ചൂടേറുന്നു, പക്ഷികള് കുഴഞ്ഞുവീഴുന്നു, നമുക്ക് ദാഹജലം നല്കാം
Metbeat Weather Desk
വേനല് ചൂടിലേക്ക് നീങ്ങുകയാണ് കേരളം. കഴിഞ്ഞ ദിവസങ്ങളിലെ അന്തരീക്ഷ താപനിലയും ആര്ദ്രതയും യു.വി ഇന്റക്സും പരിശോധിക്കുമ്പോള് ഇപ്പോഴത്തെ സാഹചര്യം മനുഷ്യരും പക്ഷികളും മൃഗങ്ങളും ഉള്പ്പെടുന്ന ജീവജാലങ്ങളുടെ നിലനില്പ്പിന് ഭീഷണിയാണ്. കഴിഞ്ഞ ദിവസങ്ങളില് മെറ്റ്ബീറ്റ് വെതറിന്റെ പോസ്റ്റുകളില് മനുഷ്യരുടെ ആരോഗ്യ സംരക്ഷണത്തെ കുറിച്ച് മുന്നറിയിപ്പ് നല്കിയിരുന്നല്ലോ. പക്ഷികളെയും മൃഗങ്ങളെയും കൂടി നാം ഈ സാഹചര്യത്തില് സംരക്ഷിക്കേണ്ടതുണ്ട്.
കരുണ വേണം, അവരും ഭൂമിയുടെ അവകാശികള്
നമുക്കൊപ്പം ഈ ഭൂമിയുടെ അവകാശികളാണ് ഇതര ജീവജാലങ്ങളും. വേനല് ശക്തിപ്പെടുമ്പോള് അവയ്ക്ക് ദാഹജലം നല്കുകയെന്നത് നമ്മുടെ ഉത്തരവാദിത്തമാണ്. കിണറും കുളവും നിര്മിച്ച് നാം വെള്ളം എടുക്കുമ്പോള് അവയ്ക്ക് അത്തരം പ്രവൃത്തികള് ചെയ്യാന് കഴിയില്ല. പ്രകൃതിദത്തമായ ജലസ്രോതസുകളില് നിന്നാണ് അവ ദാഹമകറ്റുന്നത്. നമുക്കു ചുറ്റുമുള്ള പക്ഷി മൃഗാദികളെയും സസ്യങ്ങളെയും പരിപാലിക്കാന് ഓരോരുത്തരും മനസുവച്ചാല് അനേകം പക്ഷികളും മൃഗങ്ങളും ഓരോ വേനലിലും മരിച്ചുവീഴുന്നത് തടയാനാകും. നമുക്കൊപ്പം അവരും ഭൂമിയില് ജീവിച്ചാലേ ആവാസവ്യവസ്ഥ പൂര്ണമാകൂ. കാടും മലയും നദിയും വയലും സംരക്ഷിക്കണമെന്ന പഴമൊഴി മനുഷ്യജീവിതത്തെ പ്രത്യക്ഷമായും പരോക്ഷമായും ബാധിക്കുന്നതാണ്. ഇതെല്ലാം നഷ്ടമാകുന്നതാണ് പ്രകൃതി ദുരന്തങ്ങളിലേക്ക് നയിക്കുന്നതും നാം ഉള്പ്പെടുന്നവര് അതിന്റെ ദുരിതം പേറേണ്ടി വരുന്നതും.
പാലക്കാട്ട് പരുന്തുകള് കുഴഞ്ഞു വീഴുന്നു
കഴിഞ്ഞ ഒരാഴ്ചയായി പാലക്കാട്ട് പരുന്തുകള് കുഴഞ്ഞുവീഴുന്നതായ വാര്ത്തകള് വന്നുകൊണ്ടിരിക്കുന്നു. ശക്തമായ ചൂടില് ഇതു സംഭവിക്കാം എന്നാണ് വിദഗ്ധര് നല്കുന്ന വിശദീകരണം. സാധാരണ മനുഷ്യരില് നിന്ന് വ്യത്യസ്തമായി പക്ഷികളുടെ ശരീരോഷ്മാവ് 39-43 ഡിഗ്രിവരെയാണ്. എന്നാല് അന്തരീക്ഷ ഊഷ്മാവ് പലപ്പോഴും ഇതിനു താഴെയാകും. പക്ഷികളുടെ ഉപാപചയ പ്രവര്ത്തനങ്ങള്ക്ക് ഈ ശരീരോഷ്മാവ് അത്യാവശ്യമാണ്. പുറത്ത് ചൂട് കൂടുമ്പോള് അവയുടെ ശരീരോഷ്മാവും വര്ധിക്കും. ഇതോടെ അവയുടെ ഉപാപചയ പ്രവര്ത്തനങ്ങള് തടസ്സപ്പെട്ട് കുഴഞ്ഞു വീഴുകയോ ചത്തുവീഴുകയോ ചെയ്യും.
നമുക്ക് തണ്ണീര്കുടങ്ങളൊരുക്കാം
മെറ്റ്ബീറ്റ് വെതറിന്റെ പതിനായിരക്കണക്കിന് വരുന്ന വായനക്കാര് മനസുവച്ചാല് അനേകം പക്ഷികളെ ഓരോ ദിവസവും മരണത്തില് നിന്ന് രക്ഷിക്കാനാകും. അവയ്ക്ക് മുന്പ് വെള്ളം ലഭിച്ചിരുന്ന ജലസ്രോതസുകള് ഇപ്പോഴില്ല. കുളങ്ങളും വയലുകളും തണ്ണീര്ത്തടങ്ങളും മൂടപ്പെട്ടിരിക്കുന്നു. കിണറ്റിന് കരയിലെ കുളി ഇപ്പോഴില്ലാത്തനാല് അവടെയും വെള്ളമില്ല. വെള്ളം കെട്ടിനില്ക്കുന്ന സ്ഥലങ്ങളൊന്നും ഇല്ല. ഓടകളും സ്ളാബിട്ട് മൂടിയതിനാല് വെള്ളം കിട്ടാന് പക്ഷികള്ക്ക് പ്രയാസമാണ്. നമ്മുടെ വീടുകളില് നിര്ബന്ധമായും ആള്പെരുമാറ്റം കുറഞ്ഞ ഭാഗത്ത് പക്ഷികള്ക്ക് ഒരു തണ്ണീര്കുടം ദിവസവും നിറച്ചു വയ്ക്കാം. ഞങ്ങളുടെ ഓഫിസിലും മെറ്റ്ബീറ്റ് വെതറിലെ അംഗങ്ങളുടെ വീട്ടിലും ഇത് എല്ലാക്കാലത്തും പിന്തുടരുന്നുണ്ട്. ഓരോ ദിവസവും വെള്ളം കുടിക്കാനെത്തുന്ന പക്ഷികളുടെയും ജീവികളുടെയും എണ്ണവും ഉപയോഗിക്കപ്പെടുന്ന ജലത്തിന്റെ അളവും പരിശോധിച്ചതില് കൗതുകകരമായ മാറ്റമാണ് ദൃശ്യമാകുന്നത്.
ഇത്തരമൊരു ദൗത്യം ഏറ്റെടുക്കാന് എല്ലാ പ്രിയ ഫോളോവേഴ്സിനോടും ഞങ്ങള് അഭ്യര്ഥിക്കുകയാണ്. ദിവസവും വെള്ളം നിറച്ചു വയ്ക്കുകയും നാം ഉപേക്ഷിക്കുന്ന പഴങ്ങളുടേയോ ഭക്ഷണത്തിന്റേയോ ഭാഗം ഒരു പാത്രത്തില് അവയ്ക്ക് ഭക്ഷിക്കാന് നല്കുകയും ചെയ്താല് ആര്ക്കും ചേതമില്ലാത്ത വലിയ നന്മയാണ് ചെയ്യുന്നതെന്ന ചാരിതാര്ത്ഥ്യം നമുക്കുണ്ടാകും. നിലവില് ഈ പ്രവൃത്തി ചെയ്യുന്നവര് അതിന്റെ ചിത്രങ്ങള് കമന്റ് ബോക്സില് നല്കി മറ്റുള്ളവര്ക്കും പ്രചോദനം നല്കുമെന്ന് പ്രതീക്ഷിക്കുന്നു. ഈ സന്ദേശം എല്ലാവരിലേക്കും എത്തിക്കാന് പരമാവധി ഷെയര് ചെയ്യാനും എല്ലാവരോടും അഭ്യര്ഥിക്കുന്നു.
Comments