സൂയസില് ഭീമന് കപ്പലിനെ നിയന്ത്രണം തെറ്റിച്ചത് 73 കി.മി വേഗതയുള്ള മണല്ക്കാറ്റ്
Metbeat Weather Desk
സൂയസ് കനാലില് മാര്ച്ച് 23 മുതല് എവര്ഗിവണ് എന്ന വന് കണ്ടെയ്നര് കപ്പല് കുടുങ്ങിക്കിടന്നതുമായി ബന്ധപ്പെട്ട പ്രതിസന്ധി പരിഹരിക്കപ്പെട്ടു. കനാലിന്റെ തീരത്തെ മണല്ത്തിട്ടയിലേക്ക് കനത്ത കാറ്റില് ഇടിച്ചുകയറിയ കപ്പല് ലക്ഷക്കണക്കിന് ഡോളറിന്റെ നഷ്ടമാണ് വ്യാപാര മേഖലയുണ്ടാക്കിയത്. ആഗോള വ്യാപാരത്തിന്റെ 10 ശതമാനവും 193.05 കി.മി നീളമുള്ള മനുഷ്യനിര്മിത കനാലിലൂടെയാണ്. ഒരോ ദിവസവും 50 കപ്പലുകള് 9.6 ബില്യന് ഡോളറിന്റെ ചരക്കുമായി ഇതുവഴി എളുപ്പത്തില് യൂറോപ്-ഏഷ്യ വന്കരകളിലേക്ക് കടന്നു പോകുന്നു. 1859 ല് നിര്മാണം ആരംഭിച്ച കനാല് 10 വര്ഷം കൊണ്ടാണ് പൂര്ത്തിയായത്. കപ്പല്പാത തടസ്സപ്പെട്ടതിനു കാരണം കാലാവസ്ഥാ പരമായ മാറ്റമാണ്. എന്താണ് അതെന്ന് വിലയിരുത്തുകയാണ് ഇവിടെ.
മധ്യധരണ്യാഴിയും ചെങ്കടലും
പശ്ചിമവാതം ഉള്പ്പെടെ ഇന്ത്യയില് കാലാവസ്ഥാ മാറ്റം ഉണ്ടാക്കുന്നത് മധ്യധരണ്യാഴി എന്ന മെഡിറ്റേറിയന് കടലില് നിന്നുള്ള കാറ്റാണ് എന്നറിയാമല്ലോ. സൗദിക്ക് പടിഞ്ഞാറായി ചെങ്കടലുമുണ്ട്. ഇവ തമ്മില് ബന്ധിപ്പിക്കുന്നതാണ് സൂയസ് കനാല്. ആഫ്രിക്കന് തീരം ചുറ്റി 15000 മൈല് താണ്ടുന്നതിന് പകരം 200 കി.മി ല് താഴെയുള്ള ഈ ബൈപ്പാസ് കടന്നാല് മതി.
അപകട കാരണം മണല്ക്കാറ്റ്
സൂയസ് കനാല് അതോറിറ്റിയുടെ അന്വേഷണത്തില് അര കിലോമീറ്ററോളം നീളമുള്ള കപ്പല് നിയന്ത്രണം വിട്ട് മണല്ത്തിട്ടയില് ഇടിച്ചതിനു പിന്നില് ശക്തമായ മണല്ക്കാറ്റാണ്. ചൈനയിലെ യാന്റിയാനില് നിന്ന് ഡച്ച് തുറമുഖമായ റോട്ടാഡാമിലേക്ക് പോകുകയായിരുന്ന കപ്പല് മണല്ക്കാറ്റില്പ്പെട്ടു. 40 നോട്ടിക്കല് മൈല് ഏകദേശം 73 കി.മി ലധികം വേഗത്തിലായിരുന്നു കാറ്റ്. പൊടിമൂടിയതു കാരണം കാഴ്ചയും മറഞ്ഞു. കപ്പല് നിയന്ത്രണം വിട്ടു കരയിലിടിച്ചു നിന്നു. കനാല് കടന്നു പോകുന്നത് ഈജിപ്തിലൂടെയാണ്. ഇവിടെ പൊടിക്കാറ്റ് രൂക്ഷവുമാണ്. മരങ്ങള് പോലും കടപുഴകല് പതിവാണ്. മിഡില് ഈസ്റ്റിലും വടക്കന് ആഫ്രിക്കയിലും കാണുന്ന അപകടകരമായ മണല്ക്കാറ്റാണ് ഈ മേഖലയില് വീശുന്നത്.
എന്താണ് മണല്ക്കാറ്റ്, പ്രത്യാഘാതം എന്ത്
സിനായ് മരുഭൂമിയില് നിന്നാണ് ഈ മണല്ക്കാറ്റ് ഉത്ഭവിക്കുന്നത്. വരണ്ട മരുഭൂമിയിലെ ചൂടുള്ള വായുപ്രവാഹം ശക്തമായ കാറ്റുണ്ടാക്കുന്നു. ഒപ്പം താപസംവഹനംമൂലം ഇടിയും മഴയും പതിവാണ്. മണലിനെയും പൊടിപടലങ്ങളെയും വഹിച്ചുള്ള കാറ്റ് ആയിക്കണക്കിന് കിലോമീറ്റര് സഞ്ചരിക്കാറുണ്ട്. 10 മൈക്രോമീറ്ററിനും താഴെയുള്ള പൊടിപലങ്ങള് മനുഷ്യര്ക്ക് ഹാനികരമാണ്. തൊലിയിലെ അണുബാധ, കണ്ണിന് വേദന, ചൊറിച്ചില്, കണ്ജക്ടൈറ്റിസ്, ഓങ്കുലാര് ഇന്ഫെക്ഷന്, ആസ്തമ, ന്യൂമോണിയ, ശ്വാസകോശ രോഗങ്ങള്ക്ക് കാരണമാകും. മണല്ക്കാറ്റ് നിലച്ചാലും കൂറേ ദിവസങ്ങള് പൊടിപടലം അന്തരീക്ഷത്തില് കാണും. ചെടികളില് പറ്റിപ്പിടിക്കുന്ന പൊടി പ്രകാശസംശ്ലേഷണം കുറച്ച് കൃഷിയെയും ബാധിക്കും.
പ്രതിസന്ധി പരിഹരിച്ചു, ഇപ്പോഴത്തെ കാലാവസ്ഥ
സൂയസ് കനാലില് കുടുങ്ങിയ കപ്പല് 10 ടഗ് ബോട്ടുകളുടെ സഹായത്തോടെ വെള്ളത്തിലിറക്കി. 18,300 കണ്ടെയ്നറുകളായിരുന്നു കപ്പലില് ഉണ്ടായിരുന്നത്. ഇതിനു മുന്പ് 2004 ലാണ് അവസാനമായി കനാലില് തടസ്സമുണ്ടായത്. എണ്ണടാങ്കറാണ് അന്ന് കനാലില് കുടുങ്ങിയത്. പകരം കപ്പലുകള് പോയത് ആഫ്രിക്കന് മുനമ്പായ കേപ് ഓഫ് ഗുഡ് ഹോപ് ചുറ്റിയായിരുന്നു. 15 ദിവസം ആണ് ഇതുവഴി സഞ്ചരിക്കാന് അധിക സമയം എടുക്കുന്നത്. മെറ്റ്ബീറ്റ് വെതര് ആപ്പ് നല്കുന്ന വിവരം അനുസരിച്ച് ഇന്ന് (ചൊവ്വ) ഉച്ചയ്ക്ക് 12 ന് സൂയിസില് തെളിഞ്ഞ ആകാശമാണുള്ളത്. 14.71 ഡിഗ്രിയാണ് താപനില. 1018 ഹെക്ടോപാസ്ക്കല് മര്ദ്ദമുണ്ട്. 59 % ആണ് ഹ്യുമിഡിറ്റി. കാറ്റിന്റെ വേഗത 6.23 മീറ്റര് ആണ് സെക്കന്റില് . കാലാവസ്ഥാ പ്രവചനം കൃത്യമായി പാലിച്ചാല് ഇത്തരം ദുരന്തങ്ങള് മുന്നില്ക്കണ്ട് ഒഴിവാക്കാനാകും.
നിങ്ങളുടെ പ്രദേശത്തെ കാലാവസ്ഥാ പ്രവചനം ലൊക്കേഷന് അടിസ്ഥാനമാക്കി കൂടുതല് കൃത്യതയോടെ അറിയാന് ഞങ്ങളുടെ മൊബൈല് ആപ്പ് ഇന്സ്റ്റാള് ചെയ്യുക. അതിനായി ഇവിടെ ക്ലിക്ക് ചെയ്യുക.
Comments