April 20, 2021, 4:34 p.m.

Metbeat Weather Desk
വേനല്‍ മഴ ശക്തിപ്പെടാത്ത വടക്കന്‍ കേരളത്തില്‍ കൂടുതല്‍ മഴ ലഭിക്കാനുള്ള സാഹചര്യം ഒരുങ്ങുന്നു. സാധാരണ തെക്കന്‍ ജില്ലകളിലാണ് കൂടുതല്‍ വേനല്‍മഴ പെയ്യുക. ഇത്തവണ മധ്യ, തെക്കന്‍ കേരളം കേന്ദ്രീകരിച്ചാണ് കൂടുതല്‍ മഴ ലഭിച്ചത്. തൃശൂര്‍ മുതല്‍ കോഴിക്കോട് വരെയുള്ള ജില്ലകളില്‍ വേനല്‍ മഴ ലഭിച്ചപ്പോഴും കണ്ണൂര്‍, കാസര്‍കോട് ജില്ലക്കാര്‍ക്ക് മഴ ലഭിക്കാത്ത സാഹചര്യമുണ്ടായി. ശരാശരി കണക്കു നോക്കുമ്പോള്‍ ഈ ജില്ലകളില്‍ മഴക്കുറവില്ലെങ്കിലും മഴ കുറവാണെന്ന പരാതിയായിരുന്നു വടക്കന്‍ ജില്ലക്കാര്‍ക്ക്. 

വടക്കോട്ട് മഴ എത്തുന്നു
ഇനിയുള്ള ദിവസങ്ങളില്‍ വടക്കന്‍ കേരളത്തില്‍ കൂടുതല്‍ മഴക്കുള്ള സാധ്യതയാണ് അന്തരീക്ഷസ്ഥിതി അവലോകന പ്രകാരം കാണുന്നത്. കാസര്‍കോട് മുതല്‍ കോഴിക്കോട് വരെയുള്ള ജില്ലകള്‍ക്ക് മഴ ലഭിക്കും. ഒപ്പം മറ്റു ജില്ലകളിലും ഒറ്റപ്പെട്ട വേനല്‍ മഴ തുടരും. ചൊവ്വാഴ്ച പുലര്‍ച്ചെ കേരളത്തില്‍ പരക്കെ മഴ ലഭിച്ചിരുന്നു. ശക്തമായ മഴ വടക്കന്‍ കേരളത്തിലും ലഭിച്ചു. 

മേഘാവൃതം മഴ പെയ്യുമോ?
പകല്‍ മുഴുവന്‍ മേഘാവൃതമായ സാഹചര്യത്തിലും കേരളത്തില്‍ എവിടെയും എടുത്തുപറത്തക്കവണ്ണം മഴ ഇന്ന് ലഭിച്ചില്ല. കേരളത്തിനു മുകളിലും അറബിക്കടലിലുമായി മേഘസാന്നിധ്യം ശക്തമാണ്. എന്നാല്‍ കരയിലെയും കടലിലെയും മര്‍ദവ്യതിയാനം കാറ്റിന്റെ വേഗത തുടങ്ങിയവ മഴക്ക് തടസ്സമായെന്ന് ഞങ്ങളുടെ നിരീക്ഷകര്‍ പറയുന്നു. രാത്രിയോടെ കാറ്റിന്റെ ദിശ അനുകൂലമാകുകയും മഴക്ക് സാധ്യത ഒരുങ്ങുകയും ചെയ്യും. വടക്കന്‍ കേരളത്തിലാണ് കൂടുതല്‍ മഴ സാധ്യത. ഇന്ന് (ചൊവ്വ) പുലര്‍ച്ചെ അഭിസരണ രേഖ ഉടലെടുത്തതും അറബിക്കടലിലെ അതിമര്‍ദ മേഖലയുമാണ് കേരളത്തില്‍ പരക്കെ മഴ നല്‍കിയത്. അന്തരീക്ഷസ്ഥിതിയിലെ പെട്ടെന്നുള്ള മാറ്റങ്ങളാണ് പ്രവചനാതീതമായ കാലാവസ്ഥക്ക് കാരണം. മംഗലാപുരം, ഉടുപ്പി, മൂഡബിദ്രി തുടങ്ങിയ കര്‍ണാടക നഗരങ്ങളില്‍ വൈകിട്ട് തുടങ്ങുന്ന മഴ കാസര്‍കോട് ജില്ലയിലേക്കും വ്യാപിക്കും. 
Photo- Nidheesh Krishnan
നിങ്ങളുടെ പ്രദേശത്തെ കാലാവസ്ഥാ പ്രവചനം ലൊക്കേഷന്‍ അടിസ്ഥാനമാക്കി കൂടുതല്‍ കൃത്യതയോടെ അറിയാന്‍ ഞങ്ങളുടെ മൊബൈല്‍ ആപ്പ് ഇന്‍സ്റ്റാള്‍ ചെയ്യുക. അതിനായി ഇവിടെ ക്ലിക്ക് ചെയ്യുക.