വേനല് മഴ തുടരും, ഇതുവരെ 44 ശതമാനം കൂടുതല്
Metbeat Weather Desk
കേരളത്തില് വേനല് മഴ തുടരും. പരക്കെ മഴയുണ്ടാവില്ലെങ്കിലും ഒറ്റപ്പെട്ട പ്രദേശങ്ങള് കേന്ദ്രീകരിച്ച് ഓരോ ദിവസവും മഴയുണ്ടാകും. വേനല്മഴ മെയ് അവസാനം വരെ തുടരാനുള്ള അന്തരീക്ഷസ്ഥിതിയാണുള്ളതെന്നും റെക്കോര്ഡ് മഴയിലേക്ക് നീങ്ങാമെന്നും മെറ്റ്ബീറ്റ് വെതറിലെ നിരീക്ഷകര് പറയുന്നു. ഈ വേനലില് വരള്ച്ചാ സാഹചര്യം ഉണ്ടാകില്ല. കിഴക്കന് മേഖലകളിലും മറ്റു പ്രദേശങ്ങളിലും വ്യത്യസ്ത ദിവസങ്ങളിലായി മഴ കേന്ദ്രീകരിക്കും. അടുത്ത ആഴ്ചകളിലായി കിഴക്കന് മേഖലകളില് മഴ ശക്തിപ്പെടാനും ഡാമുകളിലേക്ക് നീരൊഴുക്ക് കൂടാനും സാധ്യതയുണ്ട്. മെയ് മാസത്തിലും കേരളത്തില് ശരാശരിയേക്കാള് കൂടുതല് വേനല്മഴയാണ് പ്രതീക്ഷിക്കുന്നത്.
ഇതുവരെ 44 ശതമാനം മഴക്കൂടുതല്
മാര്ച്ച് 1 മുതല് ഇന്നു വരെ കേരളത്തില് 44 ശതമാനം മഴ കൂടുതല്. കേന്ദ്ര കാലാവസ്ഥാ വകുപ്പിന്റെ കണക്ക് പ്രകാരമാണിത്. ഏറ്റവും കൂടുതല് വേനല് മഴ ലഭിച്ചത് പത്തനംതിട്ട ജില്ലയിലാണ്. 112 ശതമാനം മഴയാണ് ഇവിടെ അധികമായി ലഭിച്ചത്. എറണാകുളം 104 ശതമാനം അധികമഴയുമായി രണ്ടാം സ്ഥാനത്തുണ്ട്്. കേരളത്തിലെവിടെയും മഴക്കുറവില്ല. തിരുവനന്തപുരം, കൊല്ലം, മലപ്പുറം, ആലപ്പുഴ ജില്ലകളിലാണ് താരതമ്യേന മഴ മറ്റു ജില്ലകളെ അപേക്ഷിച്ച് കുറവ്. എങ്കിലും ഇവിടെ സാധാരണ തോതിലാണ് മഴ ലഭിച്ചിട്ടുള്ളത്.
അന്തരീക്ഷസ്ഥിതി അവലോകനം
സംസ്ഥാനത്ത് മഴക്ക് അനുകൂല അന്തരീക്ഷസ്ഥിതിയാണ് നിലവിലുള്ളത്. ഈര്പ്പസാന്നിധ്യമുള്ള വായുപ്രവാഹം, കാറ്റിന്റെ ദിശ, വേഗത, അന്തരീക്ഷ നീരൊഴുക്കുകള് തുടങ്ങിയ ഘടകങ്ങള് മഴ നല്കാന് പര്യാപ്തമാണ്. കേരളത്തിനു മുകളില് ചക്രവാതച്ചുഴി രൂപപ്പെട്ടതും തമിഴ്നാടിനു മുകളിലെ ന്യൂനമര്ദപാത്തിയും മണ്സൂണ് കാലത്തെ അനുസ്മരിപ്പിക്കും വിധം പുലര്ച്ചെ മഴക്കും മേഘാവൃതമായ അന്തരീക്ഷത്തിനും കാരണമാകും. കേരളത്തിന്റെ പടിഞ്ഞാറന് തീരം, ഇടനാട് എന്നിവിടങ്ങളില് പുലര്ച്ചെയും രാവിലെയും മഴ ലഭിക്കാന് അനുകൂലമാണിത്. ഈ സാഹചര്യം ഏതാനും ദിവസം കൂടി തുടരുമെന്നാണ് ഞങ്ങളുടെ നിരീക്ഷകരുടെ അനുമാനം. സംസ്ഥാനത്തെ കാലാവസ്ഥാ വകുപ്പിന്റെയും സ്വാകാര്യ വെതര് കമ്പനികളുടേയും മിക്ക സ്റ്റേഷനുകളിലും കഴിഞ്ഞ ദിവസം മഴ രേഖപ്പെടുത്തിയിട്ടുണ്ട്. അന്തരീക്ഷ താപനിലയില് ഗണ്യമായ കുറവും ഉണ്ട്. വൈകുന്നേരങ്ങളിലും രാത്രിയും കിഴക്കന് മേഖലകള് കേന്ദ്രീകരിച്ച് പതിവ് വേനല് മഴയും തുടരും. മഴക്കൊപ്പം ഇടിമിന്നലും മണിക്കൂറില് 40 കി.മി വേഗത്തില് വരെയുള്ള കാറ്റും പ്രതീക്ഷിക്കണം. ആവശ്യമായ മുന്കരുതലുകളെടുത്ത് കൃഷി നാശവും മിന്നല് ദുരന്തങ്ങളും തടയാന് ഓരോരുത്തരും സ്വയം ജാഗ്രത പുലര്ത്തുകയാണ് വേണ്ടത്. കാലാവസ്ഥാ മുന്നറിയിപ്പുകള് അവഗണിക്കാതെ കൃത്യമായ ഇടവേളകളില് സ്വയം അപ്ഡേറ്റ് ചെയ്യുകയാണ് ഇതിനു വേണ്ടത്. മെറ്റ്ബീറ്റ് വെതറിന്റെ വെബ്സൈറ്റ്, ഫേസ്ബുക്ക് പേജ്, ആന്ഡ്രോയ്ഡ് ആപ്പ് എന്നിവയില് വിശദമായ അവലകോനങ്ങളും തല്സ്ഥിതി വിവരങ്ങളും പ്രവചനങ്ങളും ലഭിക്കും.
Photo- Praveen P Prabhakar
നിങ്ങളുടെ പ്രദേശത്തെ കാലാവസ്ഥാ പ്രവചനം ലൊക്കേഷന് അടിസ്ഥാനമാക്കി കൂടുതല് കൃത്യതയോടെ അറിയാന് ഞങ്ങളുടെ മൊബൈല് ആപ്പ് ഇന്സ്റ്റാള് ചെയ്യുക. അതിനായി ഇവിടെ ക്ലിക്ക് ചെയ്യുക.
Comments