കടല്കോപിച്ചാല് ഫലം വരള്ച്ച, പ്രളയം, കടല്കയറല്
ഡോ.ഗോപകുമാര് ചോലയില്
ഭാഗം- 2 സമുദ്ര ജല പ്രവാഹത്തിന്റെ കാരണങ്ങള്
ഭൂമധ്യരേഖാ പ്രദേശത്തുനിന്ന് ധ്രുവമേഖലയിലേക്കും അവിടെ നിന്ന് തിരിച്ചും സഞ്ചരിക്കുന്ന സമുദ്രജലത്തിന്റെ ഊഷ്മാവ്, സാന്ദ്രത എന്നീ മാനങ്ങളില് അധിഷ്ഠിതമായ ഈ പര്യയന വ്യവസ്ഥ താപ-ലവണ പര്യയന വ്യവസ്ഥയെന്നാണ് (Thermo-haline circulation) അറിയപ്പെടുന്നത്. ഈ പ്രക്രിയ ഇല്ലായിരുന്നുവെങ്കില് സമുദ്രത്തിന്റെ അഗാധതലങ്ങളില് പ്രവാഹങ്ങള് ഉണ്ടാവുകയില്ലായിരുന്നു. ആഗോള സമുദ്രജല വാഹക വ്യവസ്ഥ(Global Ocean Conveyor Belt) പ്രവര്ത്തിക്കുകയുമില്ലായിരുന്നു. സമുദ്രജലത്തിന്റെ സ്ഥാനാന്തരത്തിലൂടെ താപം, ലവണത്വം. എന്നീ ഘടകങ്ങളുടെ സംതുലിത വിന്യാസം ഉറപ്പാക്കുന്നവയാണ് പര്യയന വ്യവസ്ഥകള്.
വ്യാപക സ്വാധീനശക്തിയുള്ളതാണെങ്കില് പോലും വിവിധ അക്ഷാംശങ്ങളെ മറികടന്നൊഴുകുന്ന ഉത്തര-ദക്ഷിണ ദിശകളിലുള്ള പര്യയന വ്യവസ്ഥകള് അതീവ സംവേദന സ്വഭാവമുള്ളവയാണ്. ആകെ സമുദ്രോപരിതല വിസ്തൃതിയുടെ ഒരു ശതമാനത്തേക്കാള് താഴെയാണ് അഗാധ സമുദ്രജലപ്രവാഹങ്ങള് രൂപം കൊള്ളുന്ന ഇടങ്ങള്. എന്നാല് തന്നെ താപനിലയിലോ ലവണാംശത്തിലോ വ്യതിയാനങ്ങള് ഉണ്ടാകുന്ന പക്ഷം അഗാധസമുദ്രജലപ്രവാഹങ്ങളുടെ രൂപീകരണപ്രക്രിയ മന്ദീഭവിക്കുകയോ ചിലപ്പോള് നിലച്ചു പോകുകയോ ചെയ്യുന്നു.
കാലാവസ്ഥയിലെ തീവ്രവ്യതിയാനങ്ങള്ക്ക് തെളിവ്
ലോക കാലാവസ്ഥയില് വര്ഷങ്ങളോളം തീവ്രവ്യതിയാനങ്ങള് ഉളവാക്കുവാന് പോന്ന ഇത്തരം ഒരു സ്തംഭനം പൗരാണിക കാലത്ത് സംഭവിച്ചിട്ടുണ്ട് എന്നതിന് ശക്തമായ തെളിവുകളുമുണ്ട്. ഉദ്ദേശം 11000 വര്ഷങ്ങള്ക്ക് മുന്പ് അവസാനത്തെ ഹിമയുഗത്തിന്റെ പിന്വാങ്ങല് കാലഘട്ടത്തില് അഗാസിസ് (Agasiz) എന്ന് പേരായ ഒരു വന്ഹിമത്തടാകം മധ്യ കാനഡയില് ഉണ്ടായിരുന്നു. അതിവിസ്തൃതമായ ഈ ഹിമതടാകത്തിന്റെ ഭിത്തികള് തകരാനിടയാവുകയും തടാകത്തിലെ സംഭരിത ജലം സെന്റ് ലോറന്സ് നദി വഴി ഉത്തര അത്ലറ്റ്ലാന്റിക്കില് എത്തിച്ചേരുകയും ചെയ്തു. ബൃഹത്തായ തോതില് ശുദ്ധജലം മിശ്രണം ചെയ്യാനിടയായതിനാല് ഉത്തര ധ്രുവത്തിലെ സമുദ്രജലം സാന്ദ്രത കുറഞ്ഞ് സമുദ്രത്തിന്റെ അഗാധതലത്തിലേക്ക് ആഴ്ന്നിറങ്ങാന് പറ്റാത്ത അവസ്ഥ കൈവരിക്കുകയും ചെയ്തു. തന്മൂലം അക്ഷാംശാന്തരപര്യയനം (meridional circulation) ഏകദേശം നിലച്ച അവസ്ഥയിലെത്തി. തല്ഫലമായി, അതിശീതകാലാവസ്ഥയും ഹിമാനിരൂപീകരണവും തുടര്ന്നും നിലനിന്നതിനാല് ഹിമയുഗം വീണ്ടും 1000 വര്ഷത്തോളം നീണ്ട് നിന്നു.
