മരവിച്ച് ടെക്സസ്, അസാധാരണ ശൈത്യത്തിലകപ്പെട്ട് 70 ലക്ഷം പേര്
Metbeat Weather Desk
നിന്ന നില്പ്പില് മരവിച്ചുപോകുകയാണ് യു.എസ് സംസ്ഥാനമായ ടെക്സസിലെ ജനങ്ങള്. റോഡുകളില് മീറ്ററോളം മഞ്ഞുപുതഞ്ഞു കിടക്കുന്നു. ഫ്രീസറിനുള്ളിലെന്നപോലെ വീട്ടിലെ ഫാനിലും പൈപ്പിലും ശുചിമുറിയിലുമെല്ലാം ഐസ് ഉറഞ്ഞുകിടക്കുന്നു. അമേരിക്കന് സംസ്ഥാനമായ ടെക്സസില് അസാധാരണ ശൈത്യം മൂലം 70 ലക്ഷം പേരാണ് ഈ പ്രതിസന്ധി അനുഭവിക്കുന്നത്. ഇതിനകം 21 പേര് കൊടുംശൈത്യത്തെ തുടര്ന്ന് മരിച്ചു. തെക്കന് യു.എസില് വീശിയടിക്കുന്ന ശൈത്യക്കാറ്റാണ് ടെക്സസിനെ മൈനസ് ഡിഗ്രിയിലേക്ക് താഴ്ത്തിയത്. ഇതെഴുതുമ്പോള് ഞങ്ങളുടെ സിസ്റ്റത്തില് കാണിക്കുന്ന ടെക്സസിലെ താപനില -6.59 ഡിഗ്രി സെല്ഷ്യസാണ്. കഴിഞ്ഞ ദിവസം ഇവിടെ -18 ഡിഗ്രിവരെ താപനില താഴ്ന്നു എന്നാണ് റിപ്പോര്ട്ട്. വെള്ളവും വൈദ്യുതിയും ഇല്ലാത്ത അവസ്ഥയാണ് പലയിടത്തും ജനജീവിതം പ്രതിസന്ധിയിലാക്കിയത്. വൈദ്യുതി തടസ്സംമൂലമാണ് ഹീറ്റര് പ്രവര്ത്തിപ്പിക്കാനാകാതെ പലരും മരിച്ചത്.
30 വര്ഷത്തിനിടെ കൊടും ശൈത്യം
കഴിഞ്ഞ കാല് നൂറ്റാണ്ടിലേറെയായി ഇത്രയും ശൈത്യം അനുഭവപ്പെട്ടിട്ടില്ലെന്നാണ് കാലാവസ്ഥാ കണക്കുകള് പറയുന്നത്. 30 വര്ഷത്തിനിടെ ഇത്രയും താപനില കുറയുന്നതും ആദ്യം. യു.എസ് പ്രസിഡന്റ് ജോ ബൈഡന് ടെക്സസില് അടിയന്തരാവസ്ഥ പ്രഖ്യാപിച്ചു. പൈപ്പ് ലൈനില് വെള്ളം ഐസായതു കാരണം 2.60 ലക്ഷം പേര്ക്ക് കുടിവെള്ളം മുടങ്ങി. മഞ്ഞുരുക്കി വെള്ളമുണ്ടാക്കാന് വൈദ്യുതിയും ഇല്ല. റോഡും വീടും എല്ലാം മഞ്ഞില് മൂടിക്കിടക്കുകയാണ്. ഗതാഗതവും തടസ്സപ്പെട്ടു. വൈദ്യുതി വിതരണം പുനഃസ്ഥാപിക്കാന് ഇനിയും സമയമെടുക്കുമെന്നാണ് പ്രാദേശിക ഭരണകൂടം അറിയിച്ചത്. 12 ലക്ഷം പേര്ക്ക് വൈദ്യുതി പുനഃസ്ഥാപിക്കാനായി.
കാരണം ആഗോളതാപനം
ടെക്സസിലെ ചില മേഖലകളില് നൂറ്റാണ്ടിലെ ഏറ്റവും കുറഞ്ഞ താപനിലയാണ് അനുഭവപ്പെടുന്നത്. സാധാരണ ചൂട് കൂടിയ സംസ്ഥാനമാണ് ടെക്സസ്. ആര്ട്ടിക് ഔട്ട്ബ്രേക്ക് എന്ന ശീതകാറ്റിന്റെ സ്വാധീനമാണ് അതിശൈത്യത്തിന് കാരണം എന്നാണ് യു.എസ് നാഷനല് വെതര് സര്വിസ് വിശദീകരിക്കുന്നത്. ധ്രുവപ്രദേശങ്ങളിലെ ന്യൂനമര്ദ്ദങ്ങളാണ് ശൈത്യക്കാറ്റിനെ ജനവാസ മേഖലകളിലേക്ക് അയക്കുന്നത്. യു.എസ്-കാനഡ അതിര്ത്തിയോട് ചേര്ന്നാണ് ആര്ട്ടിക് ഔട്ട്ബ്രേക്ക് ഉണ്ടായത്. ഇതുമൂലം ഡാളസില് മൈനസ് 10 മുതല് 15 ഡിഗ്രിവരെ തണുപ്പുണ്ടായി. ഇവിടത്തെ 253 കൗണ്ടികളില് ശൈത്യക്കാറ്റ് മുന്നറിയിപ്പുണ്ട്. ധ്രുവത്തോട് ചേര്ന്ന് കിടക്കുന്ന അലസ്കയേക്കാള് തണുപ്പാണ് ഡാളസില് രേഖപ്പെടുത്തിയത്.
അമേരിക്ക ഹിമയുഗത്തിലേക്കോ?
അമേരിക്കയില് ജനജീവിതം തടസ്സപ്പെടും വിധം ഹിമയുഗത്തിലേക്കു നീങ്ങുകയാണോ എന്ന സംശയമാണ് വിദഗ്ധര് ഉന്നയിക്കുന്നത്. ഏഴു മുതല് 10 ഇഞ്ച് വരെ കനമുള്ള മഞ്ഞുപാളികള് ഡാളസ്, ട്രാവിസ്, സാന് എന്നിവിടങ്ങളില് വീണത് ഈ സൂചനയാണ് നല്കുന്നത്. അതിശൈത്യത്തില് നിന്ന് ആളുകള് മരിച്ചുവീഴുന്നത് തടയാന് ടെക്സസില് 135 വാമിങ് സെന്ററുകള് തുറന്നിട്ടുണ്ട്. ആളുകള് കാറുകളില് ഹീറ്റര് ഓണ് ചെയ്യുന്നത് മൂലം വിഷപ്പുക നിറയുന്ന പ്രശ്നവുമുണ്ട്. വ്യാഴാഴ്ച വരെ നിലവിലെ അന്തരീക്ഷസ്ഥിതി തുടരുമെന്നാണ് യു.എസ് കാലാവസ്ഥാ ഏജന്സികള് പറയുന്നത്. വെള്ളിയാഴ്ചയോടെ താപനിലയില് നേരിയ വര്ധനവുണ്ടാകും.
Comments