ഒറ്റപ്പെട്ട മഴയും ശക്തമായ ഇടിമിന്നലും തുടരും
Metbeat Weather Desk
കേരളത്തില്‍ അടുത്ത നാലു ദിവസം ഇടിയോടുകൂടെയുള്ള വേനല്‍ മഴ ശക്തമാകും. ഇന്നും വിവിധ ജില്ലകളില്‍ മഴ ലഭിക്കുമെങ്കിലും ഇന്നലത്തെയത്ര ശക്തമായ മഴ പ്രതീക്ഷിക്കുന്നില്ല. എന്നാല്‍ പ്രാദേശികാടിസ്ഥാനത്തില്‍ ശക്തമായ ഇടിമിന്നല്‍ സാധ്യത നിലനില്‍ക്കുന്നുമുണ്ട്. ഇന്നലെ മൂന്നു പേരാണ് സംസ്ഥാനത്ത് ഇടിമിന്നലേറ്റ് മരിച്ചത്. മുന്‍കരുതലുകള്‍ സ്വീകരിച്ച് ഇടിമിന്നല്‍ ദുരന്തങ്ങളെ തടയാന്‍ എല്ലാവരും ജാഗ്രത പുലര്‍ത്തണം. ഇടിമിന്നല്‍ ജാഗ്രതയെ കുറിച്ചറിയാന്‍ ഇതോടൊപ്പമുള്ള വിഡിയോ കാണുക.
അന്തരീക്ഷസ്ഥിതി അവലോകനം
കേരളത്തില്‍ ഒറ്റപ്പെട്ട പ്രദേശങ്ങളില്‍ ശക്തമായ മഴക്കും ഇടിമിന്നലിനും ഉള്ള സാധ്യത നിലനില്‍ക്കുന്നു. തെക്കന്‍ കേരളം മുതല്‍ കൊങ്കണ്‍ വരെ സമുദ്രനിരപ്പില്‍ നിന്ന് 0.9 കി.മി ഉയരത്തിലായി ന്യൂനമര്‍ദ പാത്തി രൂപപ്പെട്ടിട്ടുണ്ട്. നാളെ വിഷുദിനത്തിലും തുടര്‍ന്നുള്ള ദിവസങ്ങളിലും കൂടുതല്‍ പ്രദേശങ്ങളില്‍ ശക്തമായ ഇടിമിന്നലും മഴയും ലഭിക്കാന്‍ അനുകൂലമായ അന്തരീക്ഷസ്ഥിതിയുണ്ടെന്ന് മെറ്റ്ബീറ്റ് വെതറിലെ നിരീക്ഷകര്‍ പറയുന്നു. ഇന്നും നാളെയും കന്യാകുമാരി കടലിലും തെക്കുകിഴക്കന്‍ അറബിക്കടലിലും കാറ്റിന്റെ ചുഴിയും നിലകൊള്ളുന്നത് കേരളത്തില്‍ മഴക്ക് അനുകൂലമായ സാഹചര്യം ഒരുക്കും. കേരളത്തിനു കുറുകെ പോകുന്ന കാറ്റില്‍ ഈര്‍പ്പ സാന്നിധ്യം കൂടുതലാണ്. ന്യൂനമര്‍ദപാത്തി മേഘങ്ങളെ കേന്ദ്രീകിക്കും. തെക്കന്‍ കേരളത്തില്‍ കാറ്റിന്റെ ഗതിമുറിവും ദൃശ്യമാണ്. ഇന്ന് കൂടുതല്‍ മഴ തെക്കന്‍ ജില്ലകളിലാകും. മഴ തുടങ്ങാന്‍ അല്‍പം വൈകുമെങ്കിലും മഴ തണുപ്പിച്ച രാത്രിയാകും മിക്ക ജില്ലകളിലും ഇന്ന്. കഴിഞ്ഞ ദിവസങ്ങളിലെ വിശകലനങ്ങളില്‍ വ്യക്തമാക്കിയതുപോലെ 10 ദിവസത്തില്‍ കൂടുതല്‍ വേനല്‍മഴ സജീവമായി നിലകൊള്ളുന്ന അന്തരീക്ഷ സാഹചര്യമാണ് മുന്നിലുള്ളതെന്നും ഇടിമിന്നല്‍ അപകടങ്ങളെ കരുതിയിരിക്കണമെന്നും ഞങ്ങളുടെ സ്ഥാപകന്‍ വെതര്‍മാന്‍ കേരള പറഞ്ഞു.
