ന്യൂനമര്ദം വീണ്ടും ശക്തിപ്പെടും, കേരളത്തില് മഴ തുടരും
Metbeat Weather Desk
ബംഗാള് ഉള്ക്കടലിലെ വടക്കന് മേഖലയില് രൂപപ്പെട്ട ന്യൂനമര്ദം അടുത്ത 24 മണിക്കൂറില് വീണ്ടും ശക്തിപ്പെടാന് സാധ്യത. ഇതേതുടര്ന്ന് മുംബൈ മുതല് ഗോവ വരെയുള്ള പടിഞ്ഞാറന് തീരത്ത് പ്രളയസമാന സാഹചര്യം തുടരും. കര്ണടാകയുടെ തീരദേശത്തും കൊടക് പോലുള്ള മേഖലകളിലും അടുത്ത 3 ദിവസം ശക്തമായതോ അതിശക്തമായതോ ആയ മഴ പ്രതീക്ഷിക്കാം. കേരളത്തില് വടക്കന് ജില്ലകളില് ശക്തമായ മഴയും തുടരും.ഇന്നും നാളെയും മണിക്കൂറില് 45 കി.മി വരെ വേഗത്തിലുള്ള കാറ്റ് തുടരും. മരങ്ങളുടെ താഴെ, ഉറപ്പില്ലാത്ത പരസ്യപലകകളുടെ താഴെ ഒന്നും വാഹനം പാര്ക്കു ചെയ്യുകയോ ഇത്തരം സ്ഥലങ്ങളില് അഭയം തേടുകയോ ചെയ്യരുത്.
അന്തരീക്ഷസ്ഥിതി അവലോകനം
ബംഗാള് ഉള്ക്കടലില് രൂപപ്പെട്ട ന്യൂനമര്ദം സമുദ്രനിരപ്പില് നിന്ന് ഏകദേശം ഏഴു കി.മിലധികം ഉയരത്തില് കാറ്റിന്റെ ചുഴിരൂപപ്പെടുത്തുന്നുണ്ട്. ഈ ന്യൂനമര്ദം ഒരു പടികൂടി ശക്തിപ്പെട്ട് വെല്മാര്ക്ഡ് ലോ പ്രഷന് (ഡബ്ല്യു.എം.എല്) ആകാന് സാധ്യത കൂടുതലാണ്. ന്യൂനമര്ദത്തിന് ശക്തിപ്രാപിക്കാനുള്ള ഊര്ജം നല്കാന് പാകത്തില് ഇവിടെ സമുദ്രോപരിതല താപനിലയും കൂടുതലാണ്. ഇതിനിടെ ഗുജറാത്തിനു സമീപം പുതിയ ന്യൂനമര്ദസാധ്യതയും നിലനിലനില്ക്കുന്നു. ബംഗാള് ഉള്ക്കടലിലെ ന്യൂനമര്ദം ദുര്ബലമായ ശേഷമാകും ഗുജറാത്തില് രൂപപ്പെടുക. ഇതുമായി ബന്ധപ്പെട്ട് കാറ്റിന്റെ ചുഴി അവിടെ രൂപപ്പെട്ടിട്ടുണ്ട്. ഇതേകുറിച്ച് 03-08-20 ലെ പോസ്റ്റില് വിശദമാക്കിയതിനാല് ആവര്ത്തിക്കുന്നില്ല.
പശ്ചിമതീരത്ത് പ്രാദേശിക പ്രളയസാധ്യത
മുംബൈ മുതല് ഗോവവരെയുള്ള പശ്ചിമതീരമേഖലയില് കനത്തമഴയ തുടരും. ഇവിടെ അതിശക്തമായ മഴയോ തീവ്രമഴയോ ലഭിച്ചേക്കാം. ഈ സാഹചര്യത്തില് മേഖലയില് മണ്ണിടിച്ചില്, ഉരുള്പൊട്ടല്, പ്രാദേശിക പ്രളയഭീഷണി നിലനില്ക്കുന്നതിനാല് ഈ മേഖലയിലേക്കുള്ള അടുത്ത നാലു ദിവസത്തെ യാത്ര സുരക്ഷിതമല്ല.
കേരളത്തില് ശക്തമായ മഴ തുടരും
വടക്കന് ജില്ലകളിലാണ് നേരത്തെ വ്യക്തമാക്കിയതുപോലെ മഴ കൂടുതല് ശക്തിപ്പെടുക. മലയോരമേഖലകളില് കനത്തമഴ ലഭിക്കുകയും മഴസാധ്യത നിലനില്ക്കുകയും ചെയ്യുന്ന സാഹചര്യത്തില് കണ്ണൂര്, കോഴിക്കോട്, വയനാട്, മലപ്പുറം, പാലക്കാട് ജില്ലകളിലെ മലയോരമേഖലയിലുള്ളവര് ജാഗ്രത പാലിക്കുകയും അധികൃതര് നല്കുന്ന സുരക്ഷാ നിര്ദേശങ്ങള് പാലിക്കുകയും വേണം.
