ന്യൂനമര്‍ദം ശക്തിപ്പെട്ടു; മഴയും കാറ്റും തുടരും, ജാഗ്രതവേണം
Metbeat Weather Desk
ബംഗാള്‍ ഉള്‍ക്കടലിലെ ന്യൂനമര്‍ദം ശക്തിപ്പെട്ടതിനു പിന്നാലെ ഈ മാസം ഒന്‍പതിനു ബംഗാള്‍ ഉള്‍ക്കടലിന്റെ മധ്യപടിഞ്ഞാറ് മേഖലയില്‍ പുതിയ ന്യൂനമര്‍ദം രൂപപ്പെടാന്‍ സാധ്യത. അതിനിടെ ഗുജറാത്തിനു മുകളില്‍ വെള്ളിയാഴ്ചയോടെ മറ്റൊരു ന്യൂനമര്‍ദവും രൂപപ്പെട്ടേക്കും. ഇപ്പോള്‍ ബംഗാള്‍ ഉള്‍ക്കടലിലുള്ള ന്യൂനമര്‍ദം കരയില്‍ പ്രവേശിച്ച് മധ്യ ഇന്ത്യയിലേക്ക് സഞ്ചരിച്ച് രണ്ടു ദിവസത്തിനകം ദുര്‍ബലപ്പെടാനാണ് സാധ്യത.
കേരളത്തില്‍ ഇന്നും നാളെയും കനത്തമഴ
കേരളത്തില്‍ പടിഞ്ഞാറന്‍ കാറ്റിന്റെ ശക്തി കൂടിയ നിലയില്‍ തുടരുന്നതിനാല്‍ ഇന്നും നാളെയും ശക്തമായ മഴ തുടരും. കഴിഞ്ഞ ദിവസങ്ങളില്‍ വ്യക്തമാക്കിയിരുന്നതുപോലെ മുംബൈ മുതല്‍ ഗോവവരെയുള്ള തീരപ്രദേശത്തും കനത്തമഴയും പ്രാദേശിക പ്രളയവും മണ്ണിടിച്ചിലിനും സാധ്യത നിലനില്‍ക്കുന്നു.
മഴ, ജാഗ്രതവേണം
കാസര്‍കോട്, കണ്ണൂര്‍, കോഴിക്കോട്, മലപ്പുറം, പാലക്കാട്, ഇടുക്കി ജില്ലകളുടെ മലയോരമേഖലയില്‍ ഇന്നും നാളെയും അതീവജാഗ്രത പുലര്‍ത്തണമെന്ന് മെറ്റ്ബീറ്റ് വെതര്‍ നിര്‍ദേശിക്കുന്നു. കണ്ണൂരിലെ ഇരിട്ടി, കോഴിക്കോട് കുറ്റ്യാടി, പേരാമ്പ്ര, താമരശ്ശേരി, മലയോര മേഖല, മലപ്പുറം നിലമ്പൂര്‍, നാടുകാണി, പാലക്കാട് അട്ടപ്പാടി, അഗളി, മണ്ണാര്‍ക്കാട്, ഇടുക്കി വാല്‍പാറേ മേഖല എന്നിവിടങ്ങളില്‍ കനത്തമഴ തുടരുന്നത് ഉരുള്‍പൊട്ടല്‍ സാധ്യത വര്‍ധിപ്പിക്കും. ഈ പ്രദേശങ്ങളില്‍ അടുത്ത 24 മണിക്കൂര്‍ കൂടി കനത്തമഴ തുടരാനാണ് സാധ്യതയെന്ന് മെറ്റ്ബീറ്റ് വെതര്‍ നിരീക്ഷകര്‍ അഭിപ്രായപ്പെടുന്നു.
കോട്ടയം, പത്തനംതിട്ട, കൊല്ലം, തിരുവനന്തപുരം ജില്ലകളുടെ മലയോരമേഖലയിലും കനത്തമഴസാധ്യതയുണ്ട്. വയനാട് ഉള്‍പ്പെടെയുള്ള എല്ലാ ജില്ലകളിലും ഇന്നും നാളെയും ശക്തമായ മഴസാധ്യത നിലനില്‍ക്കുന്നു.
