താപനം: പടിഞ്ഞാറന് കാറ്റുകള് ധ്രുവമേഖലകളിലേക്ക്?
ഡോ.ഗോപകുമാര് ചോലയില്
ഭൂമിയുടെ രണ്ട് അര്ധഗോളങ്ങളിലും അക്ഷാംശം 30നും 60 ഡിഗ്രിക്കും ഇടക്ക് സ്ഥിതിചെയ്യുന്ന മധ്യ അക്ഷാംശമേഖലയില് പടിഞ്ഞാറ് ദിശയില് നിന്ന് കിഴക്കോട്ട് സ്ഥിരമായി വീശുന്ന കാറ്റുകളാണ് പശ്ചിമവാതങ്ങള് (Westerlies). ഉപോഷ്ണ മേഖലയിലെ അതിമര്ദ്ദ മേഖലക്കും ധ്രുവപ്രദേശങ്ങളിലെ നീചമര്ദ്ദ (ലോപ്രഷര്) മേഖലകള്ക്കും ഇടയിലാണ് ഇവ വീശുന്നത്. 30 ഡിഗ്രി അക്ഷാംശത്തിലെ അതിമര്ദ്ദമേഖലകളില് നിന്ന് ഉത്ഭവിച്ച് ധ്രുവമേഖലകളുടെ ദിശയിലേക്ക് വീശുന്നവയാണീ കാറ്റുകള്. ഉഷ്ണമേഖലാ പ്രദേശങ്ങള്ക്കു പുറമേവീശുന്ന ചുഴലിവാതങ്ങളുടെ ദിശനിയന്ത്രിക്കുന്നതില് പശ്ചിമവാതങ്ങള്ക്ക് പ്രധാന പങ്കുണ്ട്. ഉഷ്ണമേഖലാ പ്രദേശങ്ങളില് രൂപംകൊള്ളുന്ന ചുഴലിവാതങ്ങളില് ചിലത് 30 ഡിഗ്രി അക്ഷാംശത്തില് സ്ഥിതിചെയ്യുന്ന ഉച്ചമര്ദ്ദപാത്തി മറികടന്ന് മധ്യ അക്ഷാംശ മേഖലയില് പ്രവേശിക്കുമ്പോള്, പശ്ചിമവാതങ്ങളുടെ നിയന്ത്രണത്തിന് വിധേയമായി അവയ്ക്ക് ദിശാവ്യതിയാനം ഉണ്ടാകാറുണ്ട്. ഉത്തരാര്ധഗോളത്തില് പ്രധാനമായും തെക്കുപടിഞ്ഞാറ് (Southwest Westerlies) ദിശയില് നിന്നും ദക്ഷിണാര്ധഗോളത്തില് വടക്കുപടിഞ്ഞാറ് (Northwest Westerlies) ദിശയില് നിന്നുമാണ് പശ്ചിമവാതങ്ങള് വീശുന്നത്.
പശ്ചിമവാതങ്ങള് ശക്തിപ്പെടുന്നത്
താഴ്ന്നമേഖലകളില് ശൈത്യം അനുഭവപ്പെടുന്ന സമയത്തോ, അതുമല്ലെങ്കില് ധ്രുവപ്രദേശങ്ങളില് താരതമ്യേന മര്ദ്ദം വളരെ കുറവ് അനുഭവപ്പെടുന്ന സമയങ്ങളിലോ അതത് അര്ധഗോളങ്ങളില് പശ്ചിമവാതങ്ങള്ക്ക് ശക്തിയേറും. മറിച്ച്, വേനല്ക്കാലങ്ങളിലും ധ്രുവപ്രദേശങ്ങളില് ഉയര്ന്ന മര്ദ്ദം അനുഭവപ്പെടുന്ന കാലങ്ങളിലും ഇവ ദുര്ബലമാകും. ദക്ഷിണാര്ധ ഗോളത്തില് പശ്ചിമവാതങ്ങള് താരതമ്യേന ശക്തിയേറിയവയാണ്. ഉത്തരാര്ധ ഗോളത്തെ അപേക്ഷിച്ച് സമുദ്രത്തില് ഭൂഖണ്ഡ സാന്നിധ്യം വളരെക്കുറഞ്ഞ അവസ്ഥയാണ് കാരണം. ഭൂഖണ്ഡ സാന്നിധ്യം പശ്ചിമവാതങ്ങളുടെ ശക്തിക്ഷയിക്കാന് കാരണമാകുന്നു. അക്ഷാംശം 40 നും 50 ഡിഗ്രിക്കും ഇടയ്ക്കു വീശുന്ന പശ്ചിമ വാതങ്ങളാണ് ഏറ്റവും ശക്തിയേറിയവ. ഭൂമധ്യരേഖാ പ്രദേശത്തുനിന്നും ചൂടുപിടിച്ച സമുദ്രജലം, കാറ്റ് എന്നിവയുടെ ഗതി നിയന്ത്രിച്ച് ദക്ഷിണാര്ധഗോളത്തിലെ ഭൂഖണ്ഡങ്ങളുടെ പടിഞ്ഞാറന് തീരത്തേക്ക് നയിക്കുന്നതില് വരെ എത്തിക്കുന്നതില് പശ്ചിമവാതങ്ങള്ക്ക് അതിപ്രധാന പങ്കുണ്ട്. ഓരോ വര്ഷവും വ്യത്യസ്ത കാലങ്ങളില് പശ്ചിമവാതങ്ങളുടെ ശക്തിയില് വ്യതിയാനം ഉണ്ടാകാറുണ്ട്. ധ്രുവപ്രദേശങ്ങളില് വീശുന്ന ചുഴലിവാതങ്ങളാണ് ഇതിന് കാരണം. ഇത്തരം ചുഴലിവാതങ്ങള് ശൈത്യകാലത്ത് കൂടുതല് ശക്തിയാര്ജിക്കുന്നു. അതിനെത്തുടര്ന്ന് പശ്ചിമവാതങ്ങളും അതിശക്തമാകുന്നു. വേനല്ക്കാലത്ത് ചുഴലിവാതങ്ങളുടെ ശക്തി ക്ഷയിക്കുന്നതോടൊപ്പം പശ്ചിമവാതങ്ങളും ദുര്ബലമാകുന്നു. ഗോബി മരുഭൂമിയില് നിന്നും കാറ്റുകളില് അകപ്പെട്ട്, ഏറെ ദൂരം കിഴക്കോട്ട് സഞ്ചരിച്ച് വടക്കേ അമേരിക്കയില് കാണപ്പെടുന്ന മാലിന്യസമ്മിശ്രിത മണല് തരികളുടെ സാന്നിധ്യം പശ്ചിമവാതങ്ങളുടെ ഗതി, മാര്ഗം, ശക്തി എന്നിവയെ വെളിപ്പെടുത്തുന്നു.
ദക്ഷിണ ഗോളത്തില് കൂടുതല് ശക്തം
സമുദ്രത്തില് ഭൂഖണ്ഡങ്ങള്, ദ്വീപുകള് തുടങ്ങിയ കരപ്രദേശങ്ങള് വളരെ കുറവ് മാത്രമുള്ള ദക്ഷിണാര്ധ ഗോളത്തില് പശ്ചിമവാതങ്ങള് കൂടുതല് ശക്തമാവുന്നു. അതിവിസ്തൃതവും ഭൂഖണ്ഡസാന്നിധ്യം കുറഞ്ഞതുമായ സമുദ്രമേഖലയുള്ളതിനാല് ദക്ഷിണാര്ധഗോളം കാറ്റുകളാല് സമൃദ്ധവും ബാഷ്പീകരണത്തോത് കൂടുലതായതിനാല് മേഘസമ്പന്നവുമാണ്. പശ്ചിമവാതങ്ങള്, ഏറ്റവും ശക്തമായ ദക്ഷിണാര്ധ ഗോളത്തില്, അവവീശുന്ന അക്ഷാംശങ്ങള്ക്കനുസരിച്ച് അവയെ 'മുരളുന്ന നാല്പതുകള്'(Roaring forties), 'ക്ഷുബ്ധമായ അന്പതുകള്' (Furious fifties), 'അലറുന്ന അറുപതുകള്'(Screaming sixties) എന്നിങ്ങനെയാണ് അറിയപ്പെടുന്നത്. അറ്റ്ലാന്റിക് മഹാസമുദ്രം, ശാന്തസമുദ്രം എന്നിവിടങ്ങളിലെ 30 ഡിഗ്രി അക്ഷാംശത്തില് ഒരു അതിമര്ദ്ദമേഖല നീണ്ടുകിടക്കുന്നുണ്ട്. ഈ മേഖലയില് ഭൂമിയുടെ ഇരു അര്ധഗോളങ്ങളിലും സമുദ്രജലപ്രവാഹങ്ങള്ക്കും ഗതിമാറ്റം സംഭവിക്കുന്നു. ദക്ഷിണാര്ധ ഗോളത്തെ അപേക്ഷിച്ച്, ഭൂഖണ്ഡങ്ങള് കൂടുതലുള്ള ഉത്തരാര്ധ ഗോളത്തില് പ്രവാഹങ്ങള് ദുര്ബലമാണ്.
പശ്ചിമവാതങ്ങള് ധ്രുവപ്രദേശങ്ങളിലേക്ക് കടന്നുകയറുന്നുവോ?