ഇന്നും നാളെയും മഴ എവിടെയൊക്കെ
ഇന്ന് മര്‍ദവ്യതിയാനത്തെ തുടര്‍ന്ന് എറണാകുളം മുതല്‍ തിരുവനന്തപുരം വരെയുള്ള ജില്ലകളില്‍ ശക്തമായതോ ഇടത്തരമോ ആയ മഴക്ക് സാധ്യതയുണ്ട്. വടക്കന്‍ ജില്ലകളില്‍ ഒറ്റപ്പെട്ട മഴയായിരിക്കും. ഏറെ നേരം നീണ്ടു നില്‍ക്കാത്ത ഇടത്തരം മഴ വടക്കന്‍ ജില്ലകളില്‍ പെയ്യുന്നതൊഴിച്ചാല്‍ പൊതുവെ മഴ കുറവാകും. നാളെ കാസര്‍കോട്, കണ്ണൂര്‍, വയനാട്, പാലക്കാട്, മലപ്പുറം, തൃശൂര്‍, എറണാകുളം, ഇടുക്കി, കോട്ടയം, പത്തനംതിട്ട, ആലപ്പുഴ, കൊല്ലം, തിരുവനന്തപുരം ജില്ലകളില്‍ ഒറ്റപ്പെട്ട ഇടത്തരം അല്ലെങ്കില്‍ ശക്തമായ മഴ പ്രതീക്ഷിക്കാം. കോഴിക്കോട്, മലപ്പുറം ജില്ലയുടെ തീരദേശം, കണ്ണൂരിന്റെ തെക്കു, കിഴക്കന്‍ മേഖലയില്‍ ചാറ്റല്‍ മഴയോ ഇടത്തരം മഴയോ പ്രതീക്ഷിച്ചാല്‍ മതി.
ഇടിമിന്നല്‍ സാധ്യതാ മേഖലകള്‍
ഇന്ന് വൈകിട്ട് ആറോടെ ഇടത്തരം ഇടിമിന്നല്‍ സാധ്യത മിക്ക ജില്ലകളിലുമുണ്ട്. രാത്രിയോടെ തൃശൂര്‍, പാലക്കാട് ജില്ലാ അതിര്‍ത്തി, എറണാകുളം- തൃശൂര്‍ ജില്ലാ അതിര്‍ത്തി, ആലപ്പുഴ, മലപ്പുറം ജില്ലയുടെ തെക്കുകിഴക്ക് മേഖല എന്നിവിടങ്ങളില്‍ ഇടിമിന്നല്‍ സാധ്യത കൂടുതലാണ്. തൃശൂര്‍, പാലക്കാട് ജില്ലകളിലും മിന്നല്‍ സാധ്യതയുണ്ട്. നാളെ വൈകിട്ട് കേരളത്തിന്റെ മലയോര ഇടനാട് പ്രദേശങ്ങളിലും തമിഴ്‌നാട്ടിലും കര്‍ണാടകയിലും ഇടിമിന്നല്‍ സാധ്യതയുണ്ട്.