മഴക്കൊപ്പം ശക്തമായ കാറ്റും തുടരും
കേരളത്തിലും തീരപ്രദേശത്തും തീരക്കടലിലും ശക്തമായ കാറ്റ് തുടരും. കടലില്‍ 60 കി.മി വരെയുള്ള കാറ്റും മലയോര മേഖലയില്‍ 50 കി.മി വരെയുള്ള കാറ്റും പ്രതീക്ഷിക്കാം. കേരളത്തിലെ മറ്റു പ്രദേശങ്ങളിലും മഴക്കൊപ്പം 40 കി.മി നുമുകളില്‍ ശക്തിയുള്ള കാറ്റ് പ്രതീക്ഷിക്കണം. ചിലപ്പോള്‍ കാറ്റിന്റെ വേഗത 65 കി.മി വരെയെത്താം. മരം കടപുഴകുന്നതും, ശിഖിരങ്ങള്‍ ഒടിഞ്ഞുവീഴുന്നതും ബോര്‍ഡുകളും പരസ്യപലകകളും ഒടിഞ്ഞുവീണു ദുരന്തമുണ്ടാകാന്‍ സാധ്യതയുള്ളതിനാല്‍ ജാഗ്രത പാലിക്കണം.
പുഴയോരത്തും മലയോരത്തും ജാഗ്രതവേണം
പുഴയോരത്ത് താമസിക്കുന്നവരും മലയോരത്തുള്ളവരും അടുത്ത 48 മണിക്കൂര്‍ ജാഗ്രത പാലിക്കുന്നത് ഉചിതമാണ്. പുഴയില്‍ വെള്ളംകയറുന്നത് കാണാനോ, സെല്‍ഫിയെടുക്കാനോ, മലവെള്ളപ്പാച്ചില്‍ കാണാനോ പോകരുത്. അത്യാവശ്യമല്ലാതെ വീടിനു പുറത്തിറങ്ങുന്നത് ഒഴിവാക്കുക. കുട്ടികളെ വെള്ളക്കെട്ടിനടുത്ത് പോകാതെ സൂക്ഷിക്കുക. പുഴയില്‍ കുളിക്കാനോ മറ്റോ ഇറങ്ങരുത്. സര്‍ക്കാര്‍ നല്‍കുന്ന മുന്നറിയിപ്പുകള്‍ പാലിക്കുകയും മാറിത്താമസിക്കാന്‍ നിര്‍ദേശം ലഭിച്ചാല്‍ മടിച്ചുനില്‍ക്കരുത്. ഏറ്റവും പുതിയ കാലാവസ്ഥാ മുന്നറിയിപ്പുകള്‍ ശ്രദ്ധിക്കുക.
കടല്‍ പ്രക്ഷുബ്ധം, മത്സ്യബന്ധന വിലക്ക്
കേരളം, കര്‍ണാടക, ലക്ഷദ്വീപ് തീരങ്ങളില്‍ കാറ്റിന് മണിക്കൂറില്‍ 60 കി.മി വരെ വേഗതയുണ്ടാകാന്‍ സാധ്യതയുള്ളതിനാല്‍ മത്സ്യത്തൊഴിലാളികള്‍ നാളെ വരെ കടലില്‍ പോകരുതെന്ന് ഇന്‍കോയിസ് അറിയിച്ചു. പൊഴിയൂര്‍ മുതല്‍ കാസര്‍കോട് വരെ തിരമാലകള്‍ക്ക് 3.5 മുതല്‍ 5.5 മീറ്റര്‍ വരെ ഉയരമുണ്ടാകാന്‍ സാധ്യതയുണ്ട്. മംഗാലപുരം മുതല്‍ കര്‍വാര്‍ വരെ തിരമാലകള്‍ക്ക് 5.7 മീറ്റര്‍ വരെ ഉയരം ഉണ്ടാകാം.
Photo Courtesy- PTI
Click here for Donate and Support Metbeat Weather
Comments