ആഗോളതാപനം വില്ലനാകും
ഇത്രത്തോളം തീവ്രതയില്ലെങ്കില് പോലും സമാന സാഹചര്യങ്ങള് ഉണ്ടാവാനുള്ള സാധ്യത ആഗോളതാപന സാഹചര്യങ്ങളില് തീര്ച്ചയായും പ്രതീക്ഷിക്കേണ്ടതുണ്ട്. അന്തരീക്ഷത്തിലെ വര്ദ്ധിത താപനില മൂലം ഗ്രീന്ലാന്ഡ് മേഖലയിലെ വന് ഹിമപാളികള് ഉരുകാനിടയാകുന്നു. ഉരുകി ഒലിച്ചിറങ്ങുന്ന ശുദ്ധജലം ഉത്തരധ്രുവ സമുദ്രമേഖലകളില് എത്തിച്ചേരുകയും അത് മേല്പരാമര്ശിച്ച സാഹചര്യങ്ങള്ക്ക് വഴിയൊരുക്കുകയും ചെയ്യുന്നു. ഈ വിധവും അക്ഷാംശാന്തര പര്യയനവ്യവസ്ഥ ദുര്ബലമാകുന്നതിനാല് ഉഷ്ണമേഖലാ പ്രദേശങ്ങളില് നിന്നുള്ള തപ്തജലം വടക്കോട്ടൊഴുകി ധ്രുവമേഖലകളിലെ സമുദ്രങ്ങളിലെത്തിച്ചേരുന്ന പ്രക്രിയ മന്ദീഭവിക്കപ്പെടുന്നു. ഇതുമൂലം വടക്ക്പടിഞ്ഞാറന് യൂറോപ്പിലെ അന്തരീക്ഷതാപനിലയില് അഞ്ച് ഡിഗ്രി സെന്റിഗ്രേഡിന്റെ വരെ കുറവുണ്ടാകാം. മേല് സാഹചര്യത്തില് ഗള്ഫ് സ്ട്രീം എന്ന ഉഷ്ണജലപ്രവാഹം നിലച്ചുപോവുമെന്ന ധാരണ ശരിയല്ല. ഈ സാഹചര്യത്തില്, ഉഷ്ണമേഖലയില് നിന്ന് ഗള്ഫ് സ്ട്രീമിലൂടെ വഹിക്കപ്പെടുന്ന ഉഷ്ണജലത്തിന്റെ അളവില് കാര്യമായ കുറവുണ്ടാകും എന്ന വസ്തുത നിഷേധിക്കാനാവില്ല.
എന്നാല്, മേല്പറഞ്ഞതില് നിന്നും വിഭിന്നമായി അക്ഷാംശാന്തര പര്യയന വ്യവസ്ഥയുടെ ശോഷണം മറ്റൊരു ഹുമയുഗത്തിന് നാന്ദികുറിക്കുകയില്ല എന്നതാണ് വേറൊരു നിഗമനം. അന്തരീക്ഷതാപനം ഉയര്ന്നുകൊണ്ടേയിരിക്കുന്ന സാഹചര്യത്തില് താപനില താഴുന്നതിനുള്ള സാഹചര്യങ്ങള് ഇല്ല എന്നുതന്നെ പറയാം. എന്നാല്, മേല്പറഞ്ഞ രണ്ട് നിരീക്ഷണങ്ങളെ മാറ്റി നിര്ത്തിയാല് പോലും അക്ഷാംശാന്തര പര്യയന വ്യൂഹത്തില് ഉണ്ടാക്കാവുന്ന ഏതൊരു വ്യതിയാനവും ദൂരവ്യാപകഫലങ്ങള് ഉളവാക്കുവാന് പര്യാപ്തമാണ്.