പടിഞ്ഞാറന് കാറ്റുകള് (westerlies) ആഗോള കാലാവസ്ഥാ വ്യൂഹത്തിന്റെ അടിസ്ഥാന ഘടകങ്ങളിലൊന്നണ്. സമുദ്രജല പര്യയനവ്യവസ്ഥ, അന്തരീക്ഷസമുദ്രജല താപ നിയന്ത്രണം, കാര്ബണ്ഡയോക്സൈഡ് വാതകത്തിന്റെ അന്തരീക്ഷസമുദ്ര വിനിമയം എന്നീ പ്രവര്ത്തനങ്ങളില് ഈ കാറ്റുകള് സുപ്രധാന പങ്ക് വഹിക്കുന്നുണ്ട്. വര്ഷപാതക്രമം, സമുദ്രപര്യയനവ്യവസ്ഥകള്, ഉഷ്ണമേഖലാ ചുഴലിവാതങ്ങള് എന്നിവയെ സ്വാധീനിക്കുന്നതുമൂലം പ്രാദേശിക കാലാവസ്ഥയിന്മേല് നിര്ണായക സ്വാധീനം ചെലുത്തുന്നവയാണ് പശ്ചിമവാതങ്ങള്. ആയതിനാല് തന്നെ നിലവിലെ താപനസാഹചര്യങ്ങളില് ഇവ എപ്രകാരം മാറ്റങ്ങള്ക്ക് വിധേയമാകുന്നുവെന്ന് വിലയിരുത്തുന്നത് അതിപ്രധാനമാണ്. ഭൂമിയുടെ മധ്യഅക്ഷാംശങ്ങളില് പടിഞ്ഞാറ് നിന്ന് കിഴക്ക് ദിശയിലേക്കാണ് സാധാരണ ഗതിയില് പശ്ചിമവാതങ്ങള് വീശാറുള്ളത്. എന്നാല്, കഴിഞ്ഞ ഏതാനും ദശകങ്ങളായി ഈ കാറ്റുകളുടെ സഞ്ചാരപഥം മധ്യ അക്ഷാംശങ്ങളും മറികടന്ന് ധ്രുവമേഖലയിലേക്ക് കടക്കുന്നതായി നിരീക്ഷിക്കപ്പെടുന്നു. താപവര്ധനവില് അധിഷ്ഠിതമായ കാലാവസ്ഥാവ്യതിയാനമാണ് ഇതിന് കാരണമെന്നാണ് കണ്ടെത്തല്. അന്തരീക്ഷത്തിലേക്ക് കൂടിയതോതില് കാര്ബണ്ഡയോക്സൈഡ് എത്തിച്ചേരുകയും തല്ഫലമായി താപനമേറുകയും ചെയ്യുന്ന സാഹചര്യങ്ങളില് പശ്ചിമവാതങ്ങളുടെ ധ്രുവോന്മുഖസഞ്ചാരം തുടരുമോ എന്നാണ് ശാസ്ത്രലോകം ചര്ച്ച ചെയ്യുന്നത്.
പൗരാണിക കാലഘട്ടങ്ങളില് സമാനസാഹചര്യങ്ങള് ഉണ്ടായിട്ടുണ്ടെങ്കിലും അക്കാലത്ത് പശ്ചിമവാതങ്ങളുടെ പ്രകൃതം സംബന്ധിച്ചുള്ള അറിവ് പരിമിതമായതിനാല് ഈ പ്രശ്നത്തിന് ഉത്തരം കണ്ടെത്തുന്നത് അതീവദുഷ്കരമാണ്. എന്നാല് ഫോസില് സങ്കേതങ്ങള് ഉപയോഗിച്ച് പൗരാണികകാലത്തെ കാലാവസ്ഥയും, പശ്ചിമവാതങ്ങളുടെ സഞ്ചാരപഥങ്ങളും അപഗ്രഥിക്കപ്പെട്ടിട്ടുണ്ട്. പുരാതനകാലങ്ങളിലെ കാലാവസ്ഥാവ്യതിയാന സാഹചര്യങ്ങളില് അന്തരീക്ഷ പര്യയനവ്യവസ്ഥ, പശ്ചിമവാതങ്ങളുടെ സഞ്ചാരപഥങ്ങള്, പ്രകൃതങ്ങള് എന്നിവ എപ്രകാരമായിരുന്നുവെന്നുള്ള ചോദ്യങ്ങള്ക്ക് പാലിയോക്ലൈമറ്റോളജി എന്ന ശാസ്ത്രശാഖ (Paleo-climatology) അഥവാ ഫോസില് പഠനാധിഷ്ഠിത കാലാവസ്ഥാ ശാസ്ത്രം സൂചനകള് നല്കുന്നു. ഇന്നത്തെ തലമുറക്ക് അജ്ഞാതമായ പൗരാണികമായ കാലങ്ങളില് മാത്രമല്ല, വിദൂരഭാവിയില് പോലും താപനം, കാലാവസ്ഥാവ്യതിയാനം എന്നീ സാഹചര്യങ്ങളില് കാറ്റുകളുടെ സഞ്ചാരപഥം, പ്രകൃതം എന്നിവയില് ഉണ്ടാകാനിടയുള്ള വ്യതിയാനങ്ങളെക്കുറിച്ച് ഒരു ധാരണ ലഭിക്കുന്നുവെന്നതാണ് ഇതുകൊണ്ടുണ്ടായ നേട്ടം.
(ലേഖകന് കേരള കാര്ഷിക സര്വകലാശാല, കാലാവസ്ഥാ വ്യതിയാനപരിസ്ഥിതി ശാസ്ത്ര കോളജിലെ സയന്റിഫിക് ഓഫിസറും കാലാവസ്ഥ കോളമിസ്റ്റുമാണ്)
Comments