ഈ ജില്ലകളില് ജാഗ്രതവേണം
മെറ്റ്ബീറ്റ് വെതറിന്റെ നിരീക്ഷണ പ്രകാരം അടുത്ത 24 മണിക്കൂറില് കണ്ണൂര്, കോഴിക്കോട്, മലപ്പുറം, വയനാട്, ഇടുക്കി ജില്ലകളിലെ മലയോരത്ത് കനത്തമഴ തുടരും. മലപ്പുറം ജില്ലയിലെ നിലമ്പൂര്, നാടുകാണി മേഖലയില് പ്രത്യേക ജാഗ്രതപാലിക്കണം. മലയോരമേഖലയിലും വനത്തിലും അതിശക്തമായ മഴക്ക് സാധ്യതയുള്ളതിനാല് ഉരുള്പൊട്ടല് ഭീഷണി നിലനില്ക്കുന്ന മേഖലയിലുള്ളവര് പൊലിസ്, തദ്ദേശസ്ഥാപനങ്ങള്, ദുരന്തനിവാരണ വകുപ്പ് തുടങ്ങിയവര് നല്കുന്ന നിര്ദേശങ്ങള് പാലിക്കാന് വൈമനസ്യം കാണിക്കരുത്. വനത്തില് ഉരുള്പൊട്ടലുണ്ടായാല് ചാലിയാര് ഉള്പ്പെടെയുള്ള പുഴകളില് ജലനിരപ്പ് ഉയരാനും സാധ്യതയുണ്ട്. ഇടുക്കിയിലെ ഹൈറേഞ്ചിലാണ് ഇത്തവണ മഴ ശക്തിപ്പെടുക. വാല്പാറൈയില് അടുത്ത 24 മണിക്കൂറില് ശക്തമായ മഴ പ്രതീക്ഷിക്കാം.
മറ്റു ജില്ലകളില്
പാലക്കാട് ജില്ലയുടെ അട്ടപ്പാടി, അഗളി മേഖലകളില് കനത്തമഴ സാധ്യതയുണ്ട്. മറ്റു ഭാഗങ്ങളില് ശക്തമായ മഴയും തുടരും.
തൃശൂര്, എറണാകുളം ജില്ലകളില് ശക്തമായ മഴ തുടരും. കോട്ടയം, പത്തനംതിട്ട ജില്ലകളുടെ മലയോരത്തും ശക്തമായതോ അതിശക്തമായതോ ആയ മഴക്ക് സാധ്യത. ആലപ്പുഴ മുതല് തിരുവനന്തപുരം വരെയുള്ള തീരദേശത്ത് ഇടത്തരം മഴ സാധ്യത മാത്രം. കഴിഞ്ഞ ദിവസങ്ങളിലെ പോസ്റ്റില് വിശദീകരിച്ച കാര്യങ്ങള് ഇവിടെ ആവര്ത്തിച്ചിട്ടില്ല. അതിനാല് ആ പോസ്റ്റുകള് കൂടി എഫ്.ബി പേജിലോ വെബ്സൈറ്റിലോ പോയി വായിക്കുന്നത് ഉചിതമാണ്.
ജില്ലാ ഭരണകൂടം, തദ്ദേശസ്ഥാപനങ്ങള്, ദുരന്തനിവാരണ അതോറിറ്റി തുടങ്ങിയവര് നല്കുന്ന നിര്ദേശങ്ങള് പാലിക്കുക.തുടര്ച്ചയായ കനത്തമഴ മലയോരമേഖലകളില് മണ്ണിടിച്ചില്, ഉരുള്പൊട്ടല് സാധ്യത വര്ധിപ്പിക്കും. പുഴകളില് ജലനിരപ്പ് കൂടാനും സാധ്യതയുള്ളതിനാല് ഇത്തരം മേഖലകളില് രാത്രിയാത്രയും മറ്റും ഉപേക്ഷിക്കണം. ഏറ്റവും പുതിയ കാലാവസ്ഥാ അപ്ഡേഷനുകളും ശ്രദ്ധിക്കുക. വിവിധ പ്രദേശങ്ങളിലെ തല്സമയ കാലാവസ്ഥാ വിവരങ്ങളും അടുത്തദിവസങ്ങളിലെ അന്തരീക്ഷസ്ഥിതിയും അറിയാന് മെറ്റ്ബീറ്റ് വെതറിന്റെ വെബ്സൈറ്റില് സംവിധാനമുണ്ട്. ഇതിനായി ഇവിടെ ക്ലിക്ക് ചെയ്യുക. ഞങ്ങളുടെ ഫേസ്ബുക്ക് പേജ് ലൈക്ക് ചെയ്ത് അപ്ഡേഷന് ശ്രദ്ധിക്കുക.
Photo- V Amal
Click here for Donate and Support Metbeat Weather
Comments