വരള്ച്ചക്കും പ്രളയത്തിനും കാരണമാകും
ഭൂമധ്യരേഖ മറികടന്ന് ഉത്തരധ്രുവം ലക്ഷ്യമാക്കി തപ്തജലത്തിന്റെ ഒഴുക്ക് കുറയുമ്പോള് ഭൂമധ്യരേഖയുടെ ദക്ഷിണഭാഗത്തുള്ള സമുദ്രങ്ങളില് ചൂടേറിയ ജലത്തിന്റെ സ്ഥിരസാന്നിധ്യം മൂലം ചൂടേറുന്നു. ഇതിന്റെ ഫലമായി ഭൂമധ്യരേഖയുടെ ഇരുപുറവുമായി കാണപ്പെടുന്ന താപമേഖലയുടെസ്ഥാനം ദക്ഷിണദിശയിലേക്ക് കൂടുതല് സ്ഥാനാന്തരപ്പെടുന്നു. ഇതിനെ തുടര്ന്ന് മഴയുടെ പ്രകൃതത്തിലും ലഭ്യതയിലും മാറ്റം വരുന്നു. ഉപരിതലജലം സമുദ്രത്തിന്റെ അഗാധടിത്തട്ടില് നതലങ്ങളിലേക്ക് താഴ്ന്നിറങ്ങുന്ന പ്രക്രിയ മന്ദീഭവിക്കുന്നതുമൂലം ആഴക്കടലില് ഓക്സിജന് ശോഷണം അനുഭവപ്പെടുന്നു. അതുപോലെ അിന്നുള്ള ജലത്തിന്റെ മേല്ത്തള്ളല് കുറയുന്നതുമൂലം സമുദ്രോപരിതലത്തിലെത്തിച്ചേരുന്ന പോഷകങ്ങളുടെ അളവിലും കുറവുണ്ടാകുന്നു. ഈ രണ്ട സാഹചര്യങ്ങളും സമുദ്ര ആവാസവ്യൂഹങ്ങള്ക്ക് അത്യന്തം ദോഷകരമാണ്.
ശൈത്യം കൂടും, നഗരങ്ങള് കടലെടുക്കും
ഗ്രീന്ലാന്്ഡിലെ ഹിമശേഖരങ്ങള്ക്കുമേല് ഉണ്ടാകുന്ന ശുദ്ധജല അധിനിവേശം, കനത്ത മഴ എന്നിവ മൂലം മഞ്ഞുപാളികള് ഉരുകുകയും സമുദ്രജലത്തിന്റെ ലവണത്വം കുറയുകയും ചെയ്യുന്നു. ലവണാംശം കുറഞ്ഞ ജലത്തിന് സാന്ദ്രത കുറവായതിനാല് അത് അഗാധ സമുദ്രതലത്തിലേക്ക് ആഴ്ന്ന് എത്തുകയോ പ്രവാഹഗതി ദക്ഷിണദിശയിലേക്ക് തിരിച്ച് വിടുകയോ ചെയ്യുന്നില്ല. ആഗോളതാപനം ഉടനടി നിയന്ത്രണാധീനമാകുന്നില്ല എന്നിരിക്കട്ടെ, അറ്റ്ലാന്റിക്പ്രവാഹങ്ങള് തിരിഞ്ഞൊഴുകുന്ന പ്രക്രിയ കൂടുതല് മന്ദീഭവിക്കാന് തന്നെയാണ് സാധ്യത. അന്റാര്ട്ടിക്ക് മേഖലയിലും സമാന പ്രക്രിയ തന്നെയാണ് സംഭവിക്കുന്നത്. നിലവിലെ താപനസാഹചര്യങ്ങളില് അന്റാര്ട്ടിക്മേഖലയില് അഗാധസമുദ്രതലങ്ങളിലേക്ക് ഉപരിതല ജലം ആഴ്ന്നിറങ്ങിയെത്തുന്ന പ്രക്രിയ മന്ദീഭവിക്കുന്നു. അന്റാര്ട്ടിക്ക മേഖലയിലെ ഹിമപാളികള് വന് തോതില് ഉരുകി