്കോട്, കണ്ണൂര്, വയനാട്, മലപ്പുറം, പാലക്കാട്, തൃശൂര്, എറണാകുളം, ആലപ്പുഴ, കോട്ടയം, പത്തനംതിട്ട ജില്ലകളിലാണ് ഇന്ന് മഴ പ്രതീക്ഷിക്കുന്നത്. മലപ്പുറം ജില്ലയുടെ കിഴക്കന് മലയോരം, വയനാട്- തമിഴ്നാട് അതിര്ത്തി മേഖല, ഇടുക്കി ജില്ലയുടെ കിഴക്ക് എന്നിവിടങ്ങളില് ഇന്ന് (ഞായര്) ഉച്ചയ്ക്ക് ശേഷം മഴ പ്രതീക്ഷിക്കാം. രാത്രിയോടെ തീരദേശത്തും മഴക്ക് അനുകൂലമായ അന്തരീക്ഷസ്ഥിതിയൊരുങ്ങും. അറബിക്കടലിലെ മേഘങ്ങള് കരതൊടാന് വെയില്ചൂട് മാറേണ്ടിവരും. മറ്റ് ഘടകങ്ങള് കൂടി അനുകൂലമായാല് നേരിയ തോതിലെങ്കിലും മഴ ലഭിക്കും.
ഉത്തരേന്ത്യ ചൂടിലേക്ക്
കൊവിഡ് പ്രതിസന്ധിയില് വലയുന്ന ഉത്തരേന്ത്യന് സംസ്ഥാനങ്ങളില് ചൂട് കൂടുന്നു. പകല്താപനില 40 ഡിഗ്രിയിലേക്ക് മിക്ക സംസ്ഥാനങ്ങളിലും എത്തും. ഗുജറാത്തിലാണ് കൂടുതല് ചൂട് രേഖപ്പെടുത്തുന്നത്. വടക്ക്, മധ്യ ഇന്ത്യന് സംസ്ഥാനങ്ങളിലും ചൂട് കൂടുന്ന ട്രെന്റാണുള്ളത്. ഡല്ഹി, ഹരിയാന, പഞ്ചാബ്, ഉത്തര് പ്രദേശ്, മധ്യപ്രദേശ്, മഹാരാഷ്ട്ര, ചത്തീസ്ഗഢ് സംസ്ഥാനങ്ങളില് 40 ഡിഗ്രിക്കു മുകളിലാകും താപനില.
Photo- Shynu Abraham
നിങ്ങളുടെ പ്രദേശത്തെ കാലാവസ്ഥാ പ്രവചനം ലൊക്കേഷന് അടിസ്ഥാനമാക്കി കൂടുതല് കൃത്യതയോടെ അറിയാന് ഞങ്ങളുടെ മൊബൈല് ആപ്പ് ഇന്സ്റ്റാള് ചെയ്യുക. അതിനായി ഇവിടെ ക്ലിക്ക് ചെയ്യുക.
Comments