ഇടിമിന്നല്‍ തടയാന്‍ ഈ നിര്‍ദേശങ്ങള്‍ പാലിക്കാം
1. ഇപ്പോള്‍ പെയ്യുന്ന മഴക്കൊപ്പം ഇടിമിന്നല്‍ സാധ്യത നിലനില്‍ക്കുന്നതിനാല്‍ ജാഗ്രത പുലര്‍ത്തണം
2. ഉച്ചക്ക് രണ്ടു മുതല്‍ രാത്രി 10 വരെ അന്തരീക്ഷം മേഘാവൃതമാണെങ്കില്‍ തുറസായ സ്ഥലത്തും ടെറസിലും കുട്ടികള്‍ കളിക്കുന്നത് തടയുക
3. ഇടിമിന്നലിന്റെ ആദ്യ ലക്ഷണം കണ്ടുതുടങ്ങിയാല്‍ ഉടന്‍ സുരക്ഷിതമായ കെട്ടിടത്തിനു ഉള്ളിലേക്ക് മാറുക
4. മഴക്കാറ് കാണുമ്പോള്‍ തുണികള്‍ എടുക്കാന്‍ ടെറസിലേക്കോ മുറ്റത്തോ ഇടിമിന്നല്‍ സമയത്ത് പോകരുത്.
5. ഗൃഹോപകരണങ്ങളുടെ വൈദ്യുതി ബന്ധം വിച്ഛേദിക്കണം
6. ജനലും വാതിലും അടച്ചിടണം
7. ലോഹവസ്തുക്കളുടെയും വൈദ്യുതി ഉപകരണങ്ങളുടെയും സമീപം നില്‍ക്കരുത്
8. ടെലിഫോണ്‍ ഉപയോഗിക്കരുത്
9. ഇടിമിന്നല്‍ ഉള്ളപ്പോള്‍ കുളിക്കുന്നത് സുരക്ഷിതമല്ല
10. ടെറസിലോ, ഉയരമുള്ള സ്ഥലത്തോ, തുറസായ സ്ഥലത്തോ വൃക്ഷത്തിനു ചുവട്ടിലോ നില്‍ക്കരുത്
11. ജലാശയത്തില്‍ ഇറങ്ങുന്നതും നീന്തുന്നതും സുരക്ഷിതമല്ല
12. പട്ടം പറത്തരുത്
13. തെരഞ്ഞെടുപ്പ് പ്രചാരണത്തില്‍ ഏര്‍പ്പെടുന്നവര്‍ മൈക്ക് ഉപയോഗിക്കുന്നത് സുരക്ഷിതമല്ല
14. തുറസായ സ്ഥലത്ത് അകപ്പെട്ടാല്‍ പാദങ്ങള്‍ ചേര്‍ത്തുവച്ച് തല കാല്‍മുട്ടുകള്‍ക്ക് ഇടയില്‍ ഒതുക്കി പന്തുപോലെ ഉരുണ്ട് ഇരിക്കുക
15. മിന്നല്‍ രക്ഷാചാലകം കെട്ടിടങ്ങളെയും അവയ്ക്കുള്ളിലുള്ളവരെയും മിന്നലില്‍ നിന്ന് സംരക്ഷിക്കും
16. വൈദ്യുതോപകരണങ്ങളുടെ സുരക്ഷയ്ക്കായി സര്‍ജ് പ്രൊട്ടക്ടര്‍ ഉപയോഗിക്കാം
17. മിന്നലേറ്റയാളുടെ ശരീരത്തില്‍ വൈദ്യുതി ഇല്ലെന്ന് മനസിലാക്കുക. ഉടന്‍ വൈദ്യസഹായം നല്‍കുക. ആദ്യ 30 സെക്കന്റില്‍ പ്രഥമ ശുശ്രൂഷ നല്‍കിയാല്‍ ജീവന്‍ രക്ഷിക്കാനാകും.
എല്ലാവര്‍ക്കും മെറ്റ്ബീറ്റ് വെതറിന്റെ റമദാന്‍, വിഷു ആശംസകള്‍
നിങ്ങളുടെ പ്രദേശത്തെ കാലാവസ്ഥാ പ്രവചനം ലൊക്കേഷന്‍ അടിസ്ഥാനമാക്കി കൂടുതല്‍ കൃത്യതയോടെ അറിയാന്‍ ഞങ്ങളുടെ മൊബൈല്‍ ആപ്പ് ഇന്‍സ്റ്റാള്‍ ചെയ്യുക. അതിനായി ഇവിടെ ക്ലിക്ക് ചെയ്യുക.
Comments