തത്പ്രദേശങ്ങില് നിന്നുള്ള പ്രവാഹങ്ങളുടെ തിരിച്ചൊഴുക്കിന് പ്രതിബന്ധം സൃഷ്ടിക്കുന്നു. താഴ്ന്ന അക്ഷാംശ മേഖലകളില് നിന്നുള്ള തപ്തജലപ്രവാഹത്തിന്റെ ഒഴുക്ക് മന്ദീഭവിക്കുന്നതിനാല് ഉയര്ന്ന അക്ഷാംശ മേഖലകളില് (ഉദാ:ഇംഗ്ലണ്ട്) കടുത്ത ശൈത്യമനുഭവപ്പെടുന്നു. അതേസമയം, ആഴക്കടലില് നിന്നുള്ള തണുത്ത ജലത്തിന്റെ മേല്ത്തള്ളല് മന്ദീഭവിക്കുന്നതുമൂലം മദ്ധ്യരേഖാ ഭൂപ്രദേശങ്ങളില് ഉയര്ന്ന ഉഷ്ണവും അനുഭവപ്പെടുന്നു. വന് തോതിലുള്ള മഞ്ഞുരുക്കം സമുദ്രനിരപ്പ് ഉയരുന്നതിനും കാരണമാകുന്നു. കടുത്ത കാലാവസ്ഥ അസ്ഥിരതയുമായി ബന്ധപ്പെട്ട് സമുദ്രപര്യയന വ്യവസ്ഥകളില് മുന്കാലങ്ങളിലും വ്യതിയാനങ്ങളുണ്ടാകുന്നതായി നിരീക്ഷിക്കപ്പെട്ടിട്ടുണ്ട്.
കാര്ബണ് പുറംതള്ളലും ഭീഷണി
അത്ലാന്റിക്കിലെ അക്ഷാംശാന്തര പര്യയന വ്യവസ്ഥ ഈ നൂറ്റാണ്ടിന്റെ അവസാനത്തോടെ ഇന്നുള്ള വേഗതയുടെ 54 ശതമാനം വരെ മന്ദീഭവിക്കുമെന്ന് ഐ.പി.സി.സി യുടെ (ഇന്റര് ഗവണ്മെന്റല് പാനല് ഓണ് ക്ലൈമറ്റ് ചേഞ്ച്) വിലയിരുത്തല് റിപ്പോര്ട്ട് പറയുന്നു. നിയന്ത്രണങ്ങളില്ലാതെ അന്തരീക്ഷത്തിലേക്ക് കാര്ബണ് ഡയോക്സൈഡ് അധികരിച്ച തോതില് ഉല്ത്സര്ജ്ജനം ചെയ്യപ്പെടുന്ന സാഹചര്യങ്ങളിലാണ് ഇത്തരം ഒരു അവസ്ഥ സംജാതമാവുക. അത്തരം ഘട്ടത്തില് ഹരിതഗൃഹപ്രഭാവം മൂലം അന്തരീക്ഷതാപനിലയില് നാല് ഡിഗ്രി സെന്റിഗ്രേഡ് വരെ വര്ധനവ് ഉണ്ടാകാം. ഉത്സര്ജ്ജനം ഒട്ടും തന്നെയില്ലാത്ത സാഹചര്യത്തില് പ്രവാഹ മാന്ദ്യതാ സാധ്യത ഒരു ശതമാനം മാത്രം എന്ന തോതില് കുറയുന്നതായും അനുമാനിത പഠനങ്ങള് ചൂണ്ടിക്കാട്ടുന്നു.
അറ്റ്ലാന്റിക്കിലെ അക്ഷാംശാന്തരീയ സമുദ്രപര്യയന വ്യവസ്ഥ കഴിഞ്ഞ ആയിരം വര്ഷത്തിനിടക്ക് ഇപ്പോഴാണ് ഏറ്റവും ദുര്ബലാവസ്ഥയില് ഉള്ളത് എന്നാണ് അഗാധസമുദ്രതലങ്ങളിലെ അവസാദനിക്ഷേപങ്ങള് (sediments) വിശകലന വിധേയമാക്കിയതില് നിന്നും വെളിപ്പെടുന്നത്.
