WEATHER NEWS AND ANALYSIS
കൊടും ശൈത്യം: യു.എസിൽ പശുക്കളുടെ ചെവി അറ്റുവീഴുന്നു
Feb. 20, 2021, 8:23 p.m.
Metbeat Weather Desk
അമേരിക്കയിലെ തെക്കന് മേഖലയില് നൂറ്റാണ്ടിലെ ഏറ്റവും ശക്തമായ ശൈത്യം തുടരുന്നത് മനുഷ്യര്ക്കൊപ്പം മൃഗങ്ങളെയും ബാധിക്കുന്നു. പശുക്കളുടെ ചെവി കൊടുംതണുപ്പില് അറ്റുവീഴുന്നുവെന്നാണ് കര്ഷകര് പറയുന്നതെന്ന് യു.എസ് മാധ്യമങ്ങള് റിപ്പോര്ട്ട് ചെയ്യുന്നു. ഇതുവരെ ടെക്സസിലും മറ്റുമായി 20 ലധികം പേര് കൊടുംശൈത്യത്തെ തുടര്ന്ന് മരിച്ചു. മിക്കയിടത്തും മൈനസ് 14 ഡിഗ്രിവരെയാണ് താപനില താഴുന്നത്.
തണുപ്പിനെ അതിജീവിക്കാനാകുന്ന ജീവികള്ക്കേ ഇവിടെ കഴിയാനാകൂ എന്നാണ് കാലാവസ്ഥാ വിദഗ്ധര് പറയുന്നത്. ഏതാനും ദിവസം ശൈത്യം നേരിടാന് ജീവികള്ക്കു കഴിയുമെങ്കിലും തുടര്ച്ചയായ അതിശൈത്യം ജീവജാലങ്ങളെയും കൊന്നൊടുക്കുകയാണ്. യു.എസിലെ തെക്കുപടിഞ്ഞാറന് മേഖലയിലെ സ്ഥിതിയാണ് കൂടുതല് രൂക്ഷം. മൃഗങ്ങളെ സംരക്ഷിക്കാന് വീട്ടിനകത്തും വാഹനങ്ങളിലും അവയെ പുതപ്പുകൊണ്ട് മൂടിയാണ് ഉടമസ്ഥര് കഴിച്ചുകൂട്ടുന്നത്. വൈക്കോലുകള് കൊണ്ട് പൊതിഞ്ഞ കൂടുകളുണ്ടാക്കിയാണ് പശുവിനെയും കോഴികളെയും തണുപ്പില് നിന്ന് രക്ഷിക്കുന്നത്. കോഴി ഫാമുകളുടെ മേല്ക്കൂരകളും അരമീറ്ററിലധികം കനമുള്ള മഞ്ഞുപാളികള് വീണ് തകര്ന്നു. മഞ്ഞുവീഴ്ച പല മേഖലകളിലും തുടരുകയാണ്. നാളെ മുതല് മഞ്ഞുവീഴ്ചക്ക് നേരിയ ശമനം പ്രതീക്ഷിക്കാമെന്നാണ് കാലാവസ്ഥാ മുന്നറിയിപ്പ്. കന്നുകാലികള്ക്ക് ഭക്ഷണവും നല്കാന് കഴിയുന്നില്ല. കൃഷിയിടങ്ങളെല്ലാം മഞ്ഞില്പുതഞ്ഞു കിടക്കുകയാണ്. പുല്ലുകള് ശേഖരിക്കാന് കഴിയുന്നില്ല. കുടിക്കാന് വെള്ളമില്ല. പുഴകളും തടാകങ്ങളും ഐസ് ഉറഞ്ഞ നിലയിലാണ്. വളര്ത്തുന്ന മൃഗങ്ങളും പക്ഷികളും അല്ലാത്തവ ചത്തിട്ടുണ്ടാകുമെന്നാണ് പ്രകൃതി സ്നേഹികള് പറയുന്നത്. ധ്രുവങ്ങളിലെ കാലാവസ്ഥയെ നേരിടാന് കഴിയുന്ന രീതിയില് ശരീപപ്രകൃതിയുള്ള ജീവികള്ക്കേ ഇവിടെ കഴിയാനാകൂ എന്നതാണ് ഇപ്പോഴത്തെ അവസ്ഥ.
Disclaimer & Credit : This is based on Metbeat Weather’s Observation. Please follow IMD in India or Respective National Forecaster if you are in abroad for official Local Weather forecast and Alerts. Media Requested to Credit Metbeat Weather or metbeat.com
if you use our data and analysis news purpose.
Comments