WEATHER NEWS AND ANALYSIS
ഇന്തോനേഷ്യയില് മണ്സൂണ് ശക്തം, പ്രളയം
Feb. 22, 2021, 1:50 p.m.
Metbeat Weather Desk
ഇന്ത്യയില് നിന്ന് തെക്കുകിഴക്കായി സ്ഥിതിചെയ്യുന്ന ഇന്തോനേഷ്യയില് മണ്സൂണ് ശക്തിപ്പെട്ടതിനെ തുടര്ന്ന് പ്രളയം. നവംബര് മുതല് മാര്ച്ച് വരെയാണ് ഇന്തോനേഷ്യയിലെ മണ്സൂണ് കാലം. ജനുവരി, ഫെബ്രുവരി മാസങ്ങളിലാണ് മഴ ശക്തിപ്പെടുന്നത്. ഇത്തവണ ശക്തമായ മഴയാണ് ഇന്തോനേഷ്യയില് ലഭിച്ചത്. തലസ്ഥാനമായ ജക്കാര്ത്തയില് പ്രളയമുണ്ടായി. ആയിരക്കണക്കിനു വീടുകള്ക്ക് നാശനഷ്ടമുണ്ട്. ആളപായമില്ലെന്നാണ് ജക്കാര്ത്ത ഡിസാസ്റ്റര് മെഗ്രേഷന് ഏജന്സിയുടെ മേധാവി സബ്ദോ കുര്നിയാന്റോ പറഞ്ഞു. ഇന്നലെ രാവിലെ അവസാനിച്ച 24 മണിക്കൂറില് ജക്കാര്ത്തയില് 22 സെ.മി മഴയാണ് ലഭിച്ചത്. ജനുവരി, ഫെബ്രുവരി മാസങ്ങളില് ഇവിടെ ആകെ ലഭിക്കേണ്ടത് 30 സെ.മി മഴയാണ്. വര്ഷത്തില് ഏറ്റവും കൂടുതല് മഴ ലഭിച്ച മാസമെന്ന റെക്കോര്ഡും ഫെബ്രുവരി സ്വന്തമാക്കി.
പ്രളയം ശക്തം, ഇന്ത്യന് കാലാവസ്ഥയെ ബാധിക്കില്ല
1,380 വീടുകളില് വെള്ളംകയറിയെന്നാണ് ഡിസാസ്റ്റര് മെഗ്രേഷന് ഏജന്സിയുടെ കണക്ക്. അര മീറ്റര് മുതല് 1.8 മീറ്റര് വരെ വീടുകളില് വെള്ളംകയറി. ജക്കാര്ത്തയുടെ കിഴക്കും, തെക്കും മേഖലകളിലാണ് പ്രധാനമായും വെള്ളപ്പൊക്കമുണ്ടായത്. രാജ്യത്ത് ശക്തമായ മഴ തുടരുകയാണെന്നും ഈ ആഴ്ച മഴ തുടരുമെന്നും ഇന്തോനേഷ്യയുടെ ഔദ്യോഗിക കാലാവസ്ഥാ ഏജന്സി അറിയിച്ചു. ഇത്തവണ മഴ ശക്തിപ്പെടുമെന്ന് ഇന്തോനേഷ്യയിലെ മീറ്റിയോറോളജി, ക്ലൈമറ്റോളജി, ജിയോ ഫിസിക്കല് ഏജന്സികള് (ബി.എം.കെ.ജി) മുന്നറിയിപ്പ് നല്കിയിരുന്നു. ഒരു കോടി പേരെ മഴക്കെടുതികള് ബാധിക്കുമെന്ന നിഗമനത്തില് മുന്കരുതല് നടപടികള് സ്വീകരിച്ചിരുന്നു. ഇതിനാല് ആളപായം ഒഴിവായെന്നാണ് റിപ്പോര്ട്ടുകള്. ഇന്തോനേഷ്യക്ക് പടിഞ്ഞാറ് ഇന്ത്യന് മഹാസമുദ്രത്തില് ന്യൂനമര്ദപാത്തി നിലകൊള്ളുന്നതും ബന്താ ആചെക്ക് പടിഞ്ഞാറ് ചക്രവാതച്ചുഴി സ്വാധീനവും ഇന്തോനേഷ്യയില് മഴ ശക്തിപ്പെടുത്തുമെന്ന് മെറ്റ്ബീറ്റ് വെതറിലെ നിരീക്ഷകര് പറയുന്നു. ഈ മാസം 25 ന് ശേഷം ഇന്തോനേഷ്യയില് മഴ കുറയും. ഇന്തോനേഷ്യയിലെ കാലാവസ്ഥ ഇന്ത്യയെ ബാധിക്കില്ല. ബംഗാള് ഉള്ക്കടലില് കിഴക്കന് കാറ്റ് ഇന്നും ശക്തമായി തുടരുന്നതിനാല് കേരളത്തിലും തെക്കേ ഇന്ത്യയിലും ഇന്നും മഴ ലഭിക്കാന് സാധ്യതയുണ്ട്. നാളെ മുതല് മഴ ഒന്നോ രണ്ടോ പ്രദേശങ്ങളിലേക്ക് ചുരുങ്ങും.
Photo- Tatan Syuflana / AP
Comments