അറ്റ്ലാന്റിക്കിലെ അഗാധജലപ്രവാഹങ്ങളില് 150 വര്ഷങ്ങള്ക്ക് മുന്പാണ് നിലവിലെ ശോഷണം ആരംഭിച്ചത്. ആര്ട്ടിക്-അന്റാര്ട്ടിക്ക മേഖലകളിലെ ഹിമനിക്ഷേപം ഏറ്റവുമധികം ഉരുകിയിയൊലിക്കാനാരംഭിച്ചതും ഇക്കാലയളവില് തന്നെയായിരുന്നുവെന്നതും എടുത്തു പറയേണ്ടതാണ്. കാലാവസ്ഥാവ്യതിയാനത്തിന്റെ പ്രകടലക്ഷണമായ ആഗോളതാപനമാണ് വന്തോതിലുള്ള മഞ്ഞുരുക്കത്തിന് പ്രധാന കാരണം. ആഗോളതാപനത്തിന്റെ സ്വാധീനഫലമായി ധ്രുവമേഖലയോട് അനുബന്ധിച്ചുള്ള അലാന്റിക് സമുദ്രത്തിലും ചുറ്റുമുള്ള ഭൂപ്രദേശങ്ങളിലും ലഭിക്കുന്ന മഴയില് വര്ധനവ് ഉണ്ടാകുന്നു. വടക്കേ അറ്റ്ലാന്റിക്കിന് ചേര്ന്നുള്ള ഭൂപ്രദേശങ്ങളില് നിന്ന് നദികള് ഒഴുകി ചേരുന്നത് ഈ സമുദ്രമേഖലയിലാണ്. കൂടാതെ, ആര്ട്ടിക്-ഗ്രീന്ലാന്ഡ് മേഖലകളിലെ മഞ്ഞ് പാളികളുടെ വന്തോതിലുള്ള ഉരുകലും സമുദ്രത്തിലേക്ക് കൂടുതല് അളവില് ശുദ്ധ ജലം എത്തിച്ചേരുവാന് ഇടയാവുന്നു. സമുദ്രത്തിലെ ലവണാംശത്തില് കുറവ് വരികയും ത•ൂലം ഉപരിജലം താഴെത്തട്ടിലേക്ക് ആഴ്ന്നിറങ്ങുന്നത്തിന്റെ അളവില് കുറവുണ്ടാവുകയും ചെയ്യുന്നു. വ്യവസായ വിപ്ലവാനന്തര കാലഘട്ടത്തില് വന്തോതില് പുറംതള്ളപ്പെട്ടുകൊണ്ടിരിക്കുന്ന ആഗോളതാപനകാരികളായ ഹരിത ഗൃഹവാതകങ്ങളുടെ അന്തരീക്ഷ ഉത്സര്ജ്ജനം അടിയന്തിരമായി നിര്ത്തിവച്ചാല് പോലും ഇപ്പോള് തന്നെ അന്തരീക്ഷത്തിലുള്ള കാര്ബണ്ഡയോക്സൈഡിന്റെ ഉയര്ന്ന സാന്ദ്രതമൂലം, ഒരു പക്ഷെ, നൂറ്റാണ്ടുകളോളം തന്നെ ധ്രുവപ്രദേശങ്ങളിലെ മഞ്ഞ്പാളികളെ ഉരുക്കുവാന് പോന്ന താപന പ്രഭാവം നിലനില്ക്കും. ഇക്കാരണത്താല് തന്നെ, ധ്രുവപ്രദേശങ്ങളിലെ ഹിമപാളികള് ഉരുകുന്നതുമൂലം ഉണ്ടാകുന്ന സമുദ്രപര്യയന വ്യതിയാനങ്ങള്ക്ക് ഉടന് പരിഹാരം ഇല്ലായെന്ന് തന്നെ പറയാം. (തുടരും)
സമുദ്രജല സഞ്ചാരം സംബന്ധിച്ച് NASA തയാറിക്കിയ ഗ്രാഫിക് ചിത്രീകരണം കാണാന് ഇവിടെ ക്ലിക്ക് ചെയ്യുക
ഇവിടെ ക്ലിക്ക് ചെയ്യുക
(കേരള കാര്ഷിക സര്കലാശാലയിലെ കാലാവസ്ഥാ വ്യതിയാന പഠന ഗവേഷണ അക്കാഡമിയിലെ സയന്റിഫിക് ഓഫീസര് ആണ് ലേഖകന്)
Advt- ആമസോണ് ഉല്പന്നങ്ങള് ഓഫര് വിലയില് ലഭിക്കാന് ഇവിടെ ക്ലിക്ക് ചെയ്യുക .
Comments