Feb. 27, 2021, 6:47 p.m.

Agro Desk, Metbeat Weather
കേരളമുള്‍പ്പെടെ ദക്ഷിണേന്ത്യയില്‍ ജനുവരിയിലും ഫെബ്രുവരിയിലുമുണ്ടായ ശക്തമായ മഴ കരിനിഴല്‍ വീഴ്ത്തിയത് കര്‍ഷകരുടെ സ്വപ്‌നങ്ങളില്‍. മാമ്പഴ, കശുവണ്ടി കര്‍ഷകര്‍ക്കാണ് മഴ വില്ലനായത്. കൊവിഡ് പ്രതിസന്ധിയില്‍ നിന്ന് കരകയറാനൊരുങ്ങവെ കാലാവസ്ഥയിലെ മാറ്റം കര്‍ഷകര്‍ക്ക് ഇരുട്ടടിയായി. മാവ് പൂക്കുമ്പോള്‍ ഉണ്ടാകുന്ന മഴ പൂക്കള്‍ കൊഴിയാനും കായ്ഫലം കുറയാനും ഇടയാക്കും. കശുവണ്ടി കര്‍ഷകരും സമാന ദുരിതം നേരിടുകയാണ്. 

വെല്ലുവിളിയായി പ്രളയവും കാലാവസ്ഥാ മാറ്റവും
2018 ലെ പ്രളയത്തിനു ശേഷം പ്രളയബാധിത പ്രദേശങ്ങളില്‍ മാങ്ങയുടെ ഉത്പാദനം കുറഞ്ഞിട്ടുണ്ട്. മണ്ണിന്റെ ഘടനയിലുണ്ടായ മാറ്റമാണ് മറ്റു വിളകളിലെന്ന പോലെ മാമ്പഴ കൃഷിയെയും പ്രതികൂലമായി ബാധിച്ചത്. ഇതിനിടെയാണ് ഇപ്പോള്‍ മഴ വില്ലനായത്. ജനുവരിയിലും ഫെബ്രുവരിയിലും സാധാരണയില്‍ കൂടുതല്‍ മഴയാണ് കേരളത്തില്‍ ലഭിച്ചത്. തമിഴ്‌നാട്, കര്‍ണാടക സംസ്ഥാനങ്ങളിലും സമാന രീതിയില്‍ മഴ ലഭിച്ചിരുന്നു. 45,000 ടണ്‍ മാമ്പഴമാണ് ഓരോ വര്‍ഷവും കേരളത്തില്‍ നിന്ന് കയറ്റുമതി ചെയ്യുന്നത്. മറ്റു സംസ്ഥാനങ്ങളെ അപേക്ഷിച്ച് കേരളത്തിലാണ് മാവുകള്‍ ആദ്യം പൂക്കുന്നത്. നവംബര്‍, ഡിസംബര്‍ മാസത്തില്‍ പൂവിട്ട് മാര്‍ച്ച്, ഏപ്രിലില്‍ വിളവെടുപ്പ് നടത്താനാകുന്ന കാലാവസ്ഥയാണ് കേരളത്തിലേത്. ഒന്നു മുതല്‍ രണ്ട് മാസം വരെ വൈകിയാണ് മറ്റു സംസ്ഥാനങ്ങളില്‍ വിളവെടുപ്പ് നടക്കുന്നത്. ഇത്തവണ പെയ്ത മഴയില്‍ നാടന്‍ ഇനങ്ങളായ കപ്പായി, പുളിയന്‍ പറങ്കി, കടുക്കാച്ചി, നീലന്‍, ഒളോര്‍ എന്നിവയ്ക്കാണ് കടുത്ത ക്ഷാമം നേരിടുന്നത്. തത്തക്കൊത്തന്‍, ഗോമാങ്ങ, ലാത്തിമാങ്ങ, പഴമാങ്ങ എന്നിവ പലയിടത്തും പൂത്തതേയില്ലെന്നാണ് കര്‍ഷകര്‍ പറയുന്നത്. 

ചൂട് കൂടിയതും വിളവ് കുറയ്ക്കും
പ്രളയത്തെ തുടര്‍ന്ന് മണ്ണിന്റെ ഘടനാ മാറ്റത്തിനൊപ്പം  അന്തരീക്ഷ താപനില കൂടിയതും വിളവ് കുറയ്ക്കും. പൂവിടുന്ന സമയത്തെ മണ്ണിലെ ഉയര്‍ന്ന ഈര്‍പ്പവും കായ്ഫലം കുറയ്ക്കും. പലയിടത്തും മണ്ണ് പരിശോധനയില്‍ ഇതു കണ്ടെത്തിയെന്ന് കൃഷി വകുപ്പ് അധികൃതര്‍ പറയുന്നു. ബോറോണ്‍, സള്‍ഫര്‍, സിങ്ക് എന്നിവയുടെ കുറവാണ് പരിശോധനയില്‍ കണ്ടെത്